Knud Rasmussens Højskolia

Sisimiuni Højskoli Kalaallit Nunaanni Højskolini siullersaalluni pilersinneqarpoq, Kalaallit Nunaannilu Højskolini marluusut aapparalugu. Højskolip aappaa Qaqortumiippoq.
KRH

Højskolip atuunnera 

Modulinut marlunnut avillugu, modulini tamani sapaatip akunnerini 16-ini atuartussanngorluni, qaammatit arfineq-pingasut missaanni atuartitsissutinut tullinnguuttunut højskolernissamik Højskoli neqerooruteqartarpoq: qallunaatut, tuluttut, kalaallisut, Kalaallit oqaluttuarisaanerat, kulturi, isiginnaartitsineq, assassorneq, aningaasanik aqutsineq, inuttut ineriartorneq, timersorneq il.il.


Tamatuma saniatigut pikkorissarnernik, soorlu ilaqutariinnut højskolertitsinermik kiisalu naqinnernik ilisarsisinnaanngitsunut pikkorissarsitsinernik højskoli neqerooruteqartarpoq. Aasaanerani atuartoqartinnagu, assersuutigalugu utoqqaat kattuffiata aamma meeqqanut inuusuttunullu kattuffiinit ilaasortaqarluni kattuffik SORLAK pikkorissaasitsinerminnut atortarpaat.


Atuarfiup oqaluttuarisaanera 

Højskoli ”Inuunerup atuarfia”-nik taaneqartartoq 1962-imi juulip pingajuani pilersinneqarpoq, atorluarneqarneralu pillugu 1980-imi allilerneqarluni.


Højskoli 1977-imi annertusineqarluni ”Arnat Ilinniarfiat” pilersinneqarpoq, tassanilu atuartut ”kalaallisuuliorneq ammerinerlu” inuutissarsiutigisinnaanngorlugit ilinniarsinnaanngorlutik. Ilinniarnerup nalaani atuartut naqqanit kalaallisuuliornermik ilinniartarput – ammerinermit kalaallisuuliornermut. Taamaakkaluartoq piffissap ingerlanerani Arnat Ilinniarfiat Højskolimit immikkoortinneqarpoq.

Kalaallit ileqquisa sanaluttagaasalu attatiinnarneqarnissaannut pigiinnarnissaanullu Knud Rasmussenip Højskolia ukiut ingerlanerini tapertaavoq. Tamatuma saniatigut nutaaliorluni suliniutinut, soorlu naqinnernik ilisarinnissinnaanngitsunut ilinniartitsinernut, innarluutilinnut ilinniartitsinernut kiisalu pineqaatissinneqarsimasunut inissiisarfimmiittunut ilinniartitsinernut højskoli siuttuusimavoq.

 

Atuarfik pillugu 

Højskoli 18-inik ataasiittarissanik ineerartaqarpoq, marluuttarissanillu aqqanilinnik ineerartaqarluni kiisalu innarluutilinnut atortinneqartartunik marlunnik initaqarluni. Nalinginnaasumik 49-nik atuartuuteqarsinnaavoq, atuarfiulli oqoqarnera patsisaalluni upernaakkut 28-innaat atuartuutigineqarlutik.

Højskolip annertuumik nutarterneqarnissaanut atatillugu Højskoli Namminersorlutik Oqartussanut aningaasaateqarfinnullu assigiinngitsunut tapiiffigineqarnissaminik qinnuteqarnikuuvoq. Qinnuteqaatit taakku akineqarnissaat suli utaqqivaat. Højskoli ukiorpassuarni atorneqarsimanermigut nutaanngilisimaqimmat, nutarterinissat piaartumik aallartinneqassasut neriuutigineqarpoq.

Knud Rasmussennip højskolia

Aqqusinersuaq 99<br>

(+299) 86 40 32

krh@krh.gl