Inissialiornermut tapiissuteqartarneq (Boligstøttelån) aqqutigalugu taarsigassarsineq – Akilersuinermik eqquutsitsinnginneq

Inissialiornermut tapiissuteqartarneq (Boligstøttelån) aqqutigalugu taarsigassarsineq – Akilersuinermik eqquutsitsinnginneq 

Inissialiornermut tapiissuteqartarneq aqqutigalugu illuut tassaavoq illu inissialiornermut tapiissuteqartarnermik aaqqissuussineq atorlugu sananeqarsimasoq. Tassa imaappoq inissialiornermut tapiissuteqartarnermik aaqqissuussineq malillugu Nunatta karsianiit aningaasanik illumik piginnittoq illup sananissaanut taarsigassarsisimassaaq. Taamaattumik taarsigassarsiat utertillugit akilernissaasa tungaannut Namminersorlutik Oqartussanut arlalinnik pisussaaffeqartoqartarpoq. Namminersorlutik Oqartussat sinnerlugit inissialiornermut tapiissuteqartarnermik aaqqissuussineq INI-mit aqunneqarpoq, taamaammallu taarsigassarsiat akilersorneqarnissaannik nukingisaaralunilu akileeqqusiissutinik akileeqqusisarluni.


Nukingisaaraluni akileeqqusissutit

Akiligassanut kinguaattooruit, INI-mit nukingisaaraluni akileeqqusissummik allagarsissaatit. Akiitsuit saniatigut nukingisaaraluni akileeqqusinermut atatillugu 50 kr. aamma 1.000 kr. sinnerlugu akiligassaqarsimaguit, taakku 2 %-iat akilertussaavatit.


Nukingisaarummik allagarsinerpit kinguninngua kinguaattoorutitit akilissavatit imaluunniit naafferartumik akilersuinissamik isumaqatigiissuteqarnissaq pillugu najukkanni INI-p allaffeqarfianut saaffiginnissaatit. Taarsigassarsiavit kinguaattoorutivilluunniit  allanngortinnissaat imaluunniit aaqqissuuteqqinnissaat aamma qinnuteqaatigisinnaavatit. Taamaaliussaguilli, arlalinnik piumasaqaatinik naammassinnittariaqarputit. Taakku pillugit allaaserisani allani annertunerusumik paasisaqarsinnaavutit.


Akiliinissamik piumasaqaateqarluni allagaqaat

INI-mut tuavisaaraluni akileeqqusissutip tigunerata kinguninngua saaffiginninngikkuit, akiliinissamik piumasaqaateqarluni allagaqaammik INI-p nassissavaatit. Tamatuma kingunerisaanik akiitsut sinneruttut aamma kinguaattoorutit ataatsikkut akilertussanngussavatit.

Illumi najugaqaannarsinnaassaatit

  • kinguaattoorutit tamakkerlugit akilerukkit
  • imaluunniit INI-mut uppernarsarsinnaagukku, ilissi inoqutigiittut isertitasi peqqutaallutik taarsigassarsiavit aamma kinguaattoorutivit allanngortinneqarnissaat imaluunniit aaqqissuuteqqinneqarnissaat periarfissaqartoq


Eqqartuussivimmi suliassanngortinneqarneq aamma aalajangiineq

Piumasaqaateqarluni allagarsinerpit kingorna qisuariaateqanngikkuit imaluunniit akiliiumassuseqarnerit arlaatigut takutinnagu, INI-p taarsigassarsiavit utertillugit akilerneqarnissaannik imaluunniit illumik tigusinissamik piumasaqaateqarluni eqqartuussivimmi suliassanngortissinnaavaatit.

Illit pillutit suliassaq eqqartuussiviup suliarereeruniuk INI-mut nalunaarutigissavaa, INI-lu ilinnut saaffiginnissaaq. Aalajangiineq assersuutigalugu tassaasinnaavoq, illit ullormiit eqqartuussiviusumiit sapaatit akunneri sisamat qaangiutsinnagit illut Namminersorlutik Oqartussanut utertillugu tunniutissagit. Illut utertillugu tunniuttussaagukku, najukkanni INI-p allaffeqarfianut saaffiginnissaatit. Tassani illup utertillugu tunniunneqarnissaanut atatillugu aamma illup innaallagiaqarnerata, imeqarnerata aamma kiassarnermut uuttuuteqarnerata kiisalu sillimmateqarnerata atorunnaarsillugit nalunaarutiginissaanut ikiorneqarsinnaavutit.

Allaaserisat attuumassutillit

A/S INI
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl