Meeqqat inuusuttullu ikiortariallit – Ikiorsiinermik suliniutit

Meeqqat inuusuttullu ikiortariallit – Ikiorsiinermik suliniutit 

Ikiorsiinermik suliniutit tassaapput kommunip meeqqanut inuusuttunullu immikkut pisariaqartitsisunut tunniussinnaasai. Ikiorsiineq ilaqutaasunut tamanut meeqqamuinnarluunniit tunniunneqarsinnaavoq. Meeqqat ataasiakkaat immikkut ittumik pisariaqartitaannut ikiorsiineq naleqqunnerpaaq atorneqartussaq kommunip toqqartarpaa.

Ikiorsiinermik suliniutinik aallartitsinissaq sioqqullugu, meeqqat imaluunniit inuusuttup ilaqutaasalu atugaannik misissuinermik ingerlatsikkajuttoqartarpoq.

Ikiorsiineq neqeroorutigineqartoq meeqqamut, inuusuttumut ilaaqutaanullu pitsaanerpaasussaavoq.

Angerlarsimaffimmi aamma angerlarsimaffiup avataani ikiorserneqarnissamut periarfissaqarpoq. Tamatumani ikiorsiinermik suliniutit assigiinngitsut pigineqarput. Ikiorsiinermik suliniutit taakku nalinginnaasumik ilaqutaasut suleqatigalugit aallartinneqartarput. Suliniutit assersuutigalugu tassaasinnaapput:


Inuttut siunnersorti
Inuttut siunnersorti tassaavoq inuk aalajangersimasumik killilikkani suliassaqarfinni meeqqamik aamma ilaqutaasunik ikiuisartoq. Tamakku tassaasinnaapput, siunnersuineq aamma ilitsersuineq imaluunniit meeqqamut inuusuttumulluunniit tapersersuineq. Siunnersuisoq tassaavoq kommunip, angajoqqaat minnerunngitsumillu meeqqap inuusuttulluunniit inuk tatigisaat. Siunnersorti nukissaqarluartuussaaq aamma meeqqap inuusuttulluunniit pisariaqartitaannik isumaginninnissamut piumassuseqartuussalluni. Inuit taamak suliaqarnissamut immikkut piginnaasaqartut inuttut siunnersortitut toqqarneqartarput.


Ulluunerani paaqqinnittarfimmiinnissamut tassanngaannartumik inissaq
Ulluunerani paaqqinnittarfimmi tassanngaannartumik inissaq tassaavoq, paaqqinnittarfimmiinnissamut utaqqisunut allattorsimaffik avaqqullugu maannakkumiit meeqqap inissamik tunineqarfia. Meeraq immikkut ittumik tapersersorneqarnissamik atorfissaqartitsiguni, ulluunerani paaqqinnittarfimmi tassanngaannartumik inissamik tunineqarsinnaavoq. Tamanna pisinnaavoq, assersuutigalugu meeqqap nalinginnaasumik ineriartornissaa illersorumallugu tapersersorniarlugulu.


Angerlarsimaffimmi ikiortit
Angerlarsimaffimmi ikiorti tassaavoq inuk ilaqutariit angerlarsimaffiannukartartoq, meeqqap avatangiiserisaani ilaqutaasunik meeqqamillu suleqateqartussaq. Angerlarsimaffimmi ikiortip assersuutigalugu ilaqutariit nalinginnaasumik ullunik tulleriiaarisinnaalernissaannut, meeqqanik killiliisinnaalernissaannut sinaakkusiisinnaalernissaannullu ikiorsinnaavai kiisalu atuarfimmut, ulluunerani paaqqinnittarfimmut imaluunniit meeqqanik peqqissaasumut attaveqarneranni ikiorlugit.


Ilaqutariinnik katsorsaaneq
Ilaqutariinnik katsorsaaneq ikiorsiinermik suliniutaavoq, perorsaanermi ilaqutariinnermilu ajornartorsiutinik oqilisaaqataasussaq. Tamanna pisinnaavoq assersuutigalugu:

  • ulloq unnuarlu paaqqinnittarfiup ilaqutariinnut immikkoortortaani najugaqarnikkut
  • ullormut neqeroorutitut ilaqutariinnut sullissiveqarfimmi siunnersorneqarnikkut aamma ilitsersorneqarnikkut
  • angajoqqaat pikkorissarnerisigut
  • meeqqap avangiisinut sullissisumik ilaqartittalerneratigut


Ilaqutariit oqilisaassisartut
Meeqqap timiminik atuisinnaassuseqarnera appasippat imaluunniit eqqarsartaatsikkut pisinnaasai appasillutilluunniit inuttut ajornartorsiuteqarpat, angajoqqaat oqilisaanneqarnissamik qinnuteqarsinnaapput. Oqilisaassinerup ilaqutariit ulluinnarni eqqissisimaffissamik atugassissavai, taamaalilluni ilaqutariit ataatsimoornissaannut ilaqutaasut nukissaqalerlutillu ikiuussinnaalerniassammata. Oqilisaassineq piffissami sivikitsumi ingerlanneqakkajuppoq, ukiulli arlerlugit atuuttussatut neqeroorutigineqarsinnaalluni.


Suliniuteqareernermi malinnaaneq
Meeraq assersuutigalugu meeqqat angerlarsimaffianni najugaqarsimappat ilaquttaminullu angerlaqqittussanngorluni, ilaqutariit suleqatigineqarnerat aaqqissuunneqarluni aallarnerneqassaaq, tamatumani ilaqutariinnut akuleruteqqinnerup pitsaanerpaanissaa qularnaarumallugu. Taanna taaneqartarpoq suliniuteqareernermi malinnaaneq.


Peqqissutsimut tunngasutigut suliniuteqarneq
Peqqissutsimut tunngatillugu suliniuteqarneq tassaavoq ikiorsiinermik suliniut, meeqqap peqqissutsiminut atatillugu ikiorneqarnissamik pisariaqartitsineranik takussusiisussaq. Tamatumani pineqarput eqqarsartaatsimut aamma timimut tunngassutillit. Tamanna pisinnaavoq assersuutigalugu, nalinginnaasumik nakorsamik misissortinnikkut, tarnip pissusaanik napparsimmavimmut unitsinneqarnikkut imaluunniit kigutileritinnermut aaqqissuussineq.


Tarnip pissusaanik ilisimasalimmit ikiorserneqarneq (imaluunniit nunaqarfinni pigineqanngippat ilaqutariinnut sullissivimmut innersuunneqarneq)
Tarnip pissusaanik ilisimasalimmit ikiorserneqarneq, tarnip pissusaanik ilisimasalimmik ataasiarluni arlaleriarluniluunniit oqaloqateqarnermik ilaqarpoq. Meeqqanut inuusuttunullu sakkortuunik misigisaqarsimasunut, assersuutigalugu atorneqarlunneqarsimallutik, tarnip pissusaanik ilisimasalimmit ikiorsiisoqartarpoq. Meeqqap atornerlunneqarsimasup angajoqqaavinut aamma tarnip pissusaanik ilisimasalimmit ikiorsiisoqarsinnaavoq.


Malugiuk
Ikiorsiinermik suliniutit allat, meeqqap ilaqutariillu pisariaqartitaannik aamma aallaaveqartut, aallartinneqarsinnaapput. 

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iniian@nanoq.gl
Nittartagaq: www.naalakkersuisut.gl