Namminersorlutik Oqartussat inissiaataat attartortittakkat – Nalinginnaasumik paasissutissiineq

Namminersorlutik Oqartussat inissiaataat attartortittakkat – Nalinginnaasumik paasissutissiineq 

Inissiaq attartortittagaq tassaavoq assersuutigalugu inissiaq inissiarsuarmiittoq qaammammut ineqarnermut akiliuteqartarlutit inissiap piginnittuanit attartorsinnaasat. Namminersorlutik Oqartussat pisortat inissiaataannik attartortittakkanik amerlasuunik pigisaqarpoq. Taamaattorli Namminersorlutik Oqartussat namminneerlutik inissiat aqutarinngilaat. Kisiannili A/S Inissiaatileqatigiiffik INI Namminersorlutik Oqartussat inissiaataannik attartortittakkanik aqutsinermik ingerlatsinermillu isumaginnittussanngorlugu Namminersorlutik Oqartussat pilersissimavaat.

Kommunit Namminersorlutik Oqartussatulli inissianik attartortittakkanik pigisaqarput. Kommunit inissiaataat attartortittakkat A/S Inissiaatileqatigiiffik INI-mit, ingerlatseqatigiiffimmit aqutsinermik ingerlatsisumit allamit, soorlu Iserit A/S-imit imaluunniit kommunimit namminermit aqunneqarput.


Pisussaaffiit
Inissiamik attartortittakkamik Namminersorlutik Oqartussanit pigineqartumik attartornerup aalajangersimasunik pisussaaffeqalerneq malitsigisarpaa. Assersuutigalugu attartortutut pisussaavutit

  • piffissaq eqqorlugu ineqarnermut, imermut kiassarnermullu akiligassat akilissallugit
  • inissiaq attartukkat isumannaatsumik pitsaassuseqartissallugu aammalu sumiginnaanissaq pinaveersaassallugu. Tassalu inissiami qilaat qaqorsarnissaat, iikkat qalipannissaat tapet-ilersornissaalluunniit, kiisalu naqqit lakkernissaat illit akisussaaffigaat


Tamatuma saniatigut inissiani attartortittakkani tamani torersaarnissamut maleruagassat malittussaavatit. Assersuutigalugu

  • qimmeqaqqusaanngilatit qitsuuteqaqqusaanallu attartortitsisumit allakkatigut akuersissuteqaqqaarnak
  • nal. 8 sioqqullugu aamma nal. 19 kingorna sakkunik nipiliortunik atueqqusaanngilatit
  • imerpalasunik ikuallajasunik, soorlu benzin-amik, petrolium-imik, terpentin-amik lakkinillu peqqusivimmi ininiluunniit assigisaani uninngatitseqqusaanngilatit
  • A/S Inissiaatileqatigiiffik INI-mut isumaqatigiissuteqaqqaarnak piffissaatinnagu inissiamit attartukkannit nooqqusaanngilatit


Ikkussuinerit

Inissiami najukkanni aalajangersimasunik atortulersuinissaq pisinnaatitaaffigaat. Assersuutigalugu

  • errorsivimmik ikkussisinnaavutit
  • utoqqarnut innarluutilinnulluunniit ikiuutissanik ikkussuisinnaavutit


Inissiamili attartukkanni atortulersuilinnginninni allannguutissat A/S Inissiaatileqatigiiffik INI-mit akuerineqartussaapput.


Malugiuk
Attartortutut pisussaaffitit eqquutsinngikkukkit tamanna attartornivit atorunnaarsinneqarneranik kinguneqarsinnaavoq. Tassalu inissiamit attartukkannit anisitaasinnaavutit.

Inissiat attartortittakkat pillugit apeqqutissaqaruit A/S Inissiaatileqatigiiffik INI attaveqarfigisinnaavat. Tassanngaanniit makku pillugit paasissutissinneqarsinnaavutit:

  • Inissiaq attartukkat
  • Maleruagassat
  • Ineqarnermut akiliutit qanoq aalajangersarneqarsimanersoq

Allaaserisat attuumassutillit

INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl
Ineqarneq pillugu maalaarnissamut ataatsimiititaliaq
Postboks 689
3900 Nuuk

Oqarasuaat: (+299) 32 80 33
Fax: (+299) 32 88 29
E-mail: maalaarut@nanoq.gl
Nittartagaq: www.aua.gl

Ammasarfiit
Ulluni suliffiusuni 09:00 – 15:00