airplanebooksbriefcase business cogs cross election entertainment fish house law lockmedicalpeopleselfservices socialtax

Najugaqartut oqartussaaqataanerat

Nalinginnaasumik paasissutissiineq 

INI-p inissiaataa attartortittagaq tassaavoq pisortat inissiaataat attartortittagaq, Namminersorlutik oqartussanit imaluunniit kommuninit pigineqartoq aammalu INI-mit aqunneqartoq. Tassa imaappoq, INI-p inissiamut tunngasut nalinginnaasut amerlasuut isumagisarpai. Illilli INI aqqutigalugu attartortutut najugaqarfivit sunniuteqarfigeqataanissaanut periarfissaqarputit. Tamannalu najugaqartut oqartussaaqataanerannik taaneqartarpoq.

INI-p inissiaatai attartortakkat tamarmik immikkut immikkoortortaqarfeqarput tamarmillu siulersuisoqartinneqarlutik. Najugaqartut oqartussaaqataanerat immikkoortortaqarfimmi siulersuisut aamma immikkoortortaqarfimmi ataatsimiinnerit aqqutigalugit qulakkeerneqassaaq.

Najugaqartut immikkoortortaqarfii tamarmik immikkut aningaasanik atugassaqartinneqarput. Immikkoortortaqarfiup aningaasaatigivai taamaattumik illit sanilitillu immikkoortortaqarfimmi ataatsimiinnissinni sumut atorneqassanersut siunnersuuteqarsinnaavusi. Najugaqartut aningaasaataannik missingersuusiornissamut immikkoortortaqarfimmi siulersuisunit akisussaaffigineqarpoq. Missingersuutit najukkanni INI-p allaffeqarfianut akuersissutigisassanngortinneqartartussaapput.

 

Immikkoortortaqarfimmi siulersuisut 

Immikkoortortaqarfiup ingerlatsinermut missingersuutai ukiumullu naatsorsuutai inissiamik piginnittumit akuersissutigineqannginnerini immikkoortortaqarfiup siulersuisuanit misissuataarneqaqqaarsinnaallutillu oqaasertalersorneqarsinnaapput.

Ingerlatsinermut missingersuutit killiliussaasut iluini immikkoortortaqarfiup siulersuisui makkununnga atugassanngortitsiniarlutik siunnersuuteqarsinnaapput:
• Aserfallatsaaliineq
• Nutarterineq
• Init ataatsimoorfiusut atornissaat ingerlanneqarnerilu
• Sunngiffimmi sammisassatut pilersitsineq


Immikkoortortaqarfimmi siulersuisunik qinersineq
Najugaqartut immikkoortortaqarfiani najugaqartut ukiumut ileqquusumik ataatsimiinneranni immikkoortortaqarfiup siulersuisussaanik qinersisassapput:
• Najugaqartut immikkoortortaqarfiani 500-t tungaanut amerlatigisunik inissiaqartumi siulittaasumik ataatsimik siulersuisunullu ilaasortanik marlunnik qinersisoqassaaq
• Najugaqartut immikkoortortaqarfiani 500-t sinnerlugit amerlatigisunik inissiaqartumi ilaasortat marlunnik amerlanerusut qinerneqarsinnaapput
• Tamatuma saniatigut siulittaasumut sinniisussamik siulersuisunullu ilaasortat sinniisussaannik ajornanngippat qinersisoqassaaq

Siulittaasoq imaluunniit siulersuisunut ilaasortat siulersuisuniinnertik pillugu akissarsinavianngillat.

Malugiuk
Siulersuisut ataatsimiinnerini INI-mit aallartitamik amerlasuutigut peqataasoqartarpoq.

Immikkoortortaqarfinni siulersuisut pikkorissarnissaannut ataatsimeersuartarnerannullu sapinngisamik INI-mit ikiuunniartoqartarpoq.

