Annertuumik innarluuteqarneq – Sunngiffeqarnermi angalanerit aamma ingiallortit

Annertuumik innarluuteqarneq – Sunngiffeqarnermi angalanerit aamma ingiallortit 

Inuit annertuumik innarluutillit sapinngisamik annertunerpaamik nalinginnaasumik inuttut inuunermik atugaqartussaapput. Tamatuma kingunerisaanik ilaatigut ilaquttaminnik ilagisaqarnissamut periarfissaqartussaapput. Inuit ilaat annertuumik innarluuteqartut naleqquttumik paaqqutarineqarsinnaaniassammata piffissap ilaani kommunerisap avataanut inissinneqarallarsinnaasarput. Taakkulu tassa ilaquttatik ilagiumallugit aallartariaqartarput nammineq pisuussutiginngisaminnik patsiseqartumik. Pisuni taamak ittuni sunngiffimmi angalanissamik atugassiinissamut kommunerisaq pisussaaffeqartarpoq.

Atugassiissutit matussusissavaat:

  • Illit angerlarsimaffittut illoqarfigisannut nunaqarfigisannullunniit billet-inut aningaasartuutit
  • Najugaqarnermi aningaasartuutit, tamanna sunngiffeqarnerup nalaani illit ilaquttanni najugaqanngikkuit


18-it sinnerlugit ukioqaruit illit illoqarfigisannut – immaqalu ingiallortimut ataatsimut – ukiumut ataasiarlutit sunngiffimmi angalanissamut pisinnaatitaavutit. Taassuma saniatigut ukiut pingasut tamaasa, nammineerlutit angalanerit najugaqarnermullu aningaasartuutit akilerukkit, sunngiffimmi ingiallorteqarlutit angalanermut aningaasaliisoqarnissaanik qinnuteqarsinnaavutit.

18-it inorlugit ukioqaruit illit illoqarfinnut – immaqalu ingiallortimut ataatsimut – ukiumut marloriarlutit sunngiffimmi angalanissamut atugassinneqarsinnaavutit. Taassuma saniatigut ukiut tamaasa, nammineerlutit angalanerit najugaqarnermullu aningaasartuutitit akilerukkit, sunngiffimmi ingiallorteqarlutit angalanissamut atugassinneqarnissat qinnuteqaatigisinnaavat.


Piumasaqaatit
Sunngiffeqarluni angalanissamut atugassinneqarnissamik taamaallaat qinnuteqarsinnaavutit:

  • Kommunerisavit avataanut inissinneqarsimaguit, assersuutigalugu ulloq unnuarlu paaqqinnittarfimmi, ataatsimoorluni najugaqarfimmi imaluunniit najugaqarfimmi illersukkami
  • Innarluutillit pillugit peqqussummut ilaaguit


Ingiallorteqarneq
Allamit ikiorneqarlutit taamaallaat angalaneq ingerlassinnaagukku, ingiallortip angalaneranut aningaasartuutit matussusertikkumallugit kommunimut qinnuteqarsinnaavutit. Ingiallortip matussusertissinnaavai:

  • Billet-inut aningaasartuutit
  • Najugaqarnermut aningaasartuutit
  • Ullormusiat aamma sulinnginnermi akissarsiat annaasat, tamatumani ingiallortigisat ilaqutarinngikkukku


Tikeraarluni angalaneq
Sunngiffeqarlutit angalanissamut nammineerlutit periarfissaqanngikkuit, taarsiullugu ilaquttavit qaninnerpaat ilaata ataatsip angalaneranut tikeraarneranullu aningaasartuutit matussusertissinnaavatit. Taanna tikeraarluni angalanermik taaneqartarpoq.

Aamma tikeraartoqarsinnaavutit assersuutigalugu inuuissiortussaaguit, apersortittussaallutit imaluunniit katittussaallutit. Tamannali taamaallaat pisinnaavoq, tamanna sioqqullugu sunngiffeqarlutit angalanissannut taarsiullugu tikeraarlutit angalasimanngikkuit.


Qinnuteqarneq
Angalanermi ingiallorteqarnissamik imaluunniit tikeraarluni angalanissamik qinnuteqarniaruit, sulianik suliarinnittartunnut saaffiginnissaatit. Sulianik suliarinnittartoq

  • angalanermi ingiallorteqarnissamut aamma tikeraarluni angalanissamut periarfissat misissorneranni ikiuussinnaavoq
  • aamma qinnuteqaatip suliarinerani ikiuussinnaalluni


Qinnuteqaatit pinngitsoornani makkuninnga ilaqassaaq

  • Angalanermut aningaasartuutinut uppernarsaatit
  • Angalanissamut pilersaarut
  • Atortut ikiuutaasinnaasut angallannerannut aningaasartuutit uppernarsaataat
  • Najugaqarnermut aamma saniatigut angalanermut aningaasartuutit uppernarsaataat
  • Ingiallortigiumaakkavit aqqa
  • Sooq taanna ingiallortigiumanerit pillugu tunngavilersuutigisat


Qinnuteqaatit kommunimut nassiulluguluunniit tunniussinnaavat.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iniian@nanoq.gl
Nittartagaq: www.naalakkersuisut.gl