Peqqinnissaqarfik – Taarsiineq

Peqqinnissaqarfik – Taarsiineq 

Taarsiiffigitinnissaq pillugu qinnuteqarsinnaavutit:
  • peqqinnissamut tunngasutigut sullissisoq ilinnik suliarinninnerminut atatillugu peqqinnissakkut sullissinerminut atatillugu kukkussuteqarsimappat
  • napparsimasutut naammagittaalliutit akuerineqarsimappat, peqqinnissamullu tunngasutigut sullissinermi kukkusoqarsimappat
  • inuttut ajoqusersimaguit, peqqinnissamut tunngasutigut sullissisup toqqaannartumik kukkussuteqarnerata malitsigisaanik

Taarsiiffigineqarnissamut piumasaqaateqarsinnaavutit:
  • Sulinikkut iluanaarutisiassanit annaasat
  • Anniaateqalerneq
  • Ataavartumik innarluuteqalerneq
  • Inuussutissarsiorsinnaassutsimik annaasaqarneq
  • Pilersuisumik annaasaqarneq
  • Kukkusumik suliaritinnerup malitsigisaanik peqqissartinnermut atatillugu aningaasartuutit allatigullu annaasaqarnerit

Taarsiissuteqarfigitinnissat ilaanni piumasaqaataasarpoq aningaasatigut annaasaqarsimaneq.


Namminersortumit sullinneqarsimaneq
Peqqinnissakkut sullissisoq namminersortoq, allatut periaaseqarluni suliarinnittartoq imaluunniit tamatumunnga assingusumik suliaqartartoq saaffigisimagukku, pisortanit taarsiiffigitinnissat piumasarisinnaanngilat.

Tamakkunnga ilaanngillat kigutit nakorsaat namminersortut pillugit naammagittaalliuteqarnerit.


Killissarititaasut
Aammattaaq eqqumaffigissavat tamakkiisumik ilaannakortumilluunniit taarsiiffigitinnissannut pisinnaatitaaffiit annaasinnaagakku, ajutoornerup ilaanut tunngatillugu illit nammineq pisuussuteqarsimaguit imaluunniit annaasaqarnerit annikinnerulersinniarlugu arlaatigut iliuuseqarsimanngikkuit.

Ajutoornermi ataatsimi marloriaammik taarsiiffigitissinnaanngilatit. Assersuutigalugu sulinikkut iluanaarutisiassanit annaasatit sillimmasersimanikkut matussusersimagukkit, peqqinnissaqarfimmit taakku matussuserneqarnissaat piumasaqaatigisinnaanngilat.

Aammattaaq suliaritinninnut atatillugu akornuteqarsimaguit aamma iluaagisaqarsimaguit, taakku pillugit taarsiiffigitissinnaanngilatit.


Qinnuteqarneq
Taarsiiffigitinnissat qinnutigisinnaavat piumasaqaatit uunga nassiullugu:

Peqqissutsimut Attaveqarnermullu Naalakkersuisoqarfik

Taarsiiffigitinnissamut qinnuteqaat aningaasartuutinut naatsorsuusiamik taarsiiffigitikkusutatut kissaatigisannik imaqassaaq, taakku naatsorsorneqarsinnaappata. Ajornanngippat aningaasartuutinut taarsiiffigitikkusutannut uppernarsaammik ilanngussigit.


Atorunnaarfissaa
Taarsiissutisinissamik piumasaqaat ukiut 5-t qaangiunneranni atorunnaassaaq. Piffissaliussaq naatsorsorneqassaaq piffissamit ajoqusernerup ilinnit ilisimaneqalerneraniit imaluunniit ilinnit