Meeqqat atuarfii

Ukiut kingulliit ingerlanerini Qeqqata Kommuniani meeqqat atuarfii annertuumik ineriartorsimapput. Ukiuni tulliuttuni ineriartorneq aamma ingerlajuartussaavoq. Kalaallit Nunaanni Kommunini siullersalluni Qeqqata Kommunia iPad aqqutigalugi It-lerinermik ineriartortitsineq tunaartaqarniarpoq. Ukioq 2014 aallartimmat atuartut ilinniartitsisullu tamarmik iPad-inik tuniorarneqarput, atuartitsinermut angerlarsimaffimmilu iluaqutissatut atugassaannik. Taamaaliornitsigut kommunimi naatsorsuutigaarput ilinniartitsinermi angusat pitsaanerusumik inerneqarnissaat, taamatullu It eqqarsaatigalugu atuartut tamarmik siunissami atuartunut
tamanut assigiimmik, ineriartornikkut katataannginnissaat anguniarlugu.
Taamatuttaaq meeqqat atuartut ilinniaqqinnissamut piareersimallutik meeqqat atuarfiannik qimatsinissaat suliniutigivarput. Taamaattumik isiginiakkatta ilagivaat atuarfiup angerlarsimaffiullu iluanni suleqatigiinnissaq, kiisalu meeqqerivimiit atuarfimmut ikaarsaariarnissamut, aammali ilinniaqqinnissamut ikaarsaqqinnissaq.
Qeqqata Kommuniani atuarfiit katillutik qulingiluaapput. Nunaqarfiit tamakkerlutik ataatsimik atuarfeqarlutik, Maniitsumi ataatsimik atuarfeqarluni Sisimiunilu atuarfiit marluullutik.