airplanebooksbriefcase business cogs cross election entertainment fish house law lockmedicalpeopleselfservices socialtax

Utoqqaat Angerlarsimaffiat "Qupanuk"

Qaqqaliartarfik 1, 3911 Sisimiut.
Oqarasuaat 86 48 77 - email: utoqqaat@qeqqata.gl

Utoqqaat Angerlarsimaffiat Qupanuk Qaqqaliartarfiup qaarpiaaniippoq immamut sammilluni avatangiisinullu kusanartumik isikkiveqarluni. Utoqqaat Angerlarsimaffiat 1983-imi sananeqarpoq kingornalu 2016-mi allineqarluni, ullumikkullu najugalinnut 42-nut inissaqarluni ataatsimillu qasuersaartarfeqarluni. Init paaqutarisarialinut, puigortunngortunut aammalu asseqqasumik immikkoortumik agguataagaapput. Taassuma saniatigut Utoqqaat Angerlarsimaffiat Ulluunerani ornittagaqarpoq, innuttaasunut illoqarfimmi najugalinnut kiisalu Utoqqaat Angerlarsimaffiani najugalinnut ullut tamaasa piffissami nal.:10:00 - 14:00 sammisassaqartitsiviusoq. Utoqqaat Angerlarsimaffiat Qupanuk najugaqartunut sisamanik sinniisuutitaqarpoq, qanigisanut suleqatigiissitaqarluni kiisalu 70-nik sulisoqarluni.

Utoqqaat Angerlarsimaffiat aammattaaq peqqinnissamut, inuussutissalerinermut allaffissornerullu iluani ilinniartunut ilinniartoqarfiuvoq. 2020-mi februar Utoqqaat Angerlarsimaffiata Qupanuk-p sulisut ilinniagaqarsimanngitsut 14-it ukioq ataaseq peqqinnissamut ikiortinngorniartussatut ilinniariartillugit nassiuppai, piginnaasaqarluartutut nalilerneqarsimasut Suliniut piginnaasaqarluartutut ineriartorneq (PKU) - ilinniagaqarsimanngitsunik qaffassaaneq aqqutigalugu. Sulinermik misiliinissat utoqqaat angerlarsimaffianni ingerlanneqassapput. Inaarutaasumik misilitsinnissat 2021-mi januaarip naanerani pissapput.

Ullumikkut Utoqqaat Angerlarsimaffiat suliniummut Issittumi Utoqqaliartortarneq (Arktisk Aldring) København-ip Universitetianik suleqateqarpoq, tassunga atatillugu Utoqqaat Angerlarsimaffiat inunnik pingasunik Psykomotorisk Terapeutitut ilinniartunik tigusaqarsimavoq.

Utoqqaat Angerlarsimaffiat inunnut qulingiluanut ilaasoqarsinnaasumik kaassuartakkanik atuisumut ataatsimut inissalimmik busseqarpoq, ulluunerani ornittakamukartut aasarlugit angerlaattarlugillu aamma asiartitsinermut atorneqartarluni aammalu najugaqartunut ullut tamaasa assartuutitut atorneqartarluni aamma isumaqatigiissuteqarsimasunut.

Utoqqaat angerlarsimaffianni kioski nammineq kajumissutsiminik ingerlanneqartoq sapaatip akunneranut marloriarluni akikilliliisarpoq.

Anguniakkat, takorluukkat naleqartitallu
Najugaqartuutitsinnut pitsaanerpaamik isumassuillutalu sullisserusuppugut, aammalu sulisunut suliffittut kajungernartoorusulluta.

Sulisunut neqeroorutigaarput naleqquttumik ilinniagaqartitsinissaq, taamaalilluta nutaanik ilisimasaqartuaannalerumalluta suliassanullu malinnaalluta.

Ataqqinninneq, inussiarnersuuneq aammalu akuersaarneq isumassuilluarluni passussinermut aallaaviupput, taakkualu ullut tamaasa Utoqqaat Angerlarsimaffianni Qupanuk-mi ingerlanneqartarput.

Peter Mattaaq. Utoqqaat Angerlarsimaffianni pisortaq. pema@qeqqata.gl.

Angalaarneq juli 2020. 

Asfaltilersuinnginnermi.

September 2020 nutaamik asfaltigaq.

Anaalerineq 2020.

Angerlarsimaffimmi sulisunik ilinniartitsineq juli 2020.

Josefsen pulaartoqarneq.

Najugaqartut sinniisaat 2020.