Danmarkimi efterskolerneq

Nalinginnaasumik paasissutissiineq 

Efterskole tassaavoq kostskole, atuartup najugaqarfigalugu nerisaqarfigalugu atuarfigisaa. Atuarfiup aaqqissuussaanera naapertorlugu inuusuttut 14-iniit 18-it tikillugit ukiullit atuarfigisarpaat, tunngaviusumik atuarnermi ukioq kingulleq arlallilluunniit atuarfiusinnaalluni.

Inuusuttut piginnaasaqarneri inuttullu ineriartorneri efterskolinit isumagineqartarput, siunissamilu ilinniagaqarnissamut aamma suliffeqalernissamut toqqaaniarnerannut piareersartarlugit.

Efterskolerfissarsiorneq 

Atuarfiit tunngaviusumik naleqartitamikkut aamma atuartitsissutinik neqerooruteqarnermikkut assigiinngitsorujussuupput. Danmarkimi efterskolit 260-it missaanniittut nassaassaapput. www.efterskole.dk-mi efterskolit ataasiakkaat neqeroorutaallu pillugit annertunerusumik atuarsinnaavasi.

Atuartut immikkut pisariaqartitsisut
Meeqqat inuusuttullu immikkut pisariaqartitsisut taamaallaat efterskolinut allatsissinnaapput, atuartunik taakkuninnga atuartuuteqarnissaminnut akuerisaasimagunik. Taamaammat qinnuteqarnissaq sioqqullugu sumiiffimmi najukkassinni inunnik isumaginnittoqarfimmut siunnersortikkumallusi ilitsersorneqarumallusilu saaffiginnissaasi.

Meeqqat inuusuttullu immikkut pisariaqartitsisut matumani pineqartut tassaapput:
  • Meeqqat inuusuttullu annertuumik innarluutillit ikiorserneqartarnerat pillugu maleruagassat naapertorlugit nalunaarsugaasut
  • Angerlarsimaffiup avataanut inissinneqarsimasut

Nittartakkami tilbudsportalen.dk-mi Danmarkimi efterskolit immikkut ittut ataasiakkaat pillugit annertunerusumik paasisaqarsinnaavusi.

Ilaqutariit attaveqaataasut 

Kalaallit atuartut tamarmik efterskolernerminni ilaqutariinnik attaveqarfigisassaminnik peqartussaapput.

Ilaqutariit attaveqaataasut tassaapput kalaallit ilaqutaasut attaveqaataat, assersuutigalugu taakku pisussaatitaapput:
  • Efterskolimi ulloq atuarfiusumi siullermi peqataassallutik
  • Efterskolimi angajoqqaat ataatsimiinnerini peqataassallutik
  • Atuartut sapaatip-akunnerata naanerani aamma atuanngiffeqarnerup nalaani, assersuutigalugu ukiaanerani, juullikkunni, poorskikkunni piinsikkunnilu atuanngiffeqarnerni najugaqartitsissallutik
  • Atuartup napparsimanerata nalaani najugaqartitsissallutik. Atuarfiit ilaasa piumasarisarpaat napparsimanerup nalaani atuartoq efterskolimiunngitsoq najugaqassasoq
  • Atuarnerup aallartinnissaa sioqqullugu aammalu atuarunnaarnerup kinguninngua angerlarnissaq sioqqullugu atuartumik najugaqartitsissallutik

Ilaqutariinnik attaveqarfigisassanik nammineerlusi pissarsissaasi
Ilaqutariinnik attaveqarfigisassanik pissarsigussi, ilaqutariit kikkuuneri nalunaarutigissavasi. Taamalu iliussaasi ilaqutariit attaveqarfiusut pillugit immersuiffissap immersorneratigut. Immersugaq ilaqutariit attaveqarfigisat angajoqqaallu atsiussavaat. Immersugaq qinnuteqaammut ilanngullugu nassiunneqassaaq.

Ilaqutariit attaveqarfigisat pillugit immersugassat aajuk

Isumaqatigiissut isumaqatigiissutigisarsi piareersimassaaq
Ilaqutariit attaveqarfiusut suliassaannut tunngatillugu aningaasartuutaasinnaasut angajoqqaatut nammineerlusi isumagisussaavasi. Taamaammat ilaqutariit attaveqarfiusut isumaqatigiissuteqarfiginissaat isumagissavarsi, aningaasartuutit qanoq isumagineqartassanersut angajoqqaatut isumagisassagassiuk.

Akigititat 

Efterskolimiinnerup ilaa angajoqqaatut nammineerlusi akiligassaraarsi. Angajoqqaat akiliuteqarneranni isumagineqartartut tassaapput efterskolernermut akiliut, nalunaarnermut akiliut aamma Naalagaaffiup tapiissutaa Namminersorlutillu Oqartussat tapiissutaat peereerlugit qularnaveeqqutitut akiliut.

Angajoqqaatut akiliutit annertussusaat efterskolimiit efterskolimut assigiinngitsorujussuusinnaapput:
• Danmarkimi efterskolit amerlasuut nalunaarnermi akiliummik imaluunniit qularnaveeqqummik akiliummik piumasaqaateqartarput
• Ilissi inoqutigiit isertitasi najoqqutaralugit Naalagaaffiup tapiissutaa naatsorsorneqartarpoq, efterskolerluni ukiup aallartinnissaa sioqqullugu ukiut marluk sioqqullugit isertitat aamma meeqqat 18-it inorlugit ukiullit angerlarsimaffimmi qanoq amerlatigisut najugaqarnersut najoqqutaralugit

Tamatuma kingunerissavaa angajoqqaat sapaatip akunneranut agguaqatigiissillugu ima akiliisalernerannik. Efterskolit ataasiakkaat namminneq angajoqqaat akiliutaannik aalajangersaasarmata angajoqqaat akiliutigisarpiaat allanngorarput.

