Mannissarniarneq

Nalinginnaasumik paasissutissiineq 

Kalaallit Nunaat tamarmi timmiaqarpoq, imaani, sineriammi nunatannilu isorliusuni sermersuup sinaani. Sermersuaq kisimi timmissanit najorneqanngilaq.

Kalaallit Nunaanni timmissat assigiinngitsut 60-it missaanniipput. Affai ukiukkut Kalaallit Nunaat qimallugu ukiiartortarput.

Matumani takusinnaavatit mannissarnissamut piumasaqaatit suut atuunnersut, matumani timmissat sorliit mannii, qaqugu aammalu sumi.

Kommunerisanni mannissartarnermut kommunimit immikkut ittunik ileqqoreqqusaqartitsisoqarsinnaavoq. Ileqqoreqqusallu mannissannginninni ilisimaarinissaanut pisussaaffeqarputit.

Mannissaat inuussutissarsiutigalugu namminerluunniit atugassaagaluarpata, Piniarneq atorlugu ukiumoortumik nalunaarutigisartussaapput, tassa timmissat Piniarneq-mi pisat nalunaarsorneqarnissaannut immersuiffimmi takuneqarsinnaappata.

Piumasaqaatit 

Aallaaviatigut mannissarneq inerteqqutaavoq. Mannissarniaruit sunngiffimmi aamma inuussutissarsiutigalugu piniarnermut allagartamik atuuttumik peqassaatit.

Mannissarnermi atugassat inerteqqutaasut tassaapput:
  • Allunaasaq
  • Tummeqqat
  • Innartorluni pituutaq imaluunniit innartorluni atortut allat

Aammattaaq ullut nutaat imaluunniit timmiaqarfiit, manniit aamma timmissat piaraat timmissallu nujuartat ajoqusissanngillat imaluunniit akornuserneqassanngillat.

Timmissat suussusaat, piffissat sumiiffiillu 

Timmissanit sorlernit mannissarsinnaanerit qaqugulu, apeqqutaavoq sumi najugaqarnerit.

Sunngiffimmi imaluunniit inuussutissarsiutigalugu piniarnermut allagartaqaruit nammineq atugassannik:
  • Qaqulluup, naajarluit, naajarujussuit aamma naajaannaap manniinik piffissami 1. januar aallarnerfigalugu 15. juni tikillugu mannissarsinnaavutit
  • Nunap immikkoortuini zone 1 aamma zone 4-mi najugaqaruit appaliarsuit manniinik mannissarsinnaavutit

Inuussutissarsiutigalugu piniarnermut allagartaqaruit tunisaqarnissamut siunertaqarlutit:
  • Qaqulluup, naajarluit, naajarujussuit naajaannaallu manniinik mannissarsinnaavutit piffissami 1. januar aallarnerfigalugu 15. juni tikillugu
  • Qeqqata Kommuniata avannaani killeqarfianiit Qaanaap aqutsiveqarfiata kujataatungaata killeqarfia tikillugu nalaani najugaqaruit, naajarluit naajarujussuillu manniinit mannissarsinnaavutit piffissami 1. januar aallarnerfigalugu 15. juni tikillugu
  • Nunap immikkoortuani zone 1 aamma zone 4-mi najugaqaruit appaliarsuit manniinik mannissarsinnaavutit

Manniit uunneqanngitsut suliarineqanngitsullu pisisussamut taamaallaat tunisinnaavatit aamma aqutsiveqarfimmi najugarisanni taamaallaat.

Matumani taaneqartut saniatigut allat manniinik mannissaqqusaanngilatit. Tassa appat imaluunniit imeqqutaallat manniinik mannissarneq inerteqqutaavoq, taamaaliornerlu akiliisitsinermik pineqaasitsissutaasinnaalluni.

Timmissat sumiiffii 40-it illersugaapput. Sumiiffinnit taakkuninnga 500 meter-it iluini 1. maj aallarnerfigalugu 31. august tikillugu angalaqqusaanngilatit.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aalisarnermut Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apnn@nanoq.gl
Nittartagaq: www.naalakkersuisut.gl