INI-p inissiaataani attartortittakkami imeq aamma kiassarneq – Akiliuteqartarneq

INI-p inissiaataani attartortittakkami imeq aamma kiassarneq – Akiliuteqartarneq 

INI-p inissiaataa attartortittagaq tassaavoq pisortat inissiaataat attartortittagaq, Namminersorlutik Oqartussanit imaluunniit kommuninit pigineqartoq aammalu INI-mit aqunneqartoq. Tassa imaappoq INI-p inissiamut tunngasut nalinginnaasut isumagisarpai, assersuutigalugu imermut kiassarnermullu akiliuteqartitsineq, Nukissiorfiit sinnerlugit ukiumut ataasiarluni pisartoq.

Illut ataasiakkaat aamma illut affarleriit nutaanerit (inissiarsuarni inissiat aamma uigulukutsut) nalinginnaasumik namminerisaminnik imermut aamma kiassarnemut uuttuutinik peqartarput. Inissiamik namminerisamik uuttuuteqartumi najugaqaruit, illit imermut aamma kiassarnermut nammineq atukkatit qaammatit tamaasa Nukissiorfimmut toqqaannartumik akilertarpatit.

Illut affarleriit (inissiarsuarni inissiat aamma uigulukutsut) nutarterneqarsimanngitsut, namminerisaminnik imermut aamma kiassarnermut uuttuutinik peqarneq ajorput. Tamatuma kingunerisaanik inissiat ataasiakkaat imermik aamma kiassarnermik atuinerat uuttorneqarsinnaanngillat. Paarlattuanik illit atuinerpiannut akiliuteqarnissannut taarsiullugu imermut kiassarnermullu qaammatit tamaasa siumut akiliuteqartarputit.


Imermut kiassarnermullu siumut akiliuteqarneq
Imermut kiassarnermullu siumut akiliuteqaraangavit, qaammammut aningaasat aalajangersimasunik amerlassusillit akiliutigisassavatit:
  • Illit inissiarisavit angissusia aamma imermut akigititat aallaavigalugit imermut siumut akiliuteqarneq naatsorsorneqartarpoq. Imermut akigititat illoqarfimmit illoqarfimmut allanngorartarput aamma imermik atuineq inissianut immikkoortortaqarfimmiit inissianut immikkoortortaqarfimmut allanngorartarluni
  • Illit inissiavit angissusia aamma inissisimanera kiisalu kiassarnermut akigititat olie-llu akia aallaavigalugit kiassarnermut siumut akiliuteqarneq naatsorsorneqartarpoq. Kalaallit Nunaanni tamarmi kiassarnermut akigititat olie-llu akia assigiipput, taamaattoq atuineq kiassarnermut immikkoortortamiit kiassarnermut immikkoortortamut allanngorartarpoq

Imermut kiassarnermullu ukiumoortumik naatsorsuineq
Ukiup ingerlanerani imermik kiassarnermillu atuinermut annikippallaamik annertuallaamilluunniit akiliuteqarsimanersutit paasiumallugu, ukiumut ataasiartumik INI naatsorsuutinik suliaqartarpoq. Illit inissiaqarfivit immikkoortortaqarfiani tamakkiisuusumik imermik atuinera aamma illit kiassarnermut immikkoortortaqarfinni tamakkiisuusumik kiassarnermik atuinera, inissiat attartortittakkat assigiinngitsut angissusiinut agguataarneqarnerat tunngavigalugit naatsorsuutit suliarineqartarput. Tassa imaappoq tamakkiisuusumik atuinerup ilaanut inissiaq 120 kvadratmeter-iusoq inissiamit 90 kvadratmeter-iusumit annertunerusumik akiliuteqartussaavoq.

Tamatuma saniatigut inissiami qanoq sivisutigisumik najugaqarnikuunerit akiliuteqartitsinissami eqqarsaatigineqartussaavoq. Assersuutigalugu 2011-mi juni-mi anillutit nuussimaguit, 2011-mi januar-imiit juni ilanngullugu tamakkiisuusumik atuinermi illit atukkatit taamaallaat akilissavatit.

Kingusinnerpaamik april-ip 30-anni INI-mit allagarsissaatit, tassani allaqqassaaq illit inissiaqarfinnut aamma kiassarnermut immikkoortortaqarfinnut tamakkiisuusumik atuinermut tunngatillugu ukiup ingerlanerani annikippallaamik annertuallaamilluunniit akiliuteqarsimanersutit.


Akiliuteqaqqusineq aamma utertitsilluni akiliuteqarneq
Imermut imaluunniit kiassarnermut siumut akiliutit annikippallaartut akilersimagukkit, girokort-ikkut akiliiffissamik nassinneqassaatit aningaaserivimmi imaluunniit allakkerivimmi akiligassannik.

Imermut imaluunniit kiassarnermut siumut akiliutit annertuallaartut akilersimagukkit, aningaasat sinneruttut utertillugit ilinnut akilerneqassapput. INI-mut kinguaattoorutinik akiligassaqaruit aningaasanik ilinnut utertitsinneqarnissaat pilersinnagu taakku akilersinneqassapput,

Aningaasanik tunniussineq isumamineersumik aningaaserivimmi konto-nnut pissaaq. Taamaattumik konto normut najukkanni INI-p allaffeqarfianut tunniunnissaa pingaaruteqarpoq. INI-p illit konto-vit normua piginngikkuniuk, taarsiullugu ilinnut check nassiunneqassaaq. Najukkannit nuussimaguit INI-mut najukkat nutaaq taamaammat nalunaarutigissavat.
A/S INI
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl