airplanebooksbriefcase business cogs cross election entertainment fish house law lockmedicalpeopleselfservices socialtax

Qinnuteqarneq, utaqqisut allattorsimaffiat aamma iserterneq

Nalinginnaasumik paasissutissiineq 

INI-p inissiaataa attartortittagaq tassaavoq pisortat inissiaataat attartortittagaq, Namminersorlutik oqartussanit imaluunniit kommuninit pigineqartoq aammalu INI-mit aqunneqartoq. Tassa imaappoq, INI-p inissiamut tunngasut nalinginnaasut amerlasuut isumagisarpai, assersuutigalugu:
• Namminersorlutik Oqartussat aamma kommunit sinnerlugit ineqarnermut qinnuteqaatit isumagalugit
• Inissianut attartortittakkanut utaqqisut allattorsimaffiat malinnaaffigissallugu
• Namminersorlutik Oqartussat aamma kommunit sinnerlugit qinnuteqartunut inissianik attartortittakkanik tunniussinerit
• Qularnaveeqqutivit aqunneqarnissaa
• Inissiamut iserteruit inissiamik nakkutilliineq

Uani utaqqisut allattorsimaffiannut allatsinnermiit INI-p inissiaataanut attartortittakkamut iserternissavit tungaanut alloriarnerit ataasiakkaat qanoq pisarnersut pillugit atuarsinnaavatit.

 

Piumasaqaatit 

Pisortat inissiaataannut attartortittakkanut qinnuteqarniaruit 15-ileereersimassaatit. Kisianni aatsaat 18-ileereeruit inissiamik attartortittakkamik neqeroorfigineqarsinnaavutit – tassa imaappoq ulloq taanna 18-inik ukioqaleruit utaqqisut allattorsimaffianni sumi inissisimanerlutit aatsaat takusinnaavat.

 

Suliffimmut atatillugu ineqartitaaneq 

Pisortani aalajangersimasumik atorfeqartut ilaat suliffimmut atatillugu ineqartitaanissamut pisinnaatitaaffeqarput. Suliffimmut atatillugu ineqartitaanissamut pisinnaatitaaffeqaruit inissiamik inniminniisimanermut uppernarsaat sulisitsisuit INI-p najukkami allaffeqarfianut nassiutissavaa. Illit nammineerlutit suliffimmut atatillugu ineqartitaanissamut qinnuteqarsinnaanngilatit.

Malugiuk
Suliffimmut atatillugu ineqartitaanissamut ataasiaannarlutit neqeroorfigineqassaatit. Tassa imaappoq, suliffimmut atatillugu ineqartitaanissamut neqeroorfigitikkuit taannalu itigartikkukku, kingornatigut neqeroorfigiteqqissanngilatit, illillu ineqarnissat nammineerlutit isumagisariaqalerlugu.

 

Qinnuteqarneq 

Inimik attartortittakkamik qinnuteqarniaruit, immersuiffissaq Inimik attartortittakkamik qinnuteqarneq immersussavat.

Inimik attartortittakkamik qinnuteqarneq

Immersugassami ilaatigut allassavat:
• Inigisassaq qanoq angitigisoq initaarerusunnerlugu. Maluginiassavat inigisassap angissusaa inoqutigiit amerlassusaannut naleqqussagaassammat
• Inigisassaq sumiissanersoq
• Illoqarfik imaluunniit nunaqarfik sorlermi qinnuteqarniarnersutit

Qinnuteqarnissamut immersuiffissaq immersoreerukku najukkanni INI-p allaffeqarfianut tunniutissavat. Tamatuma kingorna utaqqisut allattorsimaffianiilernermut akitsuut akilissavat. Qinnuteqaatit INI-mut tunniukkukku girokortimik pissaatit taannalu aningaaserivikkut imaluunniit allakkerisarfikkut akilersinnaavat. Utaqqisut allattorsimaffiannut akitsuut akilereerukku, inimut attartortittakkamut utaqqisut allattorsimaffiannut ilanngunneqassaatit.

 

Utaqqisut allattorsimaffiat 

Utaqqisut allattorsimaffiannut allatsissaatit pissutigalugu illoqarfinni nunaqarfinnilu tamani inissianik attartortittakkanik iserterfigeriaannarnik soqannginnami. Utaqqisut allattorsimaffiannik aaqqiissuteqarnikkut sivisunerpaamik utaqqisimasoq siulliullugu inimik attartugassamik nammineq angissusissaa kissaatigalugu pissarsiarerusussimasaanik neqeroorfigineqassaaq.

Utaqqisut allattorsimaffiat qanoq takitiginersoq inuit inimik attartorusutaminnik ilittulli taama angitigisumik sumiiffimmi tassanerpiaq qanoq amerlatigisut kissaateqarsimanersut apeqqutaavoq.

Utaqqisut allattorsimaffianni sumut killinnersutit paaserusukkukku INI-p nittartagaatigut alakkarternianngikkukku najukkanni INI-p allaffeqarfia attaveqarfigisinnaavat.

Utaqqisut allattorsimaffiannut akitsuut
INI-p Namminersorlutik Oqartussat kommunillu sinnerlugit inissianut tunngatillugu aqutsisuupput. Ingerlatseqatigiiffimmut ataatsimut allatsinniaraanni utaqqisut allattorsimaffiannut akitsuut 100 koruuneqarpoq.

Assersuutigalugu Ilulissat illoqarfia tamaat pillugu allatsinniaruit, utaqqisut allattorsimaffiannut akitsuut 200 koruuneqarpoq, pissutigalugu tassani Namminersorlutik Oqartussat aamma kommunit inissiaateqaramik. Akerlianilli Nuup illoqarfia tamaat pillugu allatsinniaruit, utaqqisut allattorsimaffiannut akitsuut 100 koruuneqarpoq, tassami Namminersorlutik Oqartussat kisimik INI aqqutigalugu inissianik aqutaqaramik.

Ukiumut uppernarsaaqqittarneq
INI-p inissiaataannut attartortittakkanut qinnuteqarnerit uppernarsaqqinniarlugu ukiut tamaasa utaqqisut allattorsimaffiannut akitsuummik akiliisassaatit. INI-mit girokort allakkatigut ilinnut nassiussisoqartassaaq, taannalu aningaaserivikkut imaluunniit allakkerisarfikkut akiligassarivat.

Utaqqisut allattorsimaffiannut akitsuut akilinngikkukku utaqqisut allattorsimaffiani allassimajunnaarsinneqassaatit taamaalillutillu initaarniartutut inissisimajunnaarlutit. Taamaattumik allami najugaqalersimaguit INI-mut nalunaarutiginissaa pingaaruteqarluinnarpoq.

 

Allagarsiussineq takutitassiisarnerlu 

Inissiat attartortittakkat inuerussimasut inip allaffeqarfiini aamma INI-p nittartagaani takusassiarineqassapput.

Inissiamik qinnuteqarsinnaavutit "inissiat inoqanngitsut – qinnuteqarnissamut immersuiffissaq" immersorukku, taannalu ilaatigut ini.gl-ikkut nassaarisinnaavat.

Inissiamut inoqanngitsumut initaarsinnaasutut inissikkumallutit, inoqatigiissinni qaammatini kingullerni pingasuni akissarsiassi allagartaat takutissinnaasariaqarpatit.

Erseqqissaatigissavarput qinnuteqarniarussi utaqqisut allattorsimaffianniissimasariaqarpusi. Inissiamut qinnuteqartut arlaqarpata, utaqqisut allattorsimaffianni inissisimaneq malillugu inissiamik tunniussisoqartarpoq.
Aningaasatigut isertitasi malillugit ineqarnerut tapiissutisinissamut pisinnaatitaaffeqarussi qularnaveeqqutip naafferartumik akilersornissaa aaqqiissuteqarfigisinnaavarsi.
Saaffiginnissuteqarnikkut inissiaq alakkarterneqarsinnaavoq.

