Pissassarfimmi pissassariarneq

Nalinginnaasumik paasissutissiineq 

Imminut ikiornerulernissat aammalu inuunerpit naleqassusiata, pitsaassusiatalu annertusinissaa qitiutillugit, innuttaasutut innarluuteqartutut naleqquttumik, immikkullu ilinnut aaqqissuussamik, Pissassarfimmi pissassariarnissannut periarfissaqarputit.

Pissassarnissaq imatut aaqqissuunneqassaaq, ilinnut illillu atukkannut naleqqussarneqassalluni. Ilaatigut isumaqarpoq, ilaquttatit, illillu avatangiisivit qanittuaniittut sapinngisamik ilanngunneqarlutillu eqqarsaatigineqassasut.

Pissassariarnissami siunertaavoq, unammilligassannut pissutsinik pitsaanerpaamik tunngavissarnik tunineqarnissat.

 

Pissassarneq qanoq ingerlanneqartarpa? 

Pissassarfimmi pissassariartitsinissaq ilinnut naleqqussarlugu aaqqissugaassaaq maannakkullu unamminartitatit aallaaviussapput.

Assersuutigalugu pissassartitsineq makkunannga ilaqarsinnaavoq:
  • Qulaajaaneq
  • Erseqqissaaneq
  • Ilitsersuineq
  • Ilinniartitsineq
  • Sungiusaaneq
  • Katsorsaaneq
  • Nangeqqiineq
Ilinniartitsinerup, sungiusaanerup katsorsaanerullu imarisai ukununnga sammisuusinnaapput:
  • Timikkut sungiusarneq
  • Najugaqarnissamut sungiusarneq
  • Ikiorsiissutit atornissaannik sungiusarneq
  • Oqalunnermik oqaatsitsigullu piginnaasatigut ilinniartitsineq
  • Oqaloqatigiinnikkut katsorsaaneq
  • Atassuteqaatit attaveqaatillu
Qulaani assersuutaasut sinaakkutitut isigineqassapput. Pissassariarnissavit aallartinnginnerani, illit sullissisullu siunersioqatigalusi immikkut ittumik ataatsimoorussamillu pissassartinneqarnissat aaqqissuutissavarput, illit illillu pisariaqartitatit, kiisalu kissaatitit aallaaviussapput.

Assersuutigalugu taqqamik milittoorsimallutit kingorna pitsorlussisimaguit, oqalunniarnikkut ajornartorsiuteqalersimaguit, kisimi pitsorlunninnut oqalunniarnikkullu ajornartorsiuteqarninnut, tunngatillugu ikiorserneqassanngilatit.
Innarluuteqarneruttaaq malitsigisinnaasaanik ajornartorsiutit, aallaavii ersarinnginnerusut isumaginissaat pineqarpoq. Assersuutigalugu paasinninnikkut unammilligassaasinnaapput, imaluunniit inuunermi atugassarititaasut allanngorneri peqqutaallutik, isummakkut nanertisimanerusinnaavoq.

Sisimiuni Pissassarfiup sullissiviani pissassariarneq
Sisimiuni Pissassarfiup sullissiviani pissassartinneqarneq nalinginnaasumik sapaatit akunnerinik marlunnik sivisussuseqarpoq.
Sullissiviup sinittarfiini innarluutilinnut naleqqussakkani, nutaalianilu najugaqartinneqassaatit.

Sullissivimmi makkunani immikkut ilinniarsimasunik sulisoqarpoq:
  • timimik sungiusaaneq
  • pillorissaaneq ergoterapi
  • oqallorissaaneq
  • perorsaaneq
  • tarnip pissusiinik ilisimasaqarneq

Tamanna ataatsimoorussamik pissassartitsinissamik, aaqqissuussinissamik immikkuullarissumik periarfissiivoq, illit tamavippit, ulluinnarnilu unammilligassat siumortakkatit qitiutinneqassallutik.

Sullissivimmi maskiinat sungiusaaterpassuit, aammalu maluginiutitut atortorpassuit atorsinnaavatit, atornissaannillu ilinniartinneqarsinnaavutit.

Ilaquttatit, eqqanniittorisatillu pissassartitsinermi sapinngisamik ilanngunneqarlutillu eqqarsaatigineqassapput.
Pisariaqartissagukkulu pissassarnerpit nalaani qanigisaasoq, ikorfartortilluunniit ingiallortigisinnaanissaanut periarfissaqarputit.

Qanigisat, ikorfartortilluunniit pissassarnermi sungiusarnermi sakkussanik tigussaasunik, periaatsinillu ilinniartinneqarniassammat peqataatinneqassaaq, angerlaqqikkuit ulluinnarni ikorfartornissannut pitsaanerusumik ikiuussinnaalerniassammat.

Pissassarfimmi pissassartinneqarnerpit nalaani nangeqqiinissamut pilersaarusiortoqassaaq. Amerlanertigut sungiusassutissannik tunineqassaatit, angerlaqqikkuit sungiusaatigeqqitassannik.
Nangeqqiineq aamma qarasaasiaq atorlugu attaveqaqatigiinnikkut siunnersuinertalimmik oqaloqatigiinnerusinnaavoq.
Immikkut isumaqatigiissusioreernikkut, paasiniaaqqissaarneq, pissassarnermilluunniit nangeqqiinissaq kommunerisanni pisinnaavoq.

Pissassartitsisarnerput pillugu annertunerusumik paasisaqarnerorusukkuit attaviginissatsinnut tikilluaqqusaavutit. Oqarasuaatikkut: 34 50 70 imaluunniit e-mailikkut: pissassarfik@nanoq.gl-ikkut attavigisinnaavatsigut.

 

Pissassarneq qanoq akeqarpa? 

Pissassarfimmi pissassarneq akeqanngilaq.

 

Qanoq pissassariartorsinnaavunga? 

Kommunimi sullissisuppit Pissassarfimmi pissassariarnissamut innersuutissavaatit.

Pissassariarusukkuillu sullissisunnut saaffiginnissaatit. Sullissisut peqatigalugu innersuussinermut immersugassaq immersussavat, immersugassaq sullissisup pigereerpaa. Immersugaq Pissassarfimmut nassiunneqassaaq.

Pissassariartinneqarnissaq ilinnut naleqqunnersoq, Pissassarfiup nalilersussavaa. Pissassarfimmi pissassartinneqarnissannut innersuussineq akuerineqarpat, taava illit sullissisullu attavigineqassaasi, piffissamillu isumaqatigiissuteqarfigineqassaatit. Pissassarfiup billetsit isumagissavai.
Allamit ikiorserneqarnissat naapertuunneruppat, illit sullissisullu allamut isumaqatigiissuteqarnissassinnut tunngasunik attavigineqassaasi.

Oqarasuaatikkut attavigisinnaavatsigut: 34 50 70 imaluunniit e-mailikkut: pissassarfik@nanoq.gl.

 

Allannguutit 

Qinnuteqaatip nassiutereerneraniit atukkatit allanngussagaluarpata – assersuutigalugu Nuuttussanngoruit, napparsimalerlutilluunniit – Pissassarfimmut pissassarfik@nanoq.gl-imut piaarnerpaamik nalunaassaatit.

 

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Isumaginninnermut, Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iian@nanoq.gl
Nittartagaq: www.naalakkersuisut.gl
Pissassarfik
Nalunnguarfimmut 4
3911 Sisimiut

Oqarasuaat: (+299) 34 50 70
E-mail: pissassarfik@nanoq.gl

Nammineerlutik saaffiginnittussanut oqarasuaatikkullu attaveqartussanut ammasarpugut:
Ataasinngormermiit Tallimanngornermut nal. 8.00-16.00