Utoqqaat angerlarsimaffiat aamma paaqqutarineqarluni angerlarsimaffik – Nalinginnaasumik paasissutissiineq

Utoqqaat angerlarsimaffiat aamma paaqqutarineqarluni angerlarsimaffik – Nalinginnaasumik paasissutissiineq 

Utoqqaat angerlarsimaffiat imaluunniit paaqqutarineqarluni angerlarsimaffik tassaavoq kommunip ulloq unnuarlu paaqqinnittarfiutaa, tassani sulisut ulloq unnuarlu ikiuisinnaasarput. Ulluinnaat utoqqaat allat inuttut ilaginerannut, angerlarsimaffiup sulisuinut aamma ilaquttat ikinngutillu pulaarnerannut atorneqarnerusarput.

Ilutigisaanik najugaqartutut ulluinnarni sammineqartartunut assigiinngitsunut ilaasinnaavutit, kisimiinnissamik eqqissisimaarnissamillu pisariaqartitsiguit, taava najugaqartut tamarmik immikkut ineqartinneqarput.

Utoqqaat angerlarsimaffiannut nuukkuit, pequtivit ilaasa nassarnissaannut periarfissaqarputit. Nammineerlutit pequteqanngikkuit inimik pequtsersukkamik pissarsissaatit, utoqqaallu angerlarsimaffiata siniffik paaqqutarineqarfissaq aammalu siniffiup nerrivia aammalu saagut pisariaqartitsineq malillugu tunniussinnaavai.


Piumasaqaatit
Utoqqaat angerlarsimaffiat aamma paaqqutarineqarluni angerlarsimaffik tassaavoq utoqqaat soraarnerussutisiallit tamarmik kiisalu inersimasut siusinaartumik soraarnerussutisiallit najugaqarfigisinnaasaat, paaqqutarineqarnermik annertunerusumik pisariaqartitsisut, namminneq angerlarsimaffimminni pisinnaanngisaminnik. Tassa imaappoq:

  • Soraarnerussutisiallit, maannamut inigisaminni angerlarsimaffimmi ikiortimit tapersersorneqarlutik imminnut isumagisinnaanngitsut
  • Soraarnerussutisiallit, maannamut inigisaminni imaluunniit najukkaminni inuiaqatigiinni imminnut isumagisinnaanngitsut
  • Soraarnerussutisiallit, ukioqqortunertik pissutigalugu ima sanngiitsigilersimasut, ulluinnaat ingerlasinnaaniassappata ikiorserneqarnissamik pisariaqartitsisut
  • Soraarnerussutisiallit puigortunngornermik nappaatillit


Matuma saniatigut ukioqqortusereernissamik piumasaqaammik naammassinninngitsut, taamaattoq utoqqaat angerlarsimaffianni imaluunniit paaqqutarineqarluni angerlarsimaffimmi piumasaqaatinik siuliini taaneqartunik naammassinnissimagaluartut siusinaartumik soraarnerussutisiallit inuusunnerit aamma inissamik pissarsisinnaasarput.

Innarluutillit inuusuttut tarnikkut innarluuteqartut, kommunip utoqqarnut angerlarsimaffiutaanni imaluunniit paaqqutarineqarluni angerlarsimaffiutaani inissamik pissarsisinnaanngillat.


Akiliuteqarneq
Utoqqalinermi soraarnerussutisianik imaluunniit siusinaartumik soraarnerussutisianik pisartagaqaruit aamma utoqqaat angerlarsimaffiannut imaluunniit paaqqutarineqarluni angerlarsimaffimmut nuullutit, qaammammi nuuffiusumi qaammatillu tulliani soraarnerussutisiatit allanngortinnagit pissarsiarissavatit. Tamatuma kingorna soraarnerussutisialimmut imaluunniit siusinaartumik soraarnerussutisialimmut ataatsimut aningaasat tunniunneqartartut 20 %-iata nalinga kaasarfimmiussatut pissarsiarisalissavaat. 2012-mi taakku ima amerlatigaat:

  • Qaammammut 2.058 kr., utoqqalinermi soraarnerussutisiaqaruit
  • Qaammammut 1.667 kr., siusinaartumik soraarnerussutisiaqaruit


Utoqqalinermi soraarnerussutisiavit imaluunniit siusinaartumik soraarnerussutisiavit saniatigut akileraarutaasussanik isertitaqartaruit, utoqqaat angerlarsimaffianni aamma paaqqutarineqarluni angerlarsimaffimmi najugaqarnermut tamakkiisuusumik ilaannakortumilluunniit akiliuteqartarnissat piumasarineqarsinnaavoq. Taamaattoq soraarnerussutisiavit saniatigut akileraarutaasussamik isertitavit, akileraareerluni 60 %-iat sinnerlugu akiliuteqartinneqartussaanngilatit.

Tjenestemand-iusimasut soraarnerussutisiallit tjenestemand-itut soraarnerussutisiamik 60 %-iat tikillugu najugaqarnerminnut akiliutigisartussaavaat.

Allaaserisat attuumassutillit