Annertuumik innarluuteqarneq – Atortut ikiuutaasinnaasut

Annertuumik innarluuteqarneq – Atortut ikiuutaasinnaasut 

Inunnut annertuumik innarluutilinnut ulluinnarni suliassat mikisualuit suliarissallugit ajornarluinnangajassinnaavoq. Assersuutigalugu perusuersartarfiliarneq aamma angerlarsimaffimmi angalasinnaaneq unammilligassaasinnaapput piuminaalluinnartut. Taamaammat annertuumik innarluuteqaruit, atortut ikiuutaasinnaasut assigiinngitsut pissarsiarinissaannut kommunimit ikiorserneqarnissamik qinnuteqarsinnaavutit.

Atortut ikiuutaasinnaasut pisataapput imaluunniit immikkut ittumik ikiorsiinermi atortulersuutaapput innarluutigisannut oqilisaasussat. Pisattat angerlarsimaffimmi nalinginnaasuusut assersuutigalugu pujoralannut milluaatit, pequtit nalinginnaasut aamma igaffimmi atortut qinnutigisinnaanngilatit. Atortut ikiuutaasinnaasut assersuutigalugu tassaasinnaapput:

  • Issiavik kaassuartagaq
  • Kivittaat
  • Atisat immikkut ittut, imaluunniit pisattat inummut tunngasut allat
  • Kaassuartagaq assakaasulik
  • Siniffik
  • Pequtit immikkut illuinnartut


Atortut ikiuutaasinnaasut siunertaraat ilaatigut illit imminut isumaginerulernissat taamaalillutillu inuuninnik pitsaanerulersitsinissat.


Piumasaqaatit
Atortut ikiuutaasinnaasut pissarsiarisinnaavatit taamaallaat

  • Ajornartorsiutit oqilisarnissaannut, innarluutinnut toqqaannartumik attuumassuteqartunut
  • Inatsisit allat atorlugit ikiorserneqarsinnaanngikkuit
  • Aamma tamanna atorfissaqartikkit pisinnaatitaaffigigillu sulianik suliarinnittartuit nalilerpagu


Atortut ikiuutaasinnaasut pissarsiarinerat nalinginnaasumik kommunip akilertarpai. Tassa imaappoq taakku attartuinnagaapput. Piffissap ingerlanerani atortut ikiuutaasinnaasut atorfissaqartikkunnaarukkit, taakku kommunimut utertittussaassavatit. Inuit allat taakkuninnga pisariaqartitsisut matuma kingorna atortut ikiuutaasinnaasut attartorsinnaalissavaat.


Qinnuteqarneq
Atortunik ikiuutaasinnaasunik pissarsiniarlutit qinnuteqarniaruit, sulianik suliarinnittartunnut saaffiginnissaatit. Sulianik suliarinnittartoq

  • atortut ikiuutaasinnaasut suut pissarsiarisinnaaneritit misissorneranni ikiuussinnaavoq
  • aamma qinnuteqaatip suliarinerani ikiuussinnaavoq


Qinnuteqaat kommunimut nassiulluguluunniit tunniussinnaavat.

Qinnuteqaammut ilanngutissavatit:

  • Nakorsap oqaaseqaataata nuutinnera
  • Paasissutissaasinnaasut allat, ikiorsiinerup qanoq ittup naleqqunnerpaaneranik paasissutissiissussat


Paasissutissat taakku tunngavigalugit kommunimi nalilersuinermik ataatsimiititaliap nalilersorlugulu aalajangissaavaa

  • Atortunik ikiuutaasinnaasunik pissarsissanersutit
  • Atortullu ikiuutaasinnaasut sorliit pissarsiarisinnaaneritit


Malugiuk
Napparsimaneq piffissap ilaannaanut atuuttoq patsisigalugu timinnik atuisinnaanerit appaqqagallarpat atortunik ikiuutaasinnaasunik pissarsisinneqarnissamik qinnuteqarsinnaanngilatit­.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iniian@nanoq.gl
Nittartagaq: www.naalakkersuisut.gl