Annertuumik innarluuteqarneq – Najugaqaqatigiiffiit

Annertuumik innarluuteqarneq – Najugaqaqatigiiffiit 

Inunnut annertuumik innarluutilinnut ulluinnarni suliassat mikisualuit suliarissallugit ajornarluinnangajassinnaavoq. Assersuutigalugu perusuersartarfiliarneq aamma angerlarsimaffimmi aamma angerlarsimaffiup avataani angalasinnaaneq unammilligassaasinnaapput piuminaalluinnartut. Taamaammat innarluutillip pisariaqartitaanut naleqqussakkamik innarluutilinnut inissiamik neqerooruteqarnissamut kommune pisussaaffeqarpoq. Assersuutigalugu tassaasinnaavoq najugaqaqatigiiffik.


Najugaqaqatigiiffiit

Najugaqaqatigiiffiit tassaapput ataatsimoortumik najugaqarfiusut. Najugaqaqatigiiffiit amerlasuut illorsuarni quleriinni inissiani anginerusuni ilusilersugaapput, taakkunani najugaqartut tamarmik immikkut ineqarput taamatullu ataatsimoorussamik inimik, perusuersartarfimmik uffarfimmillu atuisinnaasarlutik.

Najugaqaqatigiiffiit najugaqarfiupput ilinnut naleqquttut, illit

  • perorsaanikkut aamma nalinginnarnik tapersersorneqarnermik killilimmik isumagineqarsinnaaguit
  • allat peqatigalugit ataatsimooqataasinnaaguit
  • aamma najugaqaqatigiiffimmut nalinginnarnik aamma aningaasatigut ikiuunnissamut piumassuseqaruit


Sapinngisamik nalinginnaasumik inuunermik ingerlatsinissannik aamma nammineersinnaasutut misiginissannik periarfissinniarlutit najugaqaqatigiiffiit siunertaraat.

Illumi nalinginnaasumik suliassat assersuutigalugu, eqqiaaneq, pisiniarfilerineq, nerisassiorneq, atisanik errorsineq najugaqartut tamakkerlutik suleqatigiissutigikkajuppaat.

Najugaqaqatigiiffinnut tapersersorti ataaseq amerlanerusulluunniit attuumassuteqakkajupput, ilaatigut perorsaanikkut tapersersuisarlutillu najugaqartut nalinginnarnik suliassanik ikiortarpaat. Najugaqaqatigiiffinni tapersersorti taamaallaat ullup ilaannaani piareersimasarpoq.


Piumasaqaatit

Najugaqaqatigiiffimmi najugaqarnissannut kommunip taamaallaat neqeroorfigisinnaavaatit, illit

  • innarluutillit pillugit peqqussummut ilaaguit
  • 18-inik ukioqalersimaguit
  • aamma nammineq angerlarsimaffinni imminut isumagisinnaanngikkuit


Ikiorsiissutitut suliniutinik allanik kommune neqerooruteqarsinnaaguni, illit angerlarsimaffinni paaqqutarinninnertut aamma tapersersuinertut ilusilikkamik, taava najugaqaqatigiiffimmiinnissamik neqerooruteqarnissamut kommune pisussaaffeqanngilaq. Taamaakkaluartoq najugaqaqatigiiffimmi inissamik tunineqarnissat kissaatigigukku, inissamik tunineqarnissat suli qinnuteqaatigisinnaavat.


Qinnuteqarneq

Najugaqaqatigiiffimmi inissamik tunineqarnissat qinnutiginiarukku sulianik suliarinnittartunnut saaffiginnissaatit. Sulianik suliarinnittartoq qinnuteqaatip suliarinerani ikiuussinnaavoq, taanna kommunimut nassiulluguluunniit tunniussinnaavat.

Qinnuteqaammut ilanngutissavatit:

  • Nakorsap oqaaseqaataata nuutinnera
  • Paasissutissaasinnaasut allat, ikiorsiinerup qanoq ittup pitsaanerpaasinnaaneranik takussusiisussat


Paasissutissat taakku tunngavigalugit najugaqaqatigiiffimmi inissamik pisinnaanersutit kommunimi nalilersuinermik ataatsimiititaliap nalilersorlugulu aalajangissavaa.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iniian@nanoq.gl
Nittartagaq: www.naalakkersuisut.gl