Peqatigiiffiit – Pilersitsineq

Peqatigiiffiit maana nalunaarsortiguk

Peqatigiiffiit – Pilersitsineq 

  • Qeqqata Kommunia

    Peqatigiiffiit sorliit Qeqqata Kommuniani nalunaarsorneqarsimanersut tusarusukkussiuk, kultureqarnermut ingerlatsivik, peqatigiiffiit nalunaarsorneqarsimasut tamakkerlugit allattugaateqartoq attaveqarfigisinnaavarsi.
    • Sisimiuni eqqaaniluunniit najugaqarussi, sunngiffimmi pisortaq sianerfigisinnaavarsi uunga 86 74 00. Qarasaasiakkut aamma e-mail-imik nassiussisinnaavusi uunga fakl@qeqqata.gl
    • Maniitsumi eqqaaniluunniit najugaqarussi, oqarasuaammut sianersinnaavusi uunga 81 78 61. Qarasaasiakkut aamma e-mail-imik nassiussisinnaavusi uunga aakr@qeqqata.gl

Peqatigiiffik tassaavoq inuit ataatsimoorfiat, ataatsimoorullugu assersuutigalugu timersornikkut, nipilersornikkut kulturikkulluunniit soqutigisartik pillugu naapittarfiat. Peqatigiiffiit nalinginnaasumik ilisarnaatigisarpaat aaqqissuussaasarnertik. Tamatuma nassatarisaanik ulluni aamma piffissani aalajangersimasuni ataatsimoortarput, siulittaasoqartarput peqatigiiffimmilu ilaasortaaniaraanni akiliuteqartoqartarpoq. Peqatigiiffittut pilersinneqarsimagaanni arlalissuarnik iluaquteqarsinnaavoq. Ilaatigut assersuutigalugu aaqqissuussinerit ingerlanneqarnissaannut kommuninit aamma Namminersorlutik Oqartussanit tapiiffigineqarnissamik qinnuteqartoqarsinnaavoq.

Tunngaviusumik kikkulluunniit peqatigiiffimmik pilersitsisinnaapput isumartillu malillugu aaqqissuussamik pilersitsillutik. Peqatigiiffimmik aallartitsiniarussi malittarisassanik sanassaasi, minnerpaamik tulliuttunik nassuiaasuusunik:

  1. Peqatigiiffiup aqqa najugaalu
  2. Peqatigiiffiup siunertaa
  3. Ilaasortat
  4. Ilaasortanngorneq aamma ilaasortaajunnaarneq
  5. Ilaasortaanermut akiliut
  6. Siulersuisut inuttarineqassallutillu, siulittaasoq, siulittaasup tullia, aningaaserisoq, allatsi, siulersuisunut ilaasortat aamma sinniisussat
  7. Siulittaasup aamma aningaaserisup akisussaaffii
  8. Nalinginnaasumik ataatsimeersuarneq
  9. Ataatsimeersuarnerup immikkut ittumik ataatsimeersuarnertut ingerlanneqarnera
  10. Peqatigiiffiup atorunnaarsinneqarnera
  11. Peqatigiiffiup pilersinneqarnerata ullua


Malittarisassat suliarereerussigit, ilaasortanit akuersissutigineqassapput. Tamanna ataatsimeersuarnermi pigajuppoq.


Malugiuk
Soqutigisaqaqatigiiffinnut naalakkersuinermik, upperisamik aamma suliffeqarnermik ingerlataqartunut tapiissutinik tunniussisoqarneq ajorpoq.

Allaaserisat attuumassutillit