Nuniaffik

Akuleriisillugu meeqqerivik “NUNIAFFIK” meeqqanut 62-nut inissaateqarpoq.
Meeraaqqerivittaani meeqqat 24-it
Meeqqerivittaani meeqqat 38-it inissaqarput.
Ukiumut 2017-imut pilersaarut

Ammasarfiit 

Ataasinngornermiit tallimanngornermut Nal.: 7:00-17:00

Nerisarneq 

Meeraaqqerivimmi: Ullup qeqqasiorneq Nal.: 10:30

Ualikkorsiorneq Nal.: 14:00

Meeqqerivimmi: Ullup qeqqasiorneq Nal.: 11:00

Ualikkorsiorneq Nal.: 14:00

Nerereernerup kingorna meeqqat pisariaqartitaat aallaavigalugit ikorfartorneqarlutik kigutigissartarput.

Aggiussisarneq 

Meeqqat kingusinnerpaamik meeqqerivimmut apuutereersimassapput Nal.: 9:00

Kingusinnerusukkut takkutissappata, napparsimappata, fri-ssappata allamilluunnit peqquteqarlutik takkutissanngippata, Nal. 9:00 nallertinnagu, meeqqanut akisussaasunit meeqqerivimmut nalunaarutigineqareersimassapput.

Taamatut piumasaqarnitsinnut peqqutaavoq, illup iluani arlaannik pilersaaruteqartoqartillugu suliassaqartillugulu, meeqqat aallaqqaataaniit peqataanissaat pingaartinneqartarmat.

Pingaartinneqarportaaq meeqqat angerlarsimaffimminni nerereersimallutik takkuttarnissaat. Peqquteqavillutilli angerlarsimaffimmi meeraq nerisimanngippat, Nal. 7:00 - 8:00 periarfissaqarpoq meeqqerivimmi qorlortitanik nerinissaminut.

Ersarissumilli piumasaqaataavoq ullaakkorsiornerup killigititaa, aammalu ullaakkorsiutit qorlortitat corn flakes-it assigisaallu sukkukitsut nassartittarnissaat angajoqqaat akisussaasullu ataqqissagaat. Tassa meeraq meeqqerivimmi ullaakkorsiussappat kingusinnerpaamik nal.: 8:00 apuutereersimassaaq. Piffissarititaasoq qaangereersimappat angajoqqaat meeqqap meeqqerivimmi ullaakkorsiornissaa nammineerlutik isumagissavaat.

Pinngussanik nassartarneq 

Meeraq pisariaqartitsinini aallaavigalugu pinngussanik nassarsinnaavoq, ilisimasariaqarporli pinngussat nassatai angajoqqaavisa akisussaaffigimmatigik.

Pinngussanik nassarnermi piumasaqaataavoq, meeqqap pinnguaat akisuut, erligisaat ulorianartulluunniit meeqqerivimmut nassartinneqartassanngitsut. Pingaarnertullu meeqqat nassataasa atsiorneqarsimanissaat.

Ilisimaneqassaarlu pinngussat suulluunniit nassarneqartut aserussagaluarpata tammassagaluarpataluunniit meeqqeriviup akisussaaffigisinnaanagillu taarsersinnaanngimmagit.

Sammisaqartitsineq 

Sammisaqartitsineq ullaakkut Nal.: 9:30 iloqqasunngornermik aallarnerneqartarpoq. Taassuma kingorna init namminneq aaliangertarpaat, ullormut suut sammineqassanersut.

Erseqqissaatigineqassaaq nalinginnaanngitsumik pisoqassatillugu, sulisunit pingaartinneqarmat  siumungaaq angajoqqaanut nalunaarutigisarnissaa.

