Toqukkut qimagunneq – Aningaasaqarneq

Toqukkut qimagunneq – Aningaasaqarneq 

Toqukkut qimagunneq ilaqutaasunut qimagaasunut arlalitsigut aningaasatigut kinguneqaateqarsinnaavoq. Uani aningaasatigut kinguneqaataasinnaasut pillugit takussutissiamik pissarsisinnaavutit, illit ilaqutaasutut eqqumaffigisariaqakkannik.


Toqukkut qimaguttumik angerlamut angallassineq
Inuit peqqinnissaqarfiup oqartussaaffigisaanik katsorsartinnermik nalaanni toqukkut qimaguttut katsorsartittutut oqariartaatsimut ilaanngillat. Peqqinnissaq pillugu inatsit malillugu toqukkut qimaguttup ilaqutaasa ilisiffiusussatut kissaatigisaannut illoqarfimmut imaluunniit sumiiffimmut angallassinermut atatillugu aningaasartuutit matussusernissaannut peqqinnissaqarfik pisussaaffeqanngilaq.

Taamaattoq ileqquuvoq inuk katsorsartinnerup Kalaallit Nunaanni peqqinnissaqarfimmit aallartinneqarlunilu aningaasalersorneqartup nalaani, angerlarsimaffigisap avataani toqukkut qimagukkaangat ilaqutaasunut qimagaasunut imaluunniit kingornussisussanut aningaasanik peqqinnissaqarfiup akiliuteqartarnera.

Aningaasat nalinginnaasumik billet-ip angeqqatigisarpai ilaasumut issiasumut atorneqartartut, illoqarfigisamut nunaqarfigisamulluunniit toqukkut qimaguttup inuttut allattorsimaffimmi angerlarsimaffigisaanut.

Aningaasanik tunniussineq taamaallaat pisinnaavoq qarasaasiakkut allakkanik piumasaqaatinik nassiussinikkut uunga sundhedsledelsen@peqqik.gl.


Umiarsuakkut timmisartukkulluunniit angallassineq
Umiarsuakkut aamma timmisartukkut angallassinermi toqukkut qimaguttoq illerfimmi zink-iusumiissaaq. Angallassineq nunami namminermi pitillugu taamaallaat atuuttuunngilaq, kisiannili aamma nunat allat (Danmark ilanngullugu) Kalaallit Nunaatalu akornanni angallassisoqaraangat atuuttarpoq.

Umiarsuakkut angallassineq timmisartukkut angallassinermit akikinneruvoq, kisianni soorunami umiarsuakkut angallassinermi piffissaq sivisunerusarpoq.

Illerfiit angallanneqarnerannut akit Air Greenland-imut imaluunniit Royal Arctic Line-mut saaffiginninnikkut pissarsiarineqarsinnaapput. Toqukkut qimaguttup ilaqutaasa angallassinermut aningaasartuutit isumagisassaraat.


Illerfiit zink-it
Kalaallit Nunaanni
Illerfiit zink-it Nuummi immaqalu illoqarfiit ilaanni anginerusuni sananeqartarput. Illoqarfinni mikinerusuni nunaqarfinnilu illerfinnik zink-inik inniminniinissamut periarfissaqarpoq, taama ittumillu nassiussisoqarsinnaalluni. Illerfik zink-iusoq 15.000 kr.-it missaat tikillugit akeqarsinnaavoq. Taassuma saniatigut illerfimmik matusineq ilaqqiissutaasinnaalluni.

Illerfimmut aamma illerfimmut zink-imut aningaasartuutit ilaqutaasunit akilerneqartarput. Ilaqutaasut qimagaasut imaluunniit kommunerisaq isumaqatigalugu angallassinermut iliuusissat nalinginnaasut peqqinnissaqarfimmit isumagineqartarput.

Nunani allani
Ilaqutaasut qimagaasut imaluunniit kommunerisaq namminneerlutik najukkami ilisinermik suliaqartumut illerfimmik zink-imik angallassinissaq aamma akissaa pillugu isumaqatigiissusiussapput


Timimik ikuallaaneq aamma arsakkut puuat
Inuk nunani allani (Danmark ilanngullugu) toqukkut qimagussimappat, timimik ikuallaanissamut periarfissaqarpoq. Tamatuma kingorna ikuallatap arsaasa puuat ilaqutaasunit ilisiffissamut assartorneqassaaq imaluunniit Kalaallit Nunaanni nassiussiffigineqaqqusamut nassiunneqarsinnaalluni.

