Angajoqqaarsiaagallartut assigiinngitsut

Angajoqqqaarsiaagallartut assigiinngitsut pissarsiarineqarsinnaapput.

Nalinginnaasumik angajoqqaarsiaagallartartut 

Pisortanit meerarsiaqarsinnaanermut akuersissummik peqaraanni sivisuumik meerarsiaqarnissamut piareersimasariaqarpoq. 

  •  Meerarsiat ilinni aalajangersimasumik najugaqassaaq
  •  Meeqqamut ataatsimut paarsinermi ajunngitsorsiaqarnissannut, piffissami matumani qaammammut 4.123 kr.-iusumik pisartagaqarnissamut pisinnaatitaaffeqarputit. Paarsinermi ajunngitsorsiat, marloriaatinngortinneqassagunik akileraaruteqaataasussaapput.

Nammineq aaqqissuussamik angajoqqaarsiaagallartartut 

Nammineq aaqqissuussamik meerarsiartaartut assersuutigalugu ilaqutaasinnaapput, soorlu aanaakkut aataakkut assigisaalluunniit. Aammattaaq tassani ilaqutaanngitsut nammineq aaqqissuussamik ilaqutarsianngorsinnaapput. 

  •  Piffissaq qaammatinik pingasunik sivisuneruppat, paarsinissamut akuersissummik pissaatit, taannalu paarsinissamut akuerineqarumaguit angajoqqaarsiaagallartunut allanut piumasaqaatit assigalugit immersorneqassaaq
  •  Nammineq aaqqissuussamik angajoqqaarsiaqartitsigallarnermut kommune aningaasaqarnikkut ikiorsiissutinik tunniussineq ajorpoq

Pilertortumik angajoqqaarsiaagallartut 

Isumaginninnermi pigaartoq meeqqap ikiorneqartariaqarneranik paaqqineqartariaqarneranillu pisariaqartitsisoqarneranik ilisimatinneqaraangat pilertortumik ilaqutarsianut inissinneqarnissaa pisariaqarlertarpoq. 

  •  Ullup unnuallu ingerlanerani piffissap qanoq ilinera apeqqutaatinnagu tassanngaannartumik pisuni meeqqanik tigusinissamut piumassuseqassaatit
  •  Meeqqamik paarsinermi ajunngitsorsiaqarnissamut pisinnaatitaaffeqarputit, ulloq unnuarlu meeqqamut ataatsimut 330 kr.-iusumik

Ilaqutariit oqilisaassisartut 

Ilaqutariinnut oqilisaassisartut tassaapput ilaqutariit ilungersunartumik paaqqutariaqartumik meerartallit oqilisaanniarlugit aaqqissuussineq. 

  •  Meerarsiaq piffissami sivikitsumi ilinni najugaqassaaq, assersuutigalugu sapaatit akunnerisa naaneri allortarlugit, sunngiffeqarnermi imaluunniit sapaatip akunnera allortarlugu
  •  Meeqqamik paarsinermi ajunngitsorsiaqarnissamut pisinnaatitaaffeqarputit, ulloq unnuarlu meeqqamut ataatsimut 284 kr.-isunik

Inuutissarsiutigalugu angajoqqaarsiaagallartartut 

Ilaqutariinni inersimasortaasut ulluinnarni meeqqanik annertuumik ikiorserneqartariaqartunik paaqqineqartariaqartunillu sullissinermi misilittagaqartuusut inuutissarsiutigalugu meerarsiartaarsinnaanermut akuersissummik tunineqarsinnaapput. 

  •  Angajoqqaarsiaagallartoq inunnik isumaginninnermik ilinniagaqarsimasoq, aallaavittut isigalugu meerarsiat najugaqartinnerisa nalaanni angerlarsimaffimmiittartussaavoq
  •  PIP-ip isumaqatigiissutaa naapertorlugu akissarsiaqassaatit 

Malugiuk

Pissutsit ilinni imaluunniit ilissinni atukkasi allannguuteqarpata, paarsinissamut akuersissutit sukkulluunniit kommunip atorunnaarsissinnaavai.

Angajoqqaarsianngornissassinnut aalajangertigasi eqqarsaatigisassaraasi 

  •  angajoqqaarsiaaniaraanni ilaqutariinnulluunniit oqilisaasuuniaraanni ilaqutariit iluanni tamanut suliassaasoq
  •  angajoqqaarsiaaniaraanni ukioq kaajallugu ullormut 24 tiimit tapertaassallusi piareersimasariaqarassi
  •  ilaqutariinni inuunersi allanngussammat, ulluinnaat, akunnerit naaneri sulinngiffeqarnerillu
  •  meerarsiat inersimasunut attaveqarniarnerat amigarsimagajuttarpoq taamaattumillu ullormit tiimit arlallit pisariaqartittassavaasi
  •  ilaqutariinnissinni nutaamik meerartaqalernersi meeqqassinnut sunniuttussaammat
  •  suliassat ajornakusoortut aqqusaartorsinnaagassigit
  •  ilaqutariittut oqilisaasutut meeraq paaqqutarisartagarsi ulluinnarni inuunermut nuannarinngissinnaasassinnut utertittariaqartassagassiuk
  •  meeraq paaqqutarisarsi piffissap aalajangersimasup iluinnaani najortussaagassiuk, sivikissinnaavoq sivisusinnaavoq
  •  meeqqat angajoqqaavi meeqqamut iluaqutissanngorlugu suleqatigisinnaassagassigit

Annertunerusumik paasissutissat

Meerarsiaqartarneq meerarsiaqarnissamullu akuersissutit periarfissat piumasaqaatillu pillugit siunnersortimik oqaloqateqarnissaq pingaaruteqarpoq, taamaattumik annertunerusumik siunnersorneqarniaraanni ilitsersorneqarniaraannilu kommunemi Ilaqutariinnut ingerlatsivimmut saffiginnissasutit siunnersuussutigineqarpoq.

Qeqqata Kommunia

Ilaqutariinnermut immikkoortortaqarfik

+299 702100

qeqqata@qeqqata.gl