Biili – Nalunaarutiginera

Biili – Nalunaarutiginera 

Biilit suulluunniit aqqusinikkut, illoqannginnersatigut aammalu sumiiffinni allani nalinginnaasumik angallannermi atorneqartut nalunaarsorneqarsimasussaapput nummerplade-millu ikkussiffigineqarsimassallutik. Biilit sanaartorfiusimasuni avinngarusimasuni, assersuutigalugu savaateqarfinni aamma nalunaarsorneqarsimasussaapput.

Biilit sumiiffinni matoqqasuni inuit kikkuugaluartulluunniit isernissamut pisinnaajunnaartitaaffigisimasaanni taamaallaat angallassutaasartut nalunaarsorneqartariaqanngillat. Taamatuttaaq biilit sumiiffinni avinngarusimasuni taamaallaat atorneqartartut nalunaarsorneqartussaanngillat. Biilit sumiiffimmit aamma sumiiffimmut avinngarusimasunit angallassutigineqartartut nalunaarsorneqarsimasussaapput.

Biilit nalunaarsorneqartussatut pisussaatitaasut:
  • Inuit biilii
  • Inuit biilii (sisamanik assakaasullit ATV)
  • Inuit biilii angisuut
  • Biilit nioqqutissanut atorneqartartut
  • Taxat
  • Biilit usisarfillit
  • Bussit
  • Atuartut bussii
  • Annaassiniarnermi biilit
  • Biilit innaallagissamoortut

Piumasaqaatit
Illit biilit taamaallaat nalunaarsorneqassaaq imaattoqarpat:
  • Taanna akisussaasutut sillimmaserneqarsimappat
  • Biilip motoorianut akileraarut akilerneqarsimappat
  • Taanna illersorneqarsinnaasuusoq politiinit akuerineqarsimappat

Malugiuk biilip innaallagissamoortup motoorianut akileraarut akilertussaannginnakku.


Akisussaasutut sillimmasiineq
Akisussaasutut sillimmasiiniaruit illit sillimmasiisarfigisannut saaffiginnissaatit. Akisussaasutut sillimmasiineq pissarsiarereerukku sillimmasiinermut uppernarsaammik tunineqassaatit. Sillimmasiinermut uppernarsaat pigilerukku unioqqutitsinerunngitsumik politeeqarfimmut ingerlasinnaavutit, biili akueritikkiartorlugu nalunaarsoriartorlugulu, naak nummerplade-mik allagartalersissimanngikkaluartoq.


Motoorimut akileraarut
Biilimik atoreernikumik pisisimaguit nummerplade-lu suli biilimi atappat, motoorimut akileraarut piffissamut akileraarfiusussamut akilerneqareersimassaaq. Motoorimut akileraarut ukiup affakkaartumik akilerneqartarpoq – april-ip aallaqqaataanit oktober-ip aallaqqaataata tungaanut. Piginnittuunikumiit akiliinermut uppernarsaatip tigunissaa isumagissavat, taassuma uppernarsassavaa motoorimut akileraarut piffissamut akileraarfiusussamut tamakkiisuusumut akilerneqarsimasoq. Akileraartarnermut Aqutsisoqarfimmut aamma saaffiginnissinnaavutit, tassanngaanniit uppernarsarneqarsinnaavoq motoorimut akileraarut akilerneqareersimasoq.

Biili nummerplade-qanngippat biilivit nalunaarsornissaa pitinnagu motoorimut akileraarut akilissavat.
  • Nuummi Akileraartarnermut Aqutsisoqarfimmut saaffiginninnikkut motoorimut akileraarut akilersinnaavat
  • Sumiiffinni allani politiinit girokort-imik tunineqassaatit, taannalu biilivit nalunaarsunnginnerani akilissavat

Nalunaarsuineq
Biilivit nalunaarsortinnissaa piumagukku politiinut saaffiginnissaatit. Makku nassassavatit:
  • Biili. Nalunaarsuinermi biili illersorneqarsinnaasumik ajunnginnersoq politiit naliliissapput. Politiit pingaartumik qulliit, brems-it aamma aquut eqqumaffigisarpaat
  • Sillimmasiinermut uppernarsaat
  • Motoorimut akileraarutip akilerneranut uppernarsaat
  • Nalunaarsuinermut immersugassaq immersugaq atsiugarlu. Immersuiffimmiittut piginnittumut paasissutissat sillimmasiinermut uppernarsaammiittut assigissavaat

Nalunaarsortinneranut immersuiffissaq

Malugiuk biilip sananeqarnerata normua eqqiarneqarsimassammat politiinullu takutitsinermi ersissalluni.

Illoqarfimmi politeeqarfeqanngitsumi najugaqaruit politeeqarfik qaninnerpaasat attaveqarfigissavat, biilit qanoq nalunaarsornissaa aammalu nummerplade-mik ilisarnaatilernissaa paasiumallugu.


Malugiuk
Tuniniaasartoq aqqutigalugu biilimik pisiguit, tuniniaasartup nalinginnaasumik isumagissavaa illit atit eqqortumik atorlugu biilit nalunaarsorneqassasoq.

Allaaserisat attuumassutillit

Politeeqarfik Sisimiut
Postboks 110
3911 Sisimiut

Oqarasuaat: (+299) 70 13 22
Fax: (+299) 86 57 78
Oqarasuaat angallattagaq: (+299) 52 77 48
E-mail: grl-sisimiut@politi.dk