Ilaqutaasut qimagaasut imaluunniit kommunerisaq namminneerlutik najukkami ilisinermik suliffeqarfimmut timimik ikuallaanissaq pillugu iliuusissat nalinginnaasut aamma akit isumaqatigiissuteqarfigissavaat. Timimik ikuallaanermut kiisalu angallassinermut aningaasartuutit ilaqutaasunit isumagineqassapput.


Soraarnerussutisiat
Toqukkut qimagunnerup kingorna qaammatip qaangiunnerani soraarnerussutisiat unittarput. Katissimasut pineqarpata marluullutillu soraarnerussutisiaqarpata, katissimasap qimagaasup soraarnerussutisiai toqukkut qimagunnerup kingorna qaammatip ataatsip qaangiuttup aallaqqaataanit kisermaajusup pisartagaanut allanngortinneqassapput.


Aningaaserivimmi konto-t
Toqukkut qimaguttoqarneranik nalunaarneq nalunaarsorneqareerpat, toqukkut qimaguttup aningaaserivimmi konto-i aamma konto-t ataatsimoorussat matuneqartarput. Konto-t taakku aatsaat ammaqqinneqartarput eqqartuussivimmi kingornussisussaanermut suliaq naammassereeraangat aammalu eqqartuussiviup uppernarsaataanik takutitsisinnaanngoruit. Taamaammat illit qimagaasutut isumagissavat akissarsiatit, soraarnerussutisiatit imaluunniit allatut isertitatit konto-mut matoqqasumut, toqukkut qimaguttorlu pigisassinnut ikineqannginnissaat.

Ilinnut nammineq konto-ssannik nutaamik ammaatitsiniarlutit aningaaserivik attaveqarfigissavat aammalu illit sulisitsisunnut allanullu illit konto-nnut aningaasanik ikisisussanut, konto-it normua nutaaq ilisimatitsissutigissavat.


Ilisineq
Ilisinermut aningaasartuutit, soorlu illerfimmut, ilivissamik assaanermut aamma kaffillernermut aningaasartuutit inniminniisumit akilerneqaqqaassapput. Ilisinermi aningaasartuutit nalinginnaasut toqukkut qimaguttup pigisaanit kingornatigut utertillugit tunniunneqarsinnaapput, pigisani aningaasanik sinneqartoqarsimappat.

Pinerluttoqarnera peqqutigalugu inuk toqukkut qimagussimappat, pinerluuteqarsimasoq ilisinermut aningaasartuutinik taarsiisussanngorlugu pinerluttulerinermi suliap suliarineqarnerani eqqartuunneqarsinnaavoq. Politiit qimagaasut ilitsersussavaat pinerluttulerinermi suliap suliarineqarnerani taarsiivigineqarnissamik piumasaqarsinnaanerat pillugu.

Naak pinerluttulerinermi suliamik ingerlatsisoqanngikkaluartoq pisut ilaanni ilisinermut aningaasartuutinik taarsiisoqarnissaa piumasaqaatigineqarsinnaavoq. Ilaquttannik qaniginerpaasannik annaasaqaruit isumaqaruillu ilisinermi aningaasartuutit taarsissussatut akisussaasuusumit matussuserneqassasut, taava najukkanni inatsisitigut ikiorsiisarfik attaveqarfigisinnaavat.

Toqukkut qimaguttoq illerfissarsiuussileqatigiinni ilaasortaasimappat peqatigiiffik ilisinermut akileeqataasinnaavoq. Tapiissutit annertussusaannut Illerfissarsiuussileqatigiiffiup nammineq malittarisassai aalajangiisuusarput. Taamaammat paasissutissanik sukumiinerusunik pissarsiumaguit najukkanni illerfissarsiuussileqatigiit attaveqarfigissavatit.


Eqqartuussivimmut, kingornussinermut imaluunniit pigisanut akitsuut
Kalaallit Nunaanni toqusup pigisaanik suliaqarnermi eqqartuussivimmut, kingornussinermut imaluunniit pigisaanut akitsuummik akiliisoqarneq ajorpoq. Pigisat Kalaallit Nunaata avataaniippata nunanut allanut akitsuutinik akiliisoqarsinnaasarpoq, naak toqukkut qimaguttup pigisai Kalaallit Nunaanni suliarineqaraluartut.

Allaaserisat attuumassutillit

Peqqissutsimut Naalakkersuisoqarfik
Imaneq 1A - 401
Postboks 1160
3900 Nuuk

Oqarasuaat: (+299) 34 50 00
Fax: (+299) 34 55 05
E-mail: pn@nanoq.gl
Nittartagaq: www.naalakkersuisut.gl