Ukiumut aningaasarsiat Sap. akun. akiliutit
Gruppe I: 0 – 340.000 0 kr.
Gruppe II: 340.000 – 500.000 500 kr.
Gruppe III: 500.001 – qummullu 1.150 kr.

Qatanngutit 18-it inorlugit ukiullit eqqarsaatigalugit angajoqqaat akiliuteqartarnerisa appartinneqarnerat:
• Meeqqamut 18-it inorlugit ukiulimmut ataatsimut ukiumut aningaasarsiat 30.000 kr.-inik appartinneqassapput
• Qatanngutigiit 18-it inorlugit ukiullit efterskolimiittut arlaqarpata meeqqat aappaanniit qummut tamakkiisumik tapiissuteqartoqassaaq

Nittartakkami www.efterskole.dk-mi nassaarineqarsinnaavoq ”prisberegner” akinik naatsorsuinissamut ilitsersuut, tassani efterskolinut ataasiakkaanut nammineerlusi akiliutissarsi naatsorsorsinnaavarsi. Eqqaamallugu Namminersorlutik Oqartussat tapiissutaat ilissi nammineerlusi akiliutissassi naatsorsornerini piissagassigit.

Nammineq akiliutissat naatsorsukkit

Aningaasartuutit allat
Nammineq akiliutit saniatigut angajoqqaatut isumagisussaavasi aningaasartuutit makkununnga tunngasut, assersuutigalugu:
• Kaasarfimmiut
• Atisat
• Atortussat pisariaqartut allat. Efterskolit ilaasa piumasarisarpaat, assersuutigalugu atuartut sikkileqartinneqassasut
• Angalanermi aningaasartuutit, illoqarfigisamit aallarneq angerlarnerlu minillugit
• Nakorsaatit tunniunneqartartut
• Kigutit nakorsaaniinnerit
• Ilaqutariit attaveqaataasut suliassaannut atatillugu aningaasartuutit

Qinnuteqarneq 

Danmarkimi efterskolernissamut meeqqassi qinnuteqaassunnissaa nammineerlusi isumagissavarsi. Atuarfimmi siunnersuisartumit imaluunniit efterskolernissaq pillugu kommunip isumaginnittussatut sulisuanit qinnuteqarnermut ikiortissarsisinnaavusi.

Efterskolit qinnuteqaateqarnermi periutsinik assigiinngitsunik atuisarput. Efterskole naleqquttoq nassaarereerussiuk akuerineqarnissamut qanoq qinnuteqarnissaq tusagaqarfigiumallugu efterskolimut attaveqarsinnaavusi.

Ilanngussassat pingaarutillit
Meeqqassi efterskolimit akuerineqarnissaa qinnuteqaatigigussiuk, ikinnerpaamik qinnuteqaatip nassiunnerani ilanngutissavasi:
  • Efterskolip aallartinnissaa sioqqullugu ukiut marluk siuliinut tunngatillugu ukiumoortumik isertitasi
  • Ilanngussassat allat efterskolimit qinnuteqaammut ilanngunneqartussatut kissaatigineqarsinnaasut

Qinnuteqarnissamut killiliussat 

Piffissamik killiliisoqanngilaq, taamaallaat Ilinniartitaanermut Aqutsisoqarfiup eqimattakkaartuni angalanissaq isumagissappagu qinnuteqarnissamut ulloq 15. marts 2017 killigitinneqarpoq.

Namminersorlutik Oqartussanit tapiissutinik qinnuteqarniarussi efterskolimiit atualernissaq pillugu akuersissummik pissarsisimassaasi. Maluginiassavarsi efterskolit nammineerlutik qinnuteqarnissamut killiliussanik peqartarmata.

Malugiuk
Efterskolimut immikkut ittumut akuerineqarnissamut qinnuteqarniarussi, piffissaalluartillugu qinnuteqartariaqarpusi, tassami atuarfinnut taakkununnga utaqqisunut allattorsimaffiit piusinnaasarmata.

Eqqaamallugu nuunnermut nalunaarnissaq
Naalagaaffimmit tapiiffigitinniaraanni Danmarkimilu nakorsiartarnermut allagartamik peqarniaraanni, atuartoq efterskolerisap najugaanut inuit allattorsimaffiatigut nalunaarsimasariaqarpoq. Aallannginnermi najukkassinni innuttaasunut sullissivik aqqutigalugu nalunaarsinnaavusi imaluunniit efterskolimut tikereernerup kingorna aamma nalunaarsinnaallusi. Efterskolimi sulisut isumaqatigiissusiorfigisinnaavasi qanoq iliussanerlusi.

Allaaserisat attuumassutillit

Oqaatsinik Pikkorissarfik
Siimuup Aqq. 32
Box 3019
3911 Sisimiut
Kalaallit Nunaat

Oqarasuaat: (+299) 86 67 00
Fax: (+299) 86 68 00
E-mail: sprogcenter@oqaatsit.gl

Allaffiup ammarsarfii
Ulluinnarni 8.00-16.00

Oqarasuaatikkut ammasarfiit
Ulluinnarni 9.00-12.00 aamma 13.00-15.00