 

Immikkoortortaqarfimmi siulersuisut suliassai 

Immikkoortortaqarfiup ataatsimiinnerani immikkoortortaqarfimmi najugaqartut kissaatitik saqqummiussimasaat INI-mut ingerlateqqissallugit immikkoortortaqarfimmi siulersuisunit isumagineqartussaapput. Immikkoortortaqarfiup ataatsimiinnerani najugaqartut assersuutigalugu makku pillugit oqallissinnaapput:
• Najugaqartut immikkoortortaqarfianni iluarsaassineq teknikkimullu apeqqutit
• Najugaqartut immikkoortortaqarfiata aningaasaqarneranut najugaqartullu aningaasaataannut apeqqutit
• Immikkoortortaqarfimmi siulersuisut pikkorissarsinnaanerat assigisaanullu tunngasut
• Malittarisassanut pisariaqarpat ilassutissanik suliaqarneq

Immikkoortortaqarfiup siulersuisui ataatsimiinnermit imaqarniliornissamut akisussaaffeqarput. Immikkoortortaqarfiup atortussaanik najugaqartunut ingerlateqqitassanik allannissamut, nutserititsinissamut, naqiterinissamut agguaanissamullu INI-mit ikiuuttoqarsinnaakutsoorpoq.

 

Immikkoortortaqarfimmi siulersuisut tunngavii tallimat 

Immikkoortortaqarfimmi siulersuisunut ilaasortat tunngaviit tallimat aallaavigalugit sulisussaapput:
1. Aalajangiisarnissamut pilersaarusiortarnissamullu qinigaavutit – allaffissornikkut aqutsisussatuunngitsoq. INI taannaavoq allaffissornikkut aqutsisussaq
2. Najugaqartut tamaasa sinnerlugit sinniisussatut qinigaavutit – aamma avataaniit nuuttut ilanngullugit. Najugaqartut tamaasa soqutigisaat illersortussaavatit
3. Najugaqartut INI-mut attaveqaatigaatsit
4. Immikkoortortaqarfimmi sammisassanik aallartisaasartussatut inissisimassaatit. Imaanngilaq suliassat tamaasa nammineq suliarisassagitit. Suliassat najugaqartutut soqutiginnittunut suliakkiutigineqartarsinnaapput
5. Najugaqartut isummersuutaat isumaallu illit isummersuutitut isummattullu naleqartigimmata ilisimassavat takutittarlugulu, aamma naak immikkoortortaqarfimmi siulersuisuniikkaluaruit

Tunngaviit tallimaasut najugaqartut oqartussaaqataanerannik qulakkeerinnittussaapput.

 

Immikkoortortaqarfimmi ataatsimiittarnerit 

Najugaqartut oqartussaaqataanerat pitsaasumik ingerlanneqassappat immikkoortortaqarfimmi siulersuisunut ilaasortat najugaqartunik inerikkiartortussamik suleqatigiinnissaat taavalu qanimut tutsuiginartumillu attaveqartarnissaat pingaaruteqarluinnarpoq.

Immikkoortortaqarfimmi siulersuisut ukiumut ikinnerpaamik ataasiarlutik immikkoortortaqarfimmi ataatsimiittartussaapput, tassanilu illit peqataanissamut taamaalillutillu sunniuteqarnissamut periarfissaqarputit. Assersuutigalugu najugaqarfinni suut suliarineqassanersut aamma iluarsartuunneqassanersut sunniuteqaqataaffigisinnaavatit.

Immikkoortortaqarfiup ataatsimiinnissaanut aaqqissuussinerit najugaqartullu tamaasa aggersarnissaat immikkoortortaqarfimmi siulersuisunit akisussaaffigineqarput.

Aamma illit nammineerlutit immikkoortortaqarfimmi ataatsimiinnissamut suliniuteqarsinnaavutit. Immikkoortortaqarfimmi ataatsimiinnissaq ingerlakkusukkukku, illit:
• Najukkanni INI-p allaffeqarfia attavigissavat tassanngaanniillu ataatsimiigiaqqusinissamut ikiorneqarsinnaavutit
• Najugaqartut, INI aamma inimik piginnittoq ataatsimiinnissap pinissaa kingusinnerpaamik sapaatit akunneri sisamat sioqqullugit ataatsimiigiaqqusissaatit
• Inimik piginnittoq, INI aamma najugaqartut immikkoortortaqarfiani najugaqartut tamaasa isersinnaanissaat isumagissavat

 

INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Inip allaffeqarfii: Ataasinngornermiit tallimanngornermut 12.00 - 15.00
Oqarasuaat: Ataasinngornermiit tallimanngornermut 09.00 - 12.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl