Inissialiornermut tapiissuteqartarneq (Boligstøttehuse) aqqutigalugu illuutit pitsanngorsarnissaannut tapiissutit – Qinnuteqarneq

Inissialiornermut tapiissuteqartarneq (Boligstøttehuse) aqqutigalugu illuutit pitsanngorsarnissaannut tapiissutit – Qinnuteqarneq 

Inissialiornermut tapiissuteqartarneq aqqutigalugu illuut tassaavoq illu, inissialiornermut tapiissuteqartarnermik aaqqissuussineq atorlugu sananeqarsimasoq. Tassa imaappoq, illumik piginnittoq illup sananissaanut inissialiornermut tapiissuteqartarnermik aaqqissuussineq malillugu Nunatta karsianiit aningaasanik taarsigassarsisimavoq. Taamaammat taarsigassarsiat tamakkerlugit utertillugit akilernissaasa tungaannut Namminersorlutik Oqartussanut arlalinnik pisussaaffeqartoqartarpoq. Namminersorlutik Oqartussat sinnerlugit inissialiornermut tapiissuteqartarnermik aaqqissuussineq INI-mit aqunneqarpoq. Tamatuma kingunerisaanik inissialiornemut tapiissuteqartarneq aqqutigalugu illuutilittut INI saaffigisartussaavat.

Inissialiornermut tapiissuteqartarneq aqqutigalugu illuutit imaluunniit nammineerluni illuliat alliniarukku pitsanngorsarniarluguluunniit, aningaasartuutit matussusernissaannut annerpaamik 100.000 kr.-nik tapiiffigineqarnissamik qinnuteqarsinnaavutit. Assersuutigalugu makkununngaasinnaavoq:

  • Kiassaateqarfik
  • Ukioq naallugu imeqarnermut atassusiineq
  • Kuuffissuarmut attavilersinneq
  • Uffarfimmik sananeq
  • Oqorsaaneq

    Nalinginnaasumik aserfallatsaaliinermik suliassanut aamma atortorissaarutinut inuulluataarutinik taaneqarsinnaasunut tapiiffigineqarsinnaanngilatit, assersuutigalugu makkununnga:
  • Qalipaanermut
  • Naternik taarsersuinernut
  • Illup iluani matunik taarsiinermut
  • Atortunut innaallagissamoortunut, assersuutigalugu uffarfinnut qalaliasunut (SPA-nut ) assigisaannullu
  • Aneerasaartarfimmik sananermut

Tapiissutit annerpaamik 100.000 kr.-usinnaapput aamma ukiut tallimat qaangiunneri tamaasa annerpaamik ataasiarlutit qinnuteqarnikkut tapiissutisisinnaavutit.

Tapiiffigineqarsinnaanerit akuerineqarpat, aningaasartuutit sipporlugit atuinermut matussutissanik taamaallaat tapiiffigineqarsinnaavutit, imaattoqarsimappat:

  • Aningaasartuutit sipporlugit atuineq nutarterinermut pineqartumut tunngasuuppata
  • Aningaasartuutit sipporlugit atuineq qinnuteqaatigineqaqqaartumi ilanngunneqarsimasariaqaraluarpoq

Tapiissutit tamarmiusut 100.000 kr.-t sinnersinnaanngilaat.


Piumasaqaatit
Illunnik alliliinermut pitsanngorsaanermullu taamaallaat tapiissutisisinnaavutit siunertanut taakkununnga aningaasanut inatsimmi aningaasanik immikkoortitsisoqarsimappat.

Inissialiornermut tapiissuteqartarneq aqqutigalugu illuutit pitsanngorsarnissaannut iluarsartuunnissaannullu tapiissutisisoqarsinnaavoq:

  • Inoqutigiittut isertitasi ukiuni kingullerni marlunni agguaqatigiisillugu ukiumut 180.000 kr.-t ataassimappatigit. Aningaasat meeqqamut 18-it inorlugit ukiulimmut ataatsimut angerlarsimaffimmi najugaqartumut 4.000 kr.-nik qaffanneqarsinnaapput. Assersuutigalugu meeqqatit pingasut angerlarsimaffimmi najugaqarpata, inoqutigiit isertitaat ukiumut annerpaamik 192.000 kr.-ussapput
  • Tapiissutinik ukiuni kingullerni tallimani pissarsisimassanngilatit
  • Illu ikuallattoornissamut aamma anorersuarneranut sillimmaserneqarsimassaaq

Qaqortumi, Nuummi, Sisimiuni Ilulissaniluunniit najugaqaruit tapiissutisisinnaanngilatit.


Qinnuteqarneq
Inissialiornermut tapiissuteqartarneq aqqutigalugu illuutivit imaluunniit nammineerluni illuliavit allilernissaanut pitsanngorsarnissaanulluunniit tapiissuteqarfigineqarnissaq soqutigigukku, qinnuteqarnermi immersugassaq immersussavat. Taanna quppernermi uani immersugassat akornanni nassaarisinnaavat. Immersugassami allassimasarpoq qinnuteqaammut suut uppernarsaatitut ilanngunneqassanersut, makku saniatigut:

  • Isertitat pillugit paasissutissat
  • Sanasunit suliarinnittussanit neqeroorut, ilinnit akuerineqarsimasoq

Qinnuteqaat uppernarsaatinik ilanngussanik tamanik ilalik najukkanni INI-p allaffeqarfianut tunniussinnaavat nassiulluguluunniit. Qinnuteqaatip suliarinissaanut ikiortikkumallutit INI-p allaffeqarfia aamma saaffigisinnaavat.


Akuersissut
Qinnuteqaatit akuerineqassappat tamanna pillugu INI-p ilisimatissavaatit. Illit suliarinnittussallu akunnissinni suliassap suliarineqarnissaanut isumaqatigiissut INI-p suliarissavaa, taanna marluullusi atsiussavarsi INI-mullu utertillugu nassiullugu.

Qinnuteqaatit akuerineqanngippat sooq akuerineqannginnersoq pillugu allakkatigut nalunaarutisissaatit.

Illit nammineq akisussaaffigaat:

  • Sulinermik nakkutilliineq. Illit sinnerlutit sulinermik nakkutilliisussaq inuk alla aamma toqqarsinnaavat. Nakkutilliinermut tassunga atatillugu aningaasartuutit, aningaasanit qinnutigineqartunit ilanngunneqarsinnaapput
  • Kommunimut sanaartornermut akuersissummik aamma nunaminertamik atugassinneqarnissamik qinnuteqarneq
  • Sulineq naammassippat INI-mut nalunaaruteqarneq

Sanasup suliassani naammassiguniuk akiligassamik sanassaaq, taanna akuerigukku atsiorlugu INI-mut nassiutissavat. Matuma kingorna INI-p sanasoq illit sinnerlutit akilissavaa.

Allaaserisat attuumassutillit

INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl