Kalaallit Nunaanni Naligiissitaanissamut Siunnersuisoqatigiit

Nalinginnaasumik paasissutissiineq 

Kalaallit Nunaat 2003-miilli naligiissitaanissamut inatsiseqarpoq pingaartutigut qulakkeerinnittumik inuit kikkulluunniit suiaassutsiminnik tunngaveqartumik immikkoortitaannginnissaannik.

Naligiissitaanissamut Inatsit 2013-imi nutarterneqarpoq, ullumilu inatsisip imarai naligiissitaanissamut tunngasinnaasut tamaasa, nutaatullu kinguaassiuutitigut innimiillisaarnerit pinerluttuliornertut isigineqalerlutik. Inatsisittaaq allanngortinneratigut naligiissitaanissamut siunnersuisoqatigiit pisussaaffi sukaterneqarput.

Siunnersuisoqatigiit suliassaat 

Naligiissitaanissamut Siunnersuisoqatigiit suliassaraat inuiaqatigiinni kalaallini angutit arnallu naligiinnissaat siuarsassallugu. Naligiissitaanissamut Siunnersuisoqatigiit qinnuigineqarlutik namminneerlutilluunniit misissussavaat pissutsit naligiissitaanissamut tunngasut.

Kalaallit Nunaanni Naligiissitaanissamut Siunnersuisoqatigiit politikkimut attuumassuseqaratik siunnersuisuupput, taamaattumillu pisortat oqartussaaffeqarfiisa arlaannaannulluunniit pituttorsimanatik namminneerlutik sulillutik. Taamaalillunissaaq qulakkeerneqarpoq Kalaallit Nunaanni Naligiissitaanissamut Siunnersuisoqatigiit politikkikkut anguniakkanit sunilluunniit sunnerneqarsinnaannginnerat.

Naligiissitaanissamut Siunnersuisoqatigiit suliassaraat:
  1. Inatsisip atuutsinneranik nakkutilliineq inuiaqatigiinnullu qanoq siammarterneqarnissaa
  2. Naalakkersuisunit aperineqarnermikkut oqaaseqaateqarnissaq, takukkit §§ 16. – 17. Oqaaseqaatit kikkunnilluunniit takuneqarsinnaassapput
  3. Paasissutissiinernik oqallitsitsinernillu aallartitsissallutik
  4. Pisortat ingerlatsiviinut suliffeqarfiinullu, namminersorlutik suliffeqarfinnut inuiaqatigiinnilu innuttaasunut ataasiakkaanut siunnersuisuussallutik

Naligiissitaanissamut Siunnersuisoqatigiittaaq ukununnga pisinnaatitaapput:
  1. Pisortat suliffeqarfiini naligiissitaanissamut sinniisorisat ikiorsissallugit
  2. Naligiissitaanissamut iliuusissanik pisortanut il.il. isumassarsiorlutillu siunnersuusiussallutik
  3. Paasissutissiissallutik suiaassusermut atatillugu ileqqutoqqat immikkoortitsinertallit allanngortinnissaannik siunertaqartumik
  4. Pisortat suliffeqarfii kattuffiilu suleqatigissallugit suiaassusermik tunngavilimmik persuttaanerit akiorniarlugit
  5. Suliffeqarnermi assigiimmik akissarsiaqarnissaq sorsuutigissallugu suiaassuserlu tunngavigalugu immikkoortitsinerit ajornartorsiutaasinnaasut allat akiorniassallugit

Siunnersuisoqatigiit 

Naligiissitaanissamut Siunnersuisoqatigiinnut ilaasortaapput siulittaasoq Naalakkersuisuniit toqqagaq, ilaasortallu arfinillit katuffinnut suliffeqarfinnullu assigiinngitsunut sinniisuusut. Sulisitsisut sulisitallu Sulinermik Inuussutissarsiuteqartut Kattuffiat (SIK) aamma Atorfillit Kattuffiat (AK), arnat suleqatigiiffii, angutit suleqatigiiffii aamma NGO-t aqqutigalugit ilaasortanik toqqaasarput.

Naligiissitaanissamut Siunnersuisoqatigiit 2015 – 2018-imilu 

Kalaallit Nunaanni Naligiissitaanissamut Siunnersuisoqatigiit piffissami 2015-imiit 2018-imut ingerlanerani sammisassat pingaarnerit ilaattut siunniuppaat:
  • Angutit nunatsinni inissisimanerisa ersarissaavigineqarnissaat.
  • Siunnersuisoqatigiit suliaminni pingaarnerpaatut ilaattut sammerusussimavaat angutit nunatsinni inuiaqatigiinni inissisimanerat - ilinniagaqassutsikkut, ilaqutariinni inuunerat suliffeqarnikkullu
  • Arnat suiaassusermut tunngatillugit eqqarsartaatsimikkullu, arnallu inuiaqatigiinni tamat oqartussaaqataaneranik tunngavilimmi tunuarsimaarlutik inissisimanerat

Naammagittaalliuuteqarneq 

Naligiissitaanissamut Siunnersuisoqatigiit namminneq piumassutsiminnik qinnuigineqarlutilluunniit misissorsinnaavaat pissutsit naligiissitaanissamut tunngasut. Taamaattorli naligisiissitaanissamut inatsisip Siunnersuisoqatigiit inatsisitigoortumik pisinnaatinngilai pisortatigoortumik maalaartarfittut, naak tamanna nunani avannaamioqatigiinni pissusiugaluartoq.

Kalaallit Nunaanni immikkut maalaartarfeqanngilaq assigisaanilluunniit nammineerluni akisussaaffilimmik aaqqissuussiveqarani immikkoortitsinermik allaffissornikkut sullissisinnaasumik, naak tamanna EU-p inatsisiliamini immikkoortitsinermut tunngasuni ilaatikkaluaraa: Utoqqaassuseq, suiaassuseq, kikkunnit kingoqqineq kinaassuserlu, upperisaq kiisalu suiaassutsikkut kajungerisaq.
Tassa suiaassuseq najoqqutaralugu naligiissitaanissamut immikkoortitsinerit immikkoortitsinermilluunniit ajornartorsiutit allat pillugit Kalaallit Nunaanni Naligiissitaanissamut Siunnersuisoqatigiit aqqutigalugit allaffissornikkut periarfissaqanngilaq naammagittaalliornissamut.
Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Kalaallit Nunaanni Naligiissitaanissamut Siunnersuisoqatigiit
Issortarfimmut 1A
3900 Nuuk

Oqarasuaat: (+299) 34 66 79
Mobil: (+299) 48 22 12
E-mail: nali@nali.gl
Nittartagaq: www.nali.gl