Utoqqaat angerlarsimaffiat aamma paaqqutarineqarluni angerlarsimaffik – Qinnuteqarneq

Utoqqaat angerlarsimaffiat aamma paaqqutarineqarluni angerlarsimaffik – Qinnuteqarneq 

  • Qeqqata Kommunia

    Qinnuteqarnermut immersuiffissaq ilanngussassallu allat kommunip utoqqarnut immikkoortortaqarfianut tunniutissavatit.

Aallaavittut isigalugu utoqqaat angerlarsimaffianniinnissaq aamma paaqqutarineqarluni angerlarsimaffimmiinnissaq 65-inik ukioqalereersimasunut annertunerusumik paaqqutarineqarnissamik immineq angerlarsimaffimmi tunniunneqartartumiit pisariaqartitsisunut tamanut neqeroorutaavoq. Utoqqaat angerlarsimaffiini aamma paaqqutarineqarluni angerlarsimaffinni najugaqartut tassani aalajangersimasumik najugaqartarput ulloq unnuarlu sulisoqartumi.


Qinnuteqarneq
Paaqqutarineqarnissamik inissamik qinnuteqarneq kommunimit suliarineqartarpoq. Kommunip angerlarsimaffimmi paarsisuanut, kommunimi sulianik sullissisunnut, napparsimavimmi uninngaguit sulisunut imaluunniit oqilisaanneqartaruit oqilisaanneqartarfimmi sulisumut aallaqqaammut nalinginnaasumik saaffiginnissaatit.

Utoqqaat angerlarsimaffiannut imaluunniit paaqqutarineqarluni angerlarsimaffimmut kommunimit pigineqartumut inissamik qinnuteqarniaruit, siuliini sulisut taaneqartut ilaat peqatigalugu qinnuteqarnissamut immersuiffissaq immersorsinnaavat. Immersuiffissaq kommunimi pissarsiarisinnaavat.

Qinnuteqarnermi immersuiffissamut ilanngussatut ilanngutissavatit:

  • Nakorsaatitortaruit, nakorsaatit allattorsimaffiat


Utoqqaat angerlarsimaffiannut imaluunniit paaqqutarineqarluni angerlarsimaffimmut inissamik utoqqaq nammineerluni qinnuteqassaaq. Utoqqaat angerlarsimaffiannut imaluunniit paaqqutarineqarluni angerlarsimaffimmut ilaqutaasut utoqqaq sinnerlugu qinnuteqarsinnaanngillat. Utoqqaq nammineerluni isummersinnaanngippat, assersuutigalugu pineqartoq puigortunngorsimappat, taava maleruagassat immikkut ittut atuuttarput. Kommunimi sulianik suliarinnittartoq aperiuk.


Nalilersuineq
Qinnuteqaatit kommunip tigoreerpagu, nalilersuinermut ataatsimiititaliap illit angerlarsimaffinni najugaqaannassanersutit imaluunniit utoqqarnut naleqqunnerusumik ilusilersugaq inissiaq naleqqunnerunersoq nalilersussavaa. Illit timikkut, tarnikkut peqqissutsit aamma inuttut inissisimanerit pingaartumik aalajangiisuussapput. Ikiorsiissutinik allanik pissarsinikkut, assersuutigalugu inissiap allanngortiternissaanut ikiorsiineq, atortut ikiorsiissutit, angerlarsimaffimmi ikiorti imaluunniit ulluunerani paaqqutarineqarnissamik neqeroorut, imminut isumagisinnaanersutit ilaatigut nalilersuinermut ataatsimiititaliamit pingaartinneqassaaq.


Utaqqisut allattorsimaffiat
Utoqqaat ataatsimoorlutik najugarfiinut, utoqqaat angerlarsimaffiinut aamma paaqqutarineqarluni angerlarsimaffinnut utaqqisut allattorsimaffii pigineqarsinnaasarput. Tamatuma kingunerisaanik inissamik erngersumik tunineqarnissat naatsorsuutigisinnaanngilat, naak nalilersuinermut ataatsimiititaliap inissamik innersuussimagaluaraatit. Inissaqanngippat utaqqisut allattorsimaffiannut allanneqassaatit. Utaqqisut allattorsimaffianni inissisimanerit tikkuussisuuginnassaaq, tassa utoqqaat angerlarsimaffianni imaluunniit paaqqutarineqarluni angerlarsimaffimmi inissaq pisariaqartitsinerpaamut neqeroorutigineqartarmat.

Inissamik utaqqinivit nalaani ikiorsiissutinik allanik neqeroorfigineqassaatit, illit ulluinnavit pitsaanerusumik ingerlanissaa piniassammat. Assersuutigalugu:

  • Eqqiaanissamut aamma inuttut eqqiluisaarnissamut angerlarsimaffimmi ikiorteqarneq
  • Nerisassanik pajunneqarneq
  • Orluffiusinnaasut mianerineqassapput
  • Ikiorsiissutit allat imaluunniit inissiap allanngortiternera

Allaaserisat attuumassutillit