Traktoorimik aamma atortunik motoorilinnik nalunaarsuineq atuiunnaarnermillu nalunaarneq

Nalinginnaasumik paasissutissiineq 

Traktoorit aamma atortut motoorillit aqqusinerni illoqannginnersani sumiiffinnilu allani nalinginnaasumik angallannermi atorneqarlutik angallassutaasut nalunaarsorneqarsimasussaapput nummerplade-millu allagartalerneqarsimasussaallutik. Angallassissutit sumiiffinni avinngarusimasuni atorneqartut, assersuutigalugu savaateqarfinni aamma nalunaarsorneqarsimasussaapput.

Traktoorit aamma atortut motoorillit sumiiffinni matoqqasuni inuit kikkuugaluartulluunniit isernissamut pisinnaajunnaartitaaffigisimasaanni, assersuutigalugu sanaartorfinni nalunaarsorneqartariaqanngillat. Taamatuttaaq angallassissutit sumiiffinni avinngarusimasuni taamaallaat atorneqartut nalunaarsorneqarnissaat pisariaqanngilaq. Angallassissutit avinngarusimasumi sumiiffimmit imaluunniit sumiiffimmut atorneqartarpat nalunaarsorneqarsimassaaq.

Piumasaqaatit 

Traktoorit aamma atortut motoorillit taamaallaat nalunaarsorneqassapput imaattoqarpat:
  • Taakku sanimut 2,5 meter sipporsimanngikkunikku
  • Akisussaasutut sillimmaserneqarsimagunik
  • Taakku illersorneqarsinnaasumik ajoquteqannginnerat politiinit akuerineqarsimappat

Akileraarut 

Piffissami matumani traktoorit imaluunniit atortut motoorillit nalunaarsornerannut akileraarummik akiliuteqartussaanngilatit. Kingusinnerusukkut oqimaassutsimut akileraarut akilerneqartalissappat, Namminersorlutik Oqartussat nalunaaruteqarumaarput.

Nalunaarsuineq atuiunnaarnissamillu nalunaarneq 

Nalunaarsuineq
Traktoorit imaluunniit atortut motoorilik nalunaarsortinniarukku politiinut saaffiginnissaatit. Makku nassassavatit:
  • Angallassissutaasoq. Nalunaarsuinermi angallassissut illersorneqarsinnaasumik ajoquteqannginnersoq politiinit nalilersorneqassaaq. Politiit pingaartumik qulliit, bremsit, aquut aamma ingerlaarnermi kalerrisaarutit eqqumaffigisarpaat
  • Angallassissutip akisussaasutut sillimmaserneqarsimaneranut uppernarsaat. Uppernarsaat atorsinnaasoq:
    • Sillimmasiinermut uppernarsaat nutaaq
    • Imaluunniit akiliinermit kingullermit police-q aamma akiliinermut uppernarsaat, police-p suli atuuttuuneranik takutitsisoq
  • Nalunaarsuinermi immersuiffissaq immersugaq atsiugarlu

Nalunaarsortinneranut immersuiffissaq

Malugiuk sananeqarnerani normu eqqiarneqarsimassammat politiinullu takutitsinermi ersissalluni.

Illoqarfimmi politeeqarfeqanngitsumi najugaqaruit politeeqarfik qaninnerpaaq attaveqarfigisinnaavat isumaqatigiissuteqarfigalugulu qanoq iliorlutit traktoorit imaluunniit atortut motoorilik nalunaarsortissinnaanerlugu.

Atuiunnaarluni nalunaarneq
Traktoorit imaluunniit atortut motoorilik nalunaarsorneqarunnaassasoq kissaatigigukku, angallassissummik atuiunnaarlutit nalunaaruteqassaatit. Taama iliussaatit assersuutigalugu taanna tunigukku. Matuma kingorna piginnittunngortup pisussaaffigilissavaa nammineq atini atorlugu angallassissut nalunaarsussallugu.

Traktoorit imaluunniit atortut motoorilik atorunnaarlugu nalunaarutiginiarukku, nummerplade politiinut tunniutissavat.

Traktoorit imaluunniit atortut motoorilik taassuminnga tunisinissat sioqqullugu atorunnaarlugu nalunaarutigisimanngikkukku, piginnittunngortup tuaviornerpaamik traktoori imaluunniit atortoq motoorilik nammineq atini atorlugu nalunaarsortariaqarpaa. Piginnittunngortup traktoori imaluunniit atortoq motoorilik nammineq atini atorlugu nalunaarsorpagu, illit atit atorlugu taanna nalunaarsorneqarunnaartoq politiinit ilinnut nalunaarutigineqassaaq. Traktoorip imaluunniit atortup motoorillip tuninerata kinguninngua nalunaarummik politiinit tigusaqanngikkuit pisisoq attavigisariaqarpat.

Ingerlatseriaaseq 

Nalunaarsuinermut uppernarsaat
Suut tamarmik eqqortuusut politiit nalilerunikku nalunaarsuinermut uppernarsaammik politiit ilinnut tunniussissapput assilineralu illit sillimmasiisarfinnut nassiullugu.

Nalunaarsuinermut uppernarsaammi illit sillimmasiinermut normut imaluunniit policenormut allaqqassaaq.

Nummerplade
Nalunaarsuinermut uppernarsaammut ilanngullugu nummerplade ataaseq ilinnut tunniunneqassaaq, taanna angallassissutip siornanut ikkunneqassaaq.

Allannguineq 

Pissutsini ilinnut tunngasuni allannguuteqartoqarpat politeeqarfik qaninnerpaaq saaffigissavat nalunaarsuinermilu uppernarsaammi paasissutissat iluarsitillugit.

Piffissaliussat (atorunnaarsitsineq) 

Piginnittumik allannguisoqassappat piginnittunngortup imaluunniit atuisunngortup piaarnerpaamik kingusinnerpaamillu sapaatit akunneri 3-sut qaangiutsinnagit nalunaarutigissavaat – qamutip ingerlatitsissutip atorunnaarneqartutut nalunaarutigineqanngippat.

Naammagittaalliuteqarneq 

Najukkami politeeqarfimmut imaluunniit Kalaallit Nunaanni Politimestereqarfimmut naammagittaalliuteqartoqarsinnaavoq.
Politeeqarfik Sisimiut
Postboks 110
3911 Sisimiut

Oqarasuaat: (+299) 70 13 22
Fax: (+299) 86 57 78
Oqarasuaat angallattagaq: (+299) 52 77 48
E-mail: grl-sisimiut@politi.dk