airplanebooksbriefcase business cogs cross election entertainment fish house law lockmedicalpeopleselfservices socialtax

Danmarkimi angerlarsimaffiup avaanut inissiineq

Nalinginnaasumik paasissutissiineq 

Meeraq imaluunniit inuusuttoq ineriartorneranut atugarisaanullu navianartorsiortinneqarluni inuuneqartitaaguni taamaattumillu ikiorneqarnissamik pisariaqartitsilluni, kommune iliuuseqarnissamut pisussaaffeqarpoq.

Meeraq imaluunniit inuusuttoq Kalaallit Nunaata avataani angerlarsimaffiup avataanut inissinneqassasoq pisariaqalersinnaavoq:
• Kalaallit Nunaanni ikiuinissamut katsorsaanissamullu periarfissaarulluinnarsimappat
• Meeqqap ineriartoqqinnissaa qulakkeerniarlugu angerlarsimaffiup avataanut immikkut ittumut inissiinissaq pisariaqalerpat.

Kommune isumaqarpat imaluunniit illit angajoqqaajusoq isumaqaruit meeraq imaluunniit inuusuttoq Kalaallit Nunaata avataani angerlarsimaffiup avataanut inissinneqartariaqartoq, Ilaqutariinnermut Inatsisinillu Atuutsitsinermut Naalakkersuisoqarfimmut qinnuteqaateqartoqassaaq.

Kalaallit Nunaata avataani angerlarsimaffiup avataanut inissiineq aamma angajoqqaat akuersiteqqaarnagit pisinnaavoq. Allakkatigut aalajangiineq tunngavilersuutitalik aamma naammagittaalliuteqarnissamut ilitsersuut pissallugit pisinnaatitaaffeqarputit.

Meeqqat Danmarkimi najugaqareersut angajoqqaatik qimallugit allami najugaqarnissaat pitsaanerpaajusoq kommunip nalilerpagu, aamma angerlarsimaffiup avataanut inissinneqarsinnaapput.

 

Meeqqap Danmarkimi pisinnaatitaaffii 

Meeraq Danmarkimi angerlarsimaffiup avataanut inissinneqarsimappat, Kiffartuussinermut inatsimmi nassuiarneqartut naapertorlugit meeraq imaluunniit inuusuttoq arlalitsigut kommunimit ikiorneqarnissaanut kommune pisussaaffeqarpoq.

Danmarkimi meeqqat angerlarsimaffiup avataanut inissinneqarsimasut pisinnaatitaaffii pillugit paasissutissat atuakkit uani

 

Qinnuteqarneq 

Kommune isumaqarpat imaluunniit illit angajoqqaajusoq isumaqaruit meeraq imaluunniit inuusuttoq Kalaallit Nunaata avataani angerlarsimaffiup avataanut inissinneqartariaqartoq, Ilaqutariinnermut Inatsisinillu Atuutsitsinermut Naalakkersuisoqarfimmut qinnuteqaateqartoqassaaq.

Qinnuteqaammut allagaatit assigiinngitsut arlallit ilanngunneqassapput:
• Isumaginninnermut Ataatsimiititaliap akuersissutaa taavalu Ilaqutariinnermut Inatsisinillu Atuutsitsinermut Naalakkersuisoqarfimmut allagaqaat
• Iliuusissatut pilersaarut
• Angajoqqaatut oqartussaassuseqartup akuersissutaa
• Angajoqqaatut akisussaatitaasoqarsimappat eqqartuussivimmit uppernarsaat
• Kalaallit Nunaanni periarfissaarulluinnarsimasoq pillugu uppernarsaat
• Angerlarsimaffiup avataanut inissiivik pillugu nassuiaat
• Angerlarsimaffiup avataanut inissiivimmit akuersineq

Danmarkimi angerlarsimaffiup avataanut inissiineq pillugu paasissutissat atuakkit uani

Malugiuk
Meeqqap imaluunniit inuusuttup sumiiffissaa isumaginninnermi perorsaanikkut katsorsaavittut naleqqussagaasimassaaq.

