Qaleralinniarneq

Nalinginnaasumik paasissutissiineq 

Aalisagaq ataaseq pingaartumik aalisarneqartartoq tassaavoq qaleralik. Qaleralik Kalaallit Nunaata imartaani, kangerluini aamma avataani assut siammasissumik uumasuuvoq. Aalisagaavoq piniartartoq 200 - 2000 meter-inik ititigisumi uumasuulluni. Qaleralik ukioq kaajallallugu aalisarneqarsinnaavoq.

Inuussutissarsiutigalugu aalisartuuguit qaleralinniartarniaruit aalisarnermut akuersissummik peqartuaannartariaqarputit.

Sunngiffimmi aalisartutut qaleralinnik nammineq atugassannik qaleralinniarsinnaavutit aalisarnermut akuersissummik peqanngikkaluarlutit.

Qaleralinniarneq avataasiorluni aamma sinerissap qanittuani aalisarnermut avitaavoq.

Pisassiissutit 

Sinerissap qanittuani qaleralinniarneq
Sinerissap qanittuani qaleralinniarnermi aqutsiveqarfinni pingasuni ingerlanneqartarpoq, tassanilu pisassiissutit aalajangersarneqartarlutik, tassa makkunani:
• Upernavik
• Uummannaq
• Qeqertarsuup Tunua

2016-imi sinerissap qanittuani qaleralinniarnermi pisassiissutit ima aalajangiunneqarput: Upernavik 9.500, Uummannaq 9.500 aamma Qeqertarsuup Tunua 9.200 aalisariutit umiatsiaaqqallu akornanni agguataagassatut.

Uani link-imi iserfigineqarsinnaasumi sinerissap qanittuani avataasiorlunilu qaleralinniarnermut tunngatillugu TAC aamma pisassiissutit ukiut tamaasa tamanut saqqummiunneqartarput

Sumiiffinni allani pisassiisoqarsimanngilaq.

Sinerissap qanittuani aalisarnermi qassutinik aalisarnissaq inerteqqutaavoq. Kommunilli ataasiakkaat sumiiffinni pissutsit ajornartinngippassuk, assersuutigalugu qassutinik aalisarneq aalisakkanik nungusaataanissaa aarlerinartoqanngippat, qassutinik aalisarneq akuersissutigisinnaavaat.

Avataasiorluni qaleralinniarneq
Avataasiorluni aalisarnermut aqutsiviit pingasuupput:
• Baffinip kangerliumanersua
• Davis Strædet
• Tunu

Sumiiffiit pingasut taakku tamarmik immikkut aalajangersimasumik aalisagartassiiffigineqartarput.

2016-imi avataasiorluni qaleralinniarnermi pisassiissutit ima aalajangiunneqarput: Baffinip kangerliumanersua 8.000, Davis Strædet 7.000 aamma Tunu 8.272.

Uani link-imi iserfigineqarsinnaasumi sinerissap qanittuani avataasiorlunilu aalisarnermi TAC aamma pisassiissutit ukiut tamaasa tamanut saqqummiunneqartarput

Aalisarnermut akuersissummik qinnuteqarneq 

Aalisarnermut akuersissutit sinerissap qanittuani aamma avataasiorluni aalisarnermi atugassatut atulersinneqartarput. Akuersissut ukiumut pisassiiffiusumut ataatsimut atuutsinneqartarpoq, taamaattumik ukiut tamaasa akuersissummik qinnuteqartassaatit. Ukioq pisassiiffiusoq 1. januar-imiit 31. december tungaanut atuuppoq.

Taamaattoq eqqumaffigissavat akuersissut pigilikkat akuersissummi ulloq suna atuutilernersoq allaqqanera taamaallaallu ukiup pisassiiffiusup naanissaata tungaanut atuunnera.

Sinerissap qanittuani qaleralinniarneq
Sinerissap qanittuani qaleralinniarnissamut akuersissummik qinnuteqarniaruit, kommunerisanni inuussutissarsiornermut siunnersortimut saaffiginnissaatit.

2017-imi sinerissap qanittuani inuussutissarsiutigalugu qaleralinniarnissamut qinnuteqaat aajuk

Sinerissap qanittuani qaleralinniarnermut akuersissummik peqaruit, Kalaallit Nunaanni pisatit tunitsivimmut imaluunniit umiarsuarmut tunitsivittut atorneqartumut niussavatit.

Aalisarnermut akuersissutit tunisininni tamatigut takutittassavat:
• Aalisariut 9,4 meter-it inorlugit angissuseqarpat, pisavit nalunaarutiginissaannut tunitsiviup pisussaaffigaa
• Aalisariut 9,4 meter-it sinnerlugit angissuseqarpat, pisatit nammineq nalunaarsortassavatit
• Aalisariut 9,4 meter-it sinnerlugit taavalu 90 BRT/120 BT inorlugu angissuseqarpat, pisatit pillugit nalunaarsukkatit tunitsivimmut tunniutissavatit
• Aalisariut 90 BRT/120 BT-mit angineruppat, pisatit pillugit nalunaarsuut uunga nassiutissavat GFLK, Postboks 501, 3900 Nuuk

Avataasiorluni qaleralinniarneq
Avataasiorluni qaleralinniarnissamut akuersissummik qinnuteqarniaruit, Aalisarnermut Piniarnermullu Naalakkersuisoqarfimmut saaffiginnissaatit.

Avataasiorluni qaleralinniarnermik ingerlataqartuuguit, ullut tamaasa pisatit nalunaarsortassavatit.

Aalisarnermut akuersissutit pillugit paasissutissat uani atuarsinnaavatit

Naammagittaalliuuteqarneq 

Isumaqaruit pissusissamisuunngitsumik itigartinneqarsimallutit, naammagittaalliuuteqartoqarsinnaavutit uunga apn@nanoq.gl.
Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aalisarnermut Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apnn@nanoq.gl
Nittartagaq: www.naalakkersuisut.gl