Meeqqeriviup anguniagai 

  • Meeraq toqqissisimalluni meeqqerivimmi paaqqutarineqassasoq.
  • Meeraq ulluinnarni peqqinnartumik inooriaaseqassasoq, nuannaarlunilu meeqqerivimmiissasoq.
  • Meeraq imminut tatiginermik sassarsinnaanermillu peqassasoq.
  • Meeraq inersimasumut tatiginnittuussasoq, ilaminullu ataqqinnittuussasoq.
  • Meeqqat sulisullu imminnut ataqatigiissasut, ammaffigissasullu.
  • Meeraq kinaassusaanik ilinniartinneqassasoq, nammineersinnaaneralu inerisarneqassasoq.
  • Meeraq suliassanut aaliangeeqataasassaaq.
  • Meeqqat inooriaatsimut, avatangiisitsinnullu ataqqinnittuunissaannik naleqqussarneqarlutillu ilinniartinneqassapput.
  • Meeraq ungasarpat ungasarunnaarnissaanut angajoqqaat sulisullu suleqatigiilluassapput.
  • Angajoqqaat sulisullu meeraq pillugu attaveqatigiilluassapput.
  • Meeqqeriviup piumasai/pisinnaatitaaffiilu 

    • Meeraq atsiorsimasunik isersimmateqassaaq.
    • Meeqqat atisassamaataanik peqqumaateqartoqassaaq. Meeraaqqallu angerlalerunik nangissamaateqassallutik.
    • Meeqqat atisaat atsiorneqassapput, amerlasuut assigiinnik peqartarnerat peqqutigalugu.
    • Meeraq 38*C sinnerlugu kissarneqalersimappat, ullormulluunniit arlaleriarluni timmissimappat, tuniluussinnaasumilluunniit nappaateqartoq paasineqarpat, pinngitsoorani angajoqqaanut akisussaasuusunullu nalunaarutigineqassaaq, meeqqat tuniluuttumik nappaatillit meeqqerivimmeeqqusaanngimmata.
    • Meeraq ataavartumik nappaateqanngippat, piffissami sivikitsumi meeqqamut nakorsaatinik tuniaraaneq sulisut pisussaaffigissanngilaat, tamanna angajoqqaat akisussaaffigimmassuk. Pisariaqavissappalli sulisut angajoqqaallu oqaloqatigiissinnaapput.
    • Meeraq silamut naleqquttunik atisalersorneqartassaaq.
    • Piumasaqaataavoq barnevogn-it, sikkilit, qamuteqqaat kurebræt-it allallu nassatat nalillit kælder-imut ilisaqqullugit, tamannalu angajoqqaat namminneq isumagisassarivaat.Taamatut piumasaqartoqarneranut peqqutaavoq, pigisat nalillit kælder-imut inaalinneqarsimanngitsut tammassagaluarpata meeqqeriviup akisussaaffigisinnaanngimmagit, taamaattumillu taarsersinnaanagit.

    Erseqqissaatigineqassaaq nassatat silami matup eqqaaniittut kælder-imut inaalinneqarsimanngippata, meeqqeriviup anerasaartarfiata silataanut inaalinneqarsinnaammata.
    Ajornanngippat meeraq meeraaqqerivimmiit meeqqerivimmut nuunnginnermini nangeqartarunnaarsimanissaa aammalu sinittarnera minnerpaaffianiilersimanissaa kissaatigineqarpoq.
    Meeraq meeqqerivimmiittarunnaassappat, angajoqqaat namminneerlutik pisussaapput Qeqqata Kommuniani, meeqqeriviit allaffeqarfiannut nalunaassallutik.

    Ilisimatitsissutigissavarput piffiassap ilaani Isumaginninnermi ikiortinngornianit, Perorsaasutut ilinniartunik aammalu meeqqat atuarfianneersunik ilinniartuuteqartaratta. 

    Atuisut ataatsimoorfiat 

    Atuisut ataatsimoorfianiipput meeqqerivimmik atuisut tassaasut, meeqqat angajoqqaavi Nuniaffik-milu sulisut.

    Atuisut ataatsimoorfiat ukiumut marloriarluni ataasimut ataatsimeeqatigiittartussaapput. Taakkunanilu pisortaq ataatsimiinnissamut aggersaasuusassaaq,kiisalu ukiumut marloriarluni meeqqap inerikkiartornera pillugu angajoqqaanik aggersaaneq ingerlanneqartarluni, oqaloqatinnerlu inimi sulisuniik ingerlanneqartarluni