Inissialiornermut tapiissuteqartarneq (Boligstøttelån) aqqutigalugu taarsigassarsianik akiitsunillu allannguineq – Qinnuteqarneq

Inissialiornermut tapiissuteqartarneq (Boligstøttelån) aqqutigalugu taarsigassarsianik akiitsunillu allannguineq – Qinnuteqarneq 

Inissialiornermut tapiissuteqartarneq aqqutigalugu illuut tassaavoq illu, inissialiornermut tapiissuteqartarnermik aaqqissuussineq atorlugu sananeqarsimasoq. Tassa imaappoq, illumik piginnittoq illup sananissaanut inissialiornermut tapiissuteqartarnermik aaqqissuussineq malillugu Nunatta karsianiit aningaasanik taarsigassarsisimavoq. Taamaammat taarsigassarsiat tamakkerlugit utertillugit akilernissaasa tungaannut Namminersorlutik Oqartussanut arlalinnik pisussaaffeqartoqartarpoq. Namminersorlutik Oqartussat sinnerlugit inissialiornermut tapiissuteqartarnermik aaqqissuussineq INI-mit aqunneqarpoq. Tamatuma kingunerisaanik inissialiornemut tapiissuteqartarneq aqqutigalugu illuutilittut INI saaffigisartussaavat.

Qaammatikkaartumik akiligassat akilersornissaat ajornartorsiutigigukku, taarsigassarsiavit aamma akilersugassat akilinngitsuugaasinnaasullu allanngortinnissaat eqqarsaatersuutigisariaqarpat. Tassa imaappoq, taarsigassarsiat sinneruttut aamma akiligassat akilinngitsuugaasinnaasut allanngortinneqarsinnaapput taarsigassarsianut erniaqanngitsunut aamma taarsersugassaanngitsunut milliartoratik uninngasunut. Taamaalillutit illumi najugaqarallarnerpit nalaani, taarsigassarsiat taarsersornerannut akiliuteqartassanngilatit.


Piumasaqaatit

Taarsigassarsiavit aamma akiligassavit akilinngitsuukkat allanngortinnissaat piumasarissagukku

  • inissialiornermut tapiissuteqartarneq aqqutigalugu taarsigassarsiat erniallit atorlugit illuuteqassaatit
  • imaluunniit nammineq illuliamik illuuteqassaatit, toqqavianut innaallagissersorneranullu ernialersukkamik taarsigassarsiaqarlutit

Taakku saniatigut ukiumut inoqutigiit akileraarutaasussamik isertitaasa ukiuni kingullerni marlunni ukiumut 180.000 kr.-t sinnersimassanngilaat. Isertitanut killiliussaq meeqqamut 18-it inorlugit ukiulimmut ataatsimut, inuit allattorsimaffiannut nalunaarutigineqarsimasumut 4.000 kr.-nik qaffanneqarsinnaavoq. Isertitanut killiliussaq taamaattoq annerpaamik 24.000 kr.-nik qaffanneqarsinnaavoq – tassa meeqqat arfinillit nalingannik.

Aaqqissuussineq ilissinnut inoqutigiijusunut taamaallaat illumi najugaqarnissi nalaani atuuppoq. Tassa imaappoq, nuukkussi taarsigassarsiasi tamakkerlugit ataatsikkut utertillugit akilissavasi.


Qinnuteqarneq

Inissialiornermut tapiissuteqartarneq aqqutigalugu taarsigassarsiannik akiitsunnillu allanngortitsinissaq soqutigigukku, qinnuteqarnermi immersugassaq immersussavat. Taanna quppernermi uani immersugassat akornanni nassaarisinnaavat. Immersugassami allassimavoq qinnuteqaammut suut uppernarsaatitut ilanngutissaneritit.

Qinnuteqaat uppernarsaatinik tamanik ilalik najukkanni INI-p allaffeqarfianut tunniussinnaavat nassiulluguluunniit. Qinnuteqaatip suliarinissaanut ikiortissarsiorlutit INI-p allaffeqarfia aamma saaffigisinnaavat.

Pingaaruteqarpoq uppernarsaatit eqqortut tamakkerlugit ilanngunissaat. Qinnuteqaativit tunniunneraniit sapaatit akunneri sisamat qaangiunneranni ilanngussat tamaasa INI-p tigusimanngippagit, qinnuteqaatit unitsinneqarallassaaq annertunerusumillu suliarineqaqqinnani.


Akuersissut

Qinnuteqaat akuerineqassappat Namminersorlutik Oqartussanit toqqaannartumik nalunaarfigineqassaatit. Matuma kingorna taarsigassarsinermut neriorsuut aamma taarsigassarsianut qularnaveeqqut INI-p suliarissavai ilinnullu nassiullugit, taakkulu illit atsiussavatit.


Malugiuk

INI-p piumasarisinnaavaa taarsigassarsiarisatit tamakkerlugit utertillugit akilissagitit, imaattoqarpat:

  • Illu tunigukku
  • Akiliisinnaajunnaaruit
  • Illu isatigassanngorpat

Allaaserisat attuumassutillit

INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl