Inissialiornermut tapiissuteqartarneq (Boligstøttehuse) aqqutigalugu illuutit inoqanngitsut – Tuniniarneqartarnerat

Inissialiornermut tapiissuteqartarneq (Boligstøttehuse) aqqutigalugu illuutit inoqanngitsut – Tuniniarneqartarnerat 

Inissialiornermut tapiissuteqartarneq aqqutigalugu illuut tassaavoq, illu inissialiornermut tapiissuteqartarnermik aaqqissuussineq atorlugu sananeqarsimasoq. Tassa imaappoq, illumik piginnittoq illup sananissaanut inissialiornermut tapiissuteqartarnermik aaqqissuussineq malillugu Nunatta karsianiit aningaasanik taarsigassarsisimavoq. Taamaammat taarsigassarsiat tamakkerlugit utertillugit akilernissaasa tungaannut Namminersorlutik Oqartussanut arlalinnik pisussaaffeqartoqartarpoq. Namminersorlutik Oqartussat sinnerlugit inissialiornermut tapiissuteqartarnermik aaqqissuussineq INI-mit aqunneqarpoq. Tamatuma kingunerisaanik, inissialiornemut tapiissuteqartarneq aqqutigalugu illuutigineqarsimasumut piginnittussanngortussatut INI saaffigisartussaavat.

Inissialiornermut tapiissuteqartarneq aqqutigalugu illut inoqanngitsut tamarmik tamanut saqqummiussineq aqqutigalugu akisunerpaamik pisiumasunut tunineqartarput. Illu Namminersorlutik Oqartussanut utertillugu tunniunneqaraangat, Namminersorlutik Oqartussat sinnerlugit INI-p illu tuniniartarpaa, tamatumani illup siunertamut allamut atorneqarnissaa Namminersorlutik Oqartussat aalajangiussimanngippassuk. Assersuutigalugu illu Namminersorlutik Oqartussat namminneq arlaannut atorusussinnaavaat imaluunniit kommunimut tunniussinnaallugu.

Illut tuniniagaanerat saqqummiunneqartarpoq

  • Nunatsinni aviisitigut
  • INI-p nittartagaatigut
  • Nunaqarfinni nivinngaavinni

Kikkut tamarmik illunik tuniniakkanik pisinissamut periarfissaqarput. Illu pisiariumagukku nivinngakkami tunniussivissamut allassimasumut allakkatigut neqeroorummik nassiussissaatit. Illumut neqeroornialersinnak makku eqqumaffigisariaqarpatit:

  • Pisineq nammineerlutit aningaasalersussagakku. Illu taamaallaat tunineqarsinnaavoq ataatsikkoortumik akiliuteqarnikkut aamma Namminersorlutik Oqartussaniit taarsigassarsinissamut imaluunniit tapiiffigineqarnissamut periarfissaqartoqanngilaq
  • Illu tuniniarneqartarpoq isikkuatut isillugu, tunisisorlu akisussaaffeqarani

Illu pisiarereerukku, illu Namminersorlutik Oqartussanit pigineqarunnaassaaq. Illumut piginnittuunermut uppernarsaat INI-p suliarissavaa ilinnullu nassiullugu. Uppernarsaat atsiussavat, atsiugarlu tunniutissavat najukkanniluunniit INI-p allaffeqarfianut nassiullugu. Matuma kingorna uppernarsaat INI-p Akileraartarnermut Aqutsisoqarfimmut kiisalu Eqqartuussivimmi illumik piginnittut nalunaarsorneqartarfiannut nassiutissavaa. Uppernarsaat nalunaarsorneqareerpat ilinnut utertinneqassaaq.

Naggataatigut kommune illup inissisimaffigisaa nalunaarfigineqassaaq illu illit pisiarisimagit.


Malugiuk
Neqeroorutit tamarmiusut tiguneqarsimasut toqqarnissaannut imaluunniit itigartinnissaannut INI periarfissaqarpoq.

Innaallagissamik, imermik aamma kiassarnermi uuttuutinik atuisunngornermi immersugassaq INI-p nassiutissavaa, taanna immersussavat Nukissiorfinnullu nassiullugu. Uuttuutit nalunaarutiginissaat illit akisussaaffigaat, taamaalillutit innaallagissamik, imermik aamma kiassarnermik illut pilersortilersinnaagakku.

Allaaserisat attuumassutillit

A/S INI
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl