Kapisilinniarneq

Nalinginnaasumik paasissutissiineq 

Aalisagaq ataaseq pingaartumik aalisarneqartartoq tassaavoq atlantikup kapisilia. Atlantikup kapisilia Europap aamma Amerikap avannarliup nunavittaanit Kalaallit Nunaata sineriaanut suffiartorluni ingerlaartarpoq.

Nalinginnaasumik kitaata sineriaani Qeqertarsuup Tunuanit avannarpasinnerunngitsoq aamma Tunup sineriaani Ittoqqortoormiit tikillugu ingerlaartarpoq.

Inuussutissarsiutigalugu aalisartuuguit, kapisilinniarnermik ingerlataqarumallutit, aalisarnermut akuersissummik peqassaatit.

Sunngiffimmi aalisartuuguit, nammineq atugassannik kapisilinniarnissamut aalisarnermut akuersissummik peqartariaqanngilatit.

Piumasaqaatit 

Inuussutissarsiutigalugu aalisarneq
Inuussutissarsiutigalugu aalisartuuguit aalisaammik aamma qassutinik naannerpaamik 140 mm-isut nigartussusilinnik kapisilinniarsinnaavutit. Kapisilittatit tuniniarsinnaavatit assersuutigalugu:
• Tunitsivinnut
• Tuniniaavinnut
• Najukkanni suliffeqarfinnut
• Akunnittarfinnut
• Ilinniartoqarfinnut
• Napparsimmavinnut
• Neriniartarfinnut

Sunngiffimmi aalisarneq
Sunngiffimmi aalisartutut nammineq atugassannik kapisilinniarsinnaavutit. Sunngiffimmi aalisartuuguit qissattaatit, qassutit nunamut pituttakkat aamma qarsorsat atorlugit kapisilinniarsinnaavutit. Sunngiffimmi aalisartut qassutit ataatsit kisimik atorsinnaavaat.

Malugiuk
Kapisillit pisarineqartut tamakkerlutik Kalaallit Nunaanni Aalisarnermut Nakkutilliisoqarfimmut ulluinnarni GFLK-mik taaneqartartumut nalunaarutigineqartassapput, tamatigut taamatut iliortoqartassaaq qassusiareernerup kingorna imaluunniit qarsorsat qissattaatilluunniit atorlugit kapisilinniarsimagaanni. Tamannalu aamma sunngiffimmi aalisartartunut atuuppoq.

Nalunaaruteqarnissamut immersuiffissaq aajuk

Kapisilinnut aalisarnermut akuersissummik qinnuteqarneq 

Inuussutissarsiutigalugu kapisilinniarnermik ingerlataqarumaguit, aalisarnermut akuersissummik peqassaasit.

2017-imi sinerissap qanittuani inuussutissarsiutigalugu kapisilinniarnissamut qinnuteqaat aajuk

Inuussutissarsiutigalugu kapisilinniarnissamut akuersissummik qinnuteqarniaruit kommunerisannut 1. februar aallarnerfigalugu saaffiginnittoqarsinnaavoq. 2016-imiilu kapisilinniarnermut akuersissuteqareeruit, akuersissut ingerlaannaq tunniunneqarsinnaavoq.

Inuussutissarsiutigalugu kapisilinniarnermik angallataatilinnut 6 meter-it sinnerlugit angissusilinnut ingerlatsinissamut qinnuteqaat aalisa@nanoq.gl-imut nassiutissaaq.

Aalisarnermut akuersissutit pillugit annertunerusumik uani atuarsinnaavatit

Piffissaliussaq 

Kapisillit amerlassusaat ukiumiit ukiumut assut allanngorartarpoq. Piffissap qanoq ilinerani kapisilinnialersinnaanersutit Aalisarnermut Piniarnermullu Naalakkersuisoqarfiup ukiut tamaasa nalunaarutigisarpaa. Nalinginnaasumik 15. august aallarnerfigalugu 31. oktober tikillugu tamanna ingerlakkajuttarpoq, imaluunniit pisassiissutit aalisarneqarsimalerpata. Pisassiissutit 31. oktober sioqqullugu aalisarneqalersimareerpata aalisarneq unitsinneqassaaq, ingerlaannarlu tusagassiuutitigut nalunaarutigineqassalluni.

Naammagittaalliuteqarneq 

Isumaqaruit eqqunngitsumik itigartinneqarlutit apn@nanoq.gl-imut naammagittaalliuteqarsinnaavutit.
Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aalisarnermut Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apnn@nanoq.gl
Nittartagaq: www.naalakkersuisut.gl