 

Iserternermi qularnaveeqqut 

Inissiamik attartortittakkamik tunisissimaguit, isertinnginninni qularnaveeqqummik akileeqqaassaatit. Qularnaveeqqutip akia inimut akiliutip qaammatinut pingasunut naligivaa. Qularnaveeqqut inissiamit aniguit iluarsaatassaqarpat taakku aningaasartuutaannut atorneqassaaq.

Aningaasartuutit tassaasinnaapput:
• Iikkat qilaallu qalipanneqarneri
• Nateq lakkerneqarluni
• Inissiami aserukkat iluarsaanneri, assersuutigalugu matu nutaaq imaluunniit iikkat putoorsimappata

Inissiamit anileruit INI-mit inigisat alakkarterneqassaaq. Tamatuma kingorna qularnaveeqqutit akilersimasat tamaat ilinnut utertinneqassanersoq nalilerneqassaaq imaluunniit inissiap iluarsartuunnerata ilaanut atorneqassanersoq nalilerneqassalluni.

Malugiuk
Qularnaveeqqut naafferartumik qaammatit 12-t tungaanut sivisutigisumik akilersorsinnaavat. Naafferartumilli akilersuiniaruit akitsuuteqarpoq. Akitsuut 500 koruuneqarpoq tamatumalu saniatigut naafferartumik akilersuinermut aaqqiissut qaammatit tamaasa 50 koruunit akilerneqartassapput.

Ukiumut 180.000 koruunit angunagit isertitaqartaruit, akitsuummik akiliissanngilatit.

 

Iserternermi nalunaarusiorneq amigaatinillu allattorsimaffik 

INI-p inissiaataanut attartortittakkamut iserteruit, INI-mit alakkarterisussarlu peqatigiillusi ajoqutaasinnaasunik misissuissaasi. INI-mit alakkartereqataasoq alakkarterineq pillugu nalunaarusiussaaq, tassanilu allassimassapput ajoqutaasinnaasut. Nalunaarusiap assilinera ilinnut tunniunneqassaaq, taannalu toqqussavat, tassami inimit anileruit atortussaavat.

Inissiaq iserterfiginiakkat illoqarfimmiikkuni nunaqarfimmiikkuniluunniit alakkarterisussaqarnani, inissiap arlaanik amigaateqaratarnissaanik misissuisussamik misissorneqarsimanani imaassinnaasoq iserterfigigit.

Amigaatit allattorsimaffiat
Ilaanni isertereernerup kingorna inissiami ajoqutaasinnaasunik amigaatinilluunniit siumuisoqarsinnaasarpoq. Inissiami ajoqutaasinnaasunik siumuiguit, amigaatit allattorsimaffiannut allassavatit, taannalu INI-p allaffeqarfianut tunniutissavat imaluunniit nassiutissavat.

Amigaatit allattorsimaffiat isertereernerpit kingorna kingusinnerpaamik ullut 14-it qaangiuppata INI-mut tunniunneqareersimassaaq.

Amigaatit allattorsimaffiat tunniussat INI-mit tiguneqareerpat, amigaataasut iluarsineqassanersut nalilerneqassaaq. Amigaataasut tamarmik iluarsineqarneq ajorput. Taamaattumik amigaatit allattorsimaffiat toqqornissaa pingaaruteqarpoq, tassami inimit aniguit atorsinnaavat.

 

INI A/S
Oqarasuaat: 70 10 00
E-mail: ini@ini.gl
Nittartagaq: www.ini.gl

Sisimiut - Qitiusumik allaffeqarfik
Mannarsip aqq. 20
Postboks 1020
3911 Sisimiut

Ammasarfii:
Oqarasuaat: Ataasinngornermiit tallimanngornermut 09.00 - 12.00

Inip allaffeqarfii: Ataasinngornermiit tallimanngornermut 12.00 - 15.00