Inissialiornermut tapiissuteqartarneq (Boligstøttelån) aqqutigalugu taarsigassarsineq – Qaammatikkaartumik akiligassat aamma naafferartumik akilersuisinnaanermut periarfissat

Inissialiornermut tapiissuteqartarneq (Boligstøttelån) aqqutigalugu taarsigassarsineq – Qaammatikkaartumik akiligassat aamma naafferartumik akilersuisinnaanermut periarfissat 

Inissialiornermut tapiissuteqartarneq aqqutigalugu illuut tassaavoq inissialiornermut tapiissuteqartarnermik aaqqissuussineq atorlugu sananeqarsimasoq. Tassa imaappoq inissialiornermut tapiissuteqartarnermik aaqqissuussineq malillugu Nunatta karsianiit aningaasanik illumik piginnittoq, illup sananissaanut taarsigassarsisimassaaq. Taamaammat taarsigassarsiat tamakkerlugit akilernissaasa tungaanut, Namminersorlutik Oqartussanut arlalinnik pisussaaffeqartoqartarpoq. Namminersorlutik Oqartussat sinnerlugit inissialiornermut tapiissuteqartarnermik aaqqissuussineq INI-mit aqunneqarpoq. Tamatuma kingunerisaanik inissialiornermut tapiissuteqartarneq aqqutigalugu illuutilittut INI attaveqarfigisartussaavat.

Qaammatikkaartumik akiligassat qaammatit tamaasa INI-miit ilinnut nassiunneqartarput. Akiligassat kingusinnerpaamik qaammatip ulluisa pingajuanni akilersimasussaavatit. Qaammatip ulluisa pingajuat nalliuttuuppat arfininngornerulluniluunniit, akiliiffissamut killiliussaq ulluinnarmut tullermut kinguartinneqassaaq.

Akilersuussinermut PBS-imut ilanngukkumallutit nalunaarsinnaavutit. Akilersuussinermut nalunaarsimaguit, akiligassatit piffissaq eqqorlugu isumamineersumik illit konto-nniit akilerneqartassapput. Taamaalillutit akiligassat akilinngitsuukkat pillugit isumakuluutissaarutissaatit.


Tapiissutit aamma naafferartumik akilersuinissamut periarfissaq

Taarsigassarsiatit nammineq kisivit akilertussaanngilatit:

  • Namminersorlutik Oqartussat ernianut aamma inissialiornermut tapiissuteqartarneq aqqutigalugu taarsigassarsiat akilersornerannut 30 %-imik tapiissuteqartarput
  • Taassuma saniatigut Namminersorlutik Oqartussat meeqqanut angerlarsimaffimmi najugaqartunut tamanut – taamaattoq amerlanerpaamik meeqqanut arfinilinnut – ineqarnermi meeqqanut tapiissutinik 7,5 %-iusunik tunniussisarput

Akiligassatit akilerukkit nammineq isumamineersumik tapiissutit pissarsiarissavatit. Aningaasat ataasiartumik akilersinnaanngikkukkit taamaalillutillu kinguaattoorlutit, naafferartumik akilersuinissaq pillugu isumaqatigiissusiornissaq siunertaralugu INI saaffigisinnaavat, taamaalillutit kinguaattoorutitit naafferartumik akilersinnaaniassagakkit.

Kinguaattoorutit naafferartumik akilersornissaannut ilanngullugu qaammatikkaartumik akiligassaq INI-p nassiuttassavaa. Akileeqqusissummik tigusaqarsimanngikkuit najukkanni INI-p allaffeqarfiani taassuma nuutinnera tamatigut pissarsiarisinnaavat.


Malugiuk

Nuussaguit, najugaqarfivit allanngornera najukkanni INI-p allaffeqarfianut nalunaarutigissavat, taamaalillutit akiligassatit ingerlaavartumik tigusinnaaniassagakkit.

Allaaserisat attuumassutillit

A/S INI
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl