Sulisitsisut Allattorsimaffiat – Sulisunik nalunaarusiaq

Sulisitsisut Allattorsimaffiat – Sulisunik nalunaarusiaq 

Sulisitsisutut sulisutit pillugit immersugassamut nalunaarusiussaatit. Paasissutissat tassaassapput sulisup aqqa, inuttut normua, kommune akileraarfia, akissarsiai, akileraarutai A-t, kiisalu AMA (sulisitsisunut akitsuut).

AMA tassaavoq akitsuut illit sulisitsisutut Akileraartarnermut Aqutsisoqarfimmut akiligassat. Inuussutissarsiutitigut ilinniaqqinnernut, pisinnaasanillu ineriartortitseqqinnernut AMA atorneqartarpoq. Akissarsiat 0,9 %-ia AMA-tut akiliutigineqartarpoq.


Sulisunik nalunaarusiaq – Ingerlarnga
Qaammatit tamaasa, qaammatillu tulliuttup ulluisa qulingat nallertinnagu nalunaarusiat tamakku Sulisitsisut Allattorsimaffiannut, Sulisitsisut nalunaarsorneqarfiannut, nalunaarutigisassavatit. Assersuutigalugu januar-i pillugu nalunaarusiaq kingusinnerpaamik februar-ip qulingani nalunaarutigissavat.

Internet aqqutigalugu nalunaaruteqarnissannut periarfissaqarputit. Sulisitsisut Allattorsimaffiannut saaffiginnikkuit internet-ikkut nassitsisinnaanermut isissutissamik tunineqassaatit. Isissutissaq taanna Sulisitsisut Allattorsimaffiata nittartagaanut, paasissutissiivianut isernissannut atussavat. Nittartakkakkut qanoq ilillutit internet-ikkut nassiussisinnaaninnut ilitsersorneqassaatit.

Sulisitsisutut qaammatit tamaasa akileraarutit A-t aamma AMA kingusinnerpaamik qaammatip tulliuttup ulluisa 20-anni akiliisassaatit. Imaappoq, qaammammi januar-imi akileraarutinut A-nut AMA-mullu akiligassatit kingusinnerpaamik 20. februar akilissavatit. Akileraarutinut A-nut AMA-mullu akiliinissannut akiliiffissat, girokort-it GER-normunnik normulikkat, atorlugit akiliissaatit.

Piffissaagallartillugu akileraarutinik A-nik AMA-millu akiliisimanngikkuit tuavisaarinermi akiligassaq sulisitsisutut akilissavat. Tuavisaarinermi akiligassaq akileraarutit A-t 2 %-iatut annertussuseqarpoq, minnerpaamilli 500 kr.-ulluni, annerpaamillu 1.000 kr.-ulluni.

Akiliinermi nassitsiffissanik, girokort-inik nunguutsiguit, Sulisitsisut Allattorsimaffiannut saaffiginninnikkut nassinneqassaatit.


Malugiuk
December-i qaammat nalunaarusiorukku sulisuit sulinngiffeqarnerminni akissarsiassaat, akileraarutissartaasalu ilanngunnissaat eqqaamassavatit, sulisuit sulinnginnerminni akissarsiassaat tunniutereersimanngikkukkit, nalunaarutigereersimanngikkukkillu.

Nalunaarusiatit nassiuttuaannassavatit. Akissarsianilluunniit akissarsisitsisimanngikkuit nalunaaruteqassaatit.

Ukiup qanoq ilinera apeqqutaatillugu sulisoqaruit, soorlu takornariaqarnermi, aalisarnermi piniarnermilu, periarfissaqarputit nalunaarusiornissap siammasinnerusumik, agguataarnerusumillu nalunaarutigisarnissaanut.


Akileraartarnermut Aqutsisoqarfik
Sulisitsisut Allattorsimaffiat
Postboks 1604
3900 Nuuk

Oqarasuaat: +299 34 50 00
Fax: +299 34 65 77
E-mail: sulinal@nanoq.gl
Nittartagaq: sulinal.nanoq.gl