Meeraq imaluunniit inuusuttoq ukiumut marloriarluni feeriarnermut atatillugu angalasinnaatitaavoq, tassa angajoqqaajusut namminneq akiliisinnaanngippata aamma meeqqap atugaqartitaaneranut akerliunngippat. Pisut immikkut ittut ilaanni angalanerit ilaneqarsinnaapput, assersuutigalugu qaniginerpaasani toqusoqarsimatillugu.

 

Meeqqanik Danmarkimi najugaqartunik angerlarsimaffiup avataanut inissiineq 

Kommune isumaqaruni meeraq angerlarsimaffimmini atugarliortitaasoq, danskit aamma kalaallit kommunii meeqqamik angerlarsimaffiup avataanut inissiisinnaapput.

Meeraq Danmarkimi najugaqartoq angerlarsimaffiup avataanut inissinneqarpat, ima paasineqassaaq meeraq angajoqqaat qimallugit allami najugaqarnissaq pitsaanerpaasoq kommunimit nalilerneqarsimavoq.

Danmarkimi angerlarsimaffiup avataanut inissiineq tassaavoq, meeqqat inuusuttullu allatulli inuttut ineriartornissamut, peqqinnissamut inersimasutullu namminersorluni inuuneqarnissamut periarfissaqarnissaq anguniarlugu tapersiineq. Meeraq angerlarsimaannarnermini inuuneranut ajorluinnartumik kinguneqarnissaa kommunimit ernummatigineqarpat aatsaat meeraq angerlarsimaffiup avataanut inissinneqassaaq.

Meeraq angerlarsimaffiup avataanut inissinniarlugu kommunimit qulakkiigassat tassaapput:
• Meeqqap imaluunniit inuusuttup immikkut tapersersorneqarnissaminut pisariaqartitsineranut pingaaruteqarluinnartuusoq
• Meeqqat pillugit suliaqarnikkut misissuineq tunngavigalugu ajornartorsiutinik pisariaqartitanillu iluarsiinissamut iluarsiissutissaq pitsaanerpaaq toqqarneqarsimassaaq


Akuersissutitaqanngitsoq
Angajoqqaatut oqartussaassuseqartut imaluunniit inuusuttut 15-ileereersimasut akuersiteqqaarnagit pisut immikkut ittut ilaanni Danmarkimi Meeqqanut Inuusuttunullu Ataatsimiititaliap aalajangersinnaavaa meeqqat inuusuttullu angerlarsimaffiup avataanut inissinneqassasut.

Meeqqanut Inuusuttunullu Ataatsimiititaliap meeqqap agnerlarsimaffiup avataanut inissinneqarnissaata aalajangiiffiginissaa pitinnagu, meeqqap imaluunniit inuusuttup peqqissusaa imaluunniit ineriartornera ajorluinnartumik navianartorsiortinneqartoq ersarissuunissaa takussutissaqaqqaassaaq makku tunngavigalugit:
• Naammanngitsumik pineqarneq imaluunniit isumassorneqarneq
• Kannguttaatsuliorfigitinneq
• Meeqqamik atornerluineq, pinerlunniarfigitinneq imaluunniit allatigut isumaginninnermi ajornartorsiuteqarneq
• Pissusilersornermik imaluunniit naleqqussarnermik ajornartorsiuteqarneq

Pisariaqartillugu
Meeraq angerlarsimaffiup avataanut inissinneqassaaq kommunip nalilerpagu pisariaqarluinnartoq. Meeqqap angerlarsimaffiup avataanut inissinneqaqqanissaa pisariaaruttoq imaluunniit meeraq 18-iliippat meeraq angerlaqqissinnaavoq.

 

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Isumaginninnermut, Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iian@nanoq.gl
Nittartagaq: www.naalakkersuisut.gl