airplanebooksbriefcase business cogs cross election entertainment fish house law lockmedicalpeopleselfservices socialtax

Iluaqusersuutit angallatillu

Nalinginnaasumik paasissutissiineq 

Ulluinnarni nalinginnaasumik suliassat annikitsut annertuumik innarluuteqartuusunut suliarissallugit ajornakusoorsinnaapput. Taamaattumik illit annertuumik innarluuteqartuuguit angerlarsimaffimmi iluaqusersuutinut assigiinngitsunut tunngatillugu ikiorneqarnissamut kommunimut qinnuteqarsinnaavutit.

Inuit annertuumik innarluuteqartuusut ilaannut angerlarsimaffiup avataani angalaniarneq ajornakusoortarsinnaavoq. Taamaattumik tamat angallataannik angallanneqarnissaq pinngitsoorsinnaaneq ajorpaat, taamaakkaluartut sumi tamani tamat angallataannik soqanngilaq. Taamaattumik qamutinik angallanneqarnissamullu aaqqiissutinik qinnuteqarnissamut periarfissaqarputit.

Iluaqusersuuteqarnermi qamutinillu angallateqarnermi ilaatigut nammineernerunissaq inuunermillu pitsaanerusumik atugaqarnerunissaq anguniagaavoq.

 

Iluaqusersuutit assigiinngitsut 

Iluaqusersuutit tassaapput atortut imaluunniit ikiorsiissutit immikkut ittut innarluuteqarninnut ajornaallisaataasussat.

Iluaqusersuutit ilinnut atugassanngortinneqarsinnaasut tassaasinnaapput:
• Issiavik kaassuartagaq
• Kivitsissut
• Atisat immikkut ittut, imaluunniit inuttut atuassat allat
• Rollatori
• Siniffik atortorissaarutilik
• Pequtit immikkut sanaat

Angerlarsimaffimmi atugassat nalinginnaasut pillugit qinnuteqarsinnaanngilatit, soorlu støvsugi, pequtit nalinginnaasut aamma igaffimmi atortut nalinginnaasut.

 

Qamutit atortut assigiinngitsut 

Qamutit atortut atorlugit angerlarsimaffiit qimallugu angallatigisinnaavatit taamaalillutillu innarluuteqarninnut ajornaallisakkatut atugaralugit.

Qamutit angallataasartut ilinnut atugassanngortinneqarsinnaasut tassaasinnaapput:
• Scooteri innaallagiatortoq
• Issiaviit kaassuartakkat innaallagissamik ingerlatillit
• Knallertit pingasunik assakaasullit
• Motorcykelit nunakkoorutaasinnaasut
• Snescooterit

Biili ilinnut atugassanngortinneqarsinnaanngilaq. Illilli nammineq biilimik pisiguit atorsinnaaniassagakku innarluutinnut tulluarsarlugu suliaritinnissaanut tapiiffigineqarsinnaavutit.

Assersuutigalugu makkununngaasinnaavoq:
• Geariata nuuttarnissaanut nutaanik ikkussineq
• Tigummivinnik toortagassanillu nuussineq

Qamutinik angallatsittarnissamut aaqqiissutit
Immikkut pisariaqartinneqassappat, inuit annertuumik innarluutillit angallanneqartarnissaannut kommune aaqqiissusiorsinnaavoq.

Aamma inuk annertuumik innarluutilik taxamik angallanneqarnissaanut aningaasatigut kommune ikiuussinnaavoq.

 

Piumasaqaatit 

Iluaqusersuutinik imaluunniit qamutinik angallatinik atugassaqarnissamut akuerisaaniaruit piumasaqaatinik naammassinneqqaassaatit.

Iluaqusersuutit
Iluaqusersuutinik pisinnaavutit imaattoqassappat:
• Ajornartorsiutinut innarluutinnut toqqaannartumik attuumassuteqartunut iluaqutaappat
• Inatsit alla naapertorlugu ikiorserneqarsinnaanngikkuit
• Sullissisut naliliippat pisariaqartitsisutit pinissamullu pisinnaatitaasutit

Iluaqusersuutit nalinginnaasumik kommunimit akilerneqartarput. Tamanna ima paasisassaavoq, iluaqusersuutit tunniunneqartut kingusinnerusukkut utertitassanngorlugit atukkiunneqarput. Piffissap ingerlanerani iluaqusersuutit pisariaqartikkunnaarukkit kommunimut utertissavatit. Taamaaliornikkut allat iluaqusersuutinik pisariaqartitsisut atorsinnaaniassammatigit.

Qamutit angallatit
Qamutinik angallatinik pisinnaavutit taamaallaat:
• Inuit innarluutillit pillugit peqqussutaat naapertorlugu kiffartuunneqartuuguit
• Innarluuteqarnerit peqqutaalluni inigisavit avataani angalanissamut ajornakusuussappat
• Najukkanni imaluunniit angallavigisassanni tamat angallattaat imaluunniit taxat atorlugit angalasinnaanngikkuit

 

Qinnuteqarneq 

Iluaqusersuutinik imaluunniit qamutinik angallatinik qinnuteqarniaruit, sullissisut attavigissavat. Sullissisup ikiorlutit iluaqusersuutit imaluunniit qamutit angallatit sorliit pisariaqartinneritit paasiniarneqarsinnaapput, aamma kingusinnerusukkut kommunimut nassiussassannik imaluunniit tunniussassannik qinnuteqaammik suliaqarnermut ikiorlutit.

Qinnuteqarninnut uppernarsaat tunngavilersuutitalik ilanngullugu qinnuteqaat nassiutissavat.

Paasissutissat tunniussatit tunngavigalugit iluaqusersuutinik imaluunniit qamutinik angallatinik pisariaqartitsinersutit kommunimit naliliisoqarlunilu aalajangiisoqassaaq.

 

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Isumaginninnermut, Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iian@nanoq.gl
Nittartagaq: www.naalakkersuisut.gl