Annertuumik innarluuteqarneq – Najugaqarfik nakkutigineqartoq

Annertuumik innarluuteqarneq – Najugaqarfik nakkutigineqartoq 

Inunnut annertuumik innarluutilinnut ulluinnarni suliassat mikisualuit suliarissallugit ajornarluinnangajassinnaavoq. Assersuutigalugu perusuersartarfiliarneq aamma angerlarsimaffimmi aamma angerlarsimaffiup avataani angalasinnaaneq unammilligassaasinnaapput piuminaalluinnartut. Taamaammat innarluutilinnut inissiamik innarluutillit pisariaqartitaannut naleqqussagaasumik neqerooruteqarnissamut kommune pisussaatitaasinnaavoq. Assersuutigalugu tassaasinnaavoq najugaqarfik nakkutigineqartoq.


Najugaqarfiit nakkutigineqartut

Najugaqarfinni nakkutigineqartuni nammineq ineqassaatit inimilu ataatsimoortarfimmi isersimaarsinnaallutit. Najugaqarfinni nakkutigineqartuni ulloq unnuarlu sulisoqartarpoq.

Najugaqarfiit nakkutigineqartut najugaqarfiupput ilinnut naleqquttut, illit

  • Ulloq unnuarlu paaqqutarineqarnissamik tapersersorneqarnissamillu atorfissaqartitsiguit
  • Utoqqaat angerlarsimaffianni najugaqarnissannut inuusuppallaaruit
  • Ineriartornissamut napparsimmaviit paaqqutarinnittarfiini isumaginiassallugit ajornakusoortunik periarfissaqaruit
  • Peqqutit assigiinngitsut pissutigalugu ulloq unnuarlu paaqqinnittarfimmiinnissannut naleqqutinngikkuit


Ulloq unnuarlu takusarneqarsinnaasumi najugaqarnissannut periarfissaqartinnissat najugaqarfiit nakkutigineqartut siunertaraat. Najugaqarfinni nakkutigineqartuni najugaqartut amerlanertigut annertuumik timikkut imaluunniit eqqarsartaatsikkut innarluuteqartuusarput, taamaammallu ulloq unnuarlu takusarneqarsinnaanissaat tamatuma pisariaqalersippaa.


Piumasaqaatit

Najugaqarfimmi nakkutigineqartumi najugaqarsinnaanissat neqeroorutigissallugu kommune pisussaaffeqarpoq, illit

  • innarluutillit pillugit peqqussummut ilaaguit
  • 18-inik ukioqalersimaguit
  • Aamma nammineq angerlarsimaffinni imminut isumagisinnaanngikkuit


Ikiorsiissutitut suliniutinik allanik kommune neqerooruteqarsinnaaguni, illit angerlarsimaffinni paaqqutarinninnertut aamma tapersersuinertut ilusilikkamik, taava najugaqarfimmi nakkutigisani najugaqarsinnaanissamik neqerooruteqarnissamut kommune pisussaaffeqanngilaq. Taamaakkaluartoq najugaqarfimmut nakkutigineqartumut nuunnissat kissaatigigukku, inissamik tunineqarnissat suli qinnuteqaatigisinnaavat.


Qinnuteqarneq

Najugaqarfimmi nakkutigineqartumi inissamik tunineqarnissat qinnuteqaatiginiarukku, sulianik suliarinnittartunnut saaffiginnissaatit. Qinnuteqaammik suliaqarnermi sulianik suliarinnittartoq ikiuussinnaavoq taanna kommunimut nassiulluguluunniit tunniussinnaavat.

Qinnuteqaammut ilanngutissavatit:

  • Nakorsap oqaaseqaataata nuutinnera
  • Paasissutissaasinnaasut allat, ikiorsiinerup qanoq ittup pitsaanerpaasinnaaneranik takussusiisussat


Paasissutissat taakku tunngavigalugit najugaqarfimmi nakkutigineqartumi inissamik pisinnaanersutit kommunimi nalilersuinermik ataatsimiititaliap nalilersorlugulu aalajangissavaa.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iniian@nanoq.gl
Nittartagaq: www.naalakkersuisut.gl