Qamuteralannik nalunaarsuineq atuiunnaarnermilu nalunaarneq

Nalinginnaasumik paasissutissiineq 

Qamuteralaat aqqusinerni illoqannginnersani sumiiffinnilu allani nalinginnaasumik angallannermi atorneqarlutik angallatigineqartut nalunaarsorneqarsimasussaapput aammalu nalunaarsorneqarnermut uppernarsaammik allagartalerneqarsimassallutik. Qamuteralaat sumiiffinni avinngarusimasuni atorneqartut, assersuutigalugu savaateqarfinni aamma nalunaarsorneqarsimasussaapput.

Qamuteralaat sumiiffinni matoqqasuni inuit kikkuugaluartulluunniit isernissamut pisinnaajunnaartitaaffigisimasaanni, assersuutigalugu mittarfinni nalunaarsorneqarsimanissaat pisariaqanngilaq. Taamatuttaaq qamuteralaat sumiiffinni avinngarusimasuni taamaallaat angallassutigineqartartut nalunaarsorneqartussaanngillat. Qamuteralaat avinngarusimasumi sumiiffimmit imaluunniit sumiiffimmut angalanermut atorneqartarpat nalunaarsorneqarsimassaaq.

Piumasaqaatit 

Nalunaarsortinneri
Illit qamuteralaat pigisatit taamaallaat nalunaarsorneqassapput, imaattoqarpat:
  • Taanna akisussaasutut sillimmaserneqarsimappat
  • Taanna illersorneqarsinnaasumik ajoquteqanngitsoq politiinit akuerineqarsimappat

Nalunaarsuinermut uppernarsaatit allagartaat
Nalunaarsuinermut uppernarsaammut ilanngullugu nalunaarsuinermut uppernarsaatit allagartaannik marlunnik tunineqassaatit. Taakku qamuteralaat saneraanut illugiinnut imaluunniit motoorip qalequtaanut nipputsissavatit. Qajannaatsumik ikkusimasinnaaqqullugit ikkuffissaat eqqiarluarneqarsimassaaq. Ikkuffissap kissassarnissaa pisariaqarsinnaavoq, immaqa tagiartorneratigut.

Atuiunnaarluni nalunaaruteqarneq
Qamuteralaat pigisatit nalunaarsorneqarsimanerat kissaatigiunnaarukku, taassuminnga atuiunnaarnerit nalunaarutigissavat taamatullu iliorsinnaavutit politiit attavigineratigut. Taama iliorsinnaavutit assersuutigalugu qamuteralaat tunigukkit. Matuma kingorna piginnittunngortup pisussaafigilissavaa nammineq atini atorlugu qamuteralaat nalunaarsornissaat.

Qamuteralaat tuninissaat sioqqullugu atorunnaarlugit nalunaarutiginngikkukkit, piginnittunngortup tuaviornerpaamik nammineq atini atorlugu qamuteralaat nalunaarsortittariaqarpai. Piginnittunngortup qamuteralaat nammineq atini atorlugu nalunaarsorpagit, taakku illit atit atorlugu nalunaarsorneeruttut politiit nalunaarfigissavaatsit. Qamuteralaat tuninerisa kinguninngua politiinit nalunaarutisinngikkuit pisisoq attaveqarfigisariaqassavat.

Nalunaarsorneqarnermut uppernarsaammut allagartaq
Qamuteralaat atorunnaarnerat nalunaarutigigukku nalunaarsorneqarnermut uppernarsaatip allagartaannut nipputsitassannik allagartanik ilisarnaateqanngitsunik politiit tunniussissapput. Taarsiullugu allagartat aamma piiginnarsinnaavatit. Eqqumaffigiinnassavat taama iliornikkut qalipaat ajoqusersinnaammat, tassa allagartat eqqortumik ikkusimasimappata.

Malugiuk
Illoqarfimmi politeeqarfeqanngitsumi najugaqaruit politeeqarfik qaninnerpaaq attaveqarfigisinnaagakku isumaqatigiissuteqarfigalugulu, qanoq iliorlutit qamuteralannik atuiunnaarnermik nalunaaruteqassanerlutit aammalu tassunga ikkussassanik allagartanik ilisarnaateqanngitsunik pissarsisinnaanerlutit.

Akileraarut 

Piffissami matumani qamuteralaat nalunaarsornerannut akiliuteqartussaanngilatit. Kingusinnerusukkut qamuteralaat oqimaassutsimut akileraaruserneqassappata, Namminersorlutik Oqartussat tamanna pillugu ilisimatitsissapput.

Nalunaarsuineq 

Qamuteralaat pigisatit nalunaarsortikkumagukkit politiinut saaffiginnissaatit. Makku nassassavatit:
  • Qamuteralaat. Nalunaarsuinermi qamuteralaat illersorneqarsinnaasumik ajoquteqannginnersut politiit nalilersussavaat. Politiit pingaartumik qulliit, bremsit aamma aquut eqqumaffigisarpaat
  • Qamuteralaat akisussaasutut sillimmaserneqarsimanerannut uppernarsaat. Uppernarsaat atorsinnaasoq:
    • Sillimmasiinermut uppernarsaat nutaaq
    • Imaluunniit akiliuteqarnermit kingullermit police-q aamma akiliinermut uppernarsaat, police-p suli atuuttuuneranik takutitsisoq
  • Nalunaarsuinermut immersuiffissaq immersugaq atsiugarlu

Nalunaarsortinneranut immersuiffissaq

Malugiuk sananeqarneranut normu eqqiarneqarsimassammat politiinullu takutitsinermi ersissalluni.

Illoqarfimmi politeeqarfeqanngitsumi najugaqaruit politeeqarfik qaninnerpaaq attaveqarfigisinnaavat isumaqatigiissuteqarfigalugulu, qanoq iliorlutit qamuteralaat nalunaarsorsinnaanerlugu aammalu nalunaarsorneqarneranut uppernarsaammik allagartalersissinnaanerlugu.

Ingerlatseriaaseq 

Nalunaarsuinermi uppernarsaat
Suut tamarmik eqqortuusut politiit nalilerunikkit nalunaarsuinermut uppernarsaammik politiit tunniussissapput assilineralu illit sillimmasiisarfigisannut nassiullugu.

Allannguineq 

Pissutsini ilinnut tunngasuni allannguuteqartoqarpat politeeqarfik qaninnerpaaq saaffigissavat nalunaarsuinermilu uppernarsaammi paasissutissat iluarsitillugit.

Piffissaliussat (atorunnaarsitsineq) 

Piginnittumik allannguisoqassappat piginnittunngortup imaluunniit atuisunngortup piaarnerpaamik kingusinnerpaamillu sapaatit akunneri 3-sut qaangiutsinnagit nalunaarutigissavaat – qamuteralaat atorunnaarneqartutut nalunaarutigineqanngippata.

Naammagittaalliuteqarneq 

Najukkami politeeqarfimmut imaluunniit Kalaallit Nunaanni Politimestereqarfimmut naammagittaalliuteqartoqarsinnaavoq.
Politeeqarfik Sisimiut
Postboks 110
3911 Sisimiut

Oqarasuaat: (+299) 70 13 22
Fax: (+299) 86 57 78
Oqarasuaat angallattagaq: (+299) 52 77 48
E-mail: grl-sisimiut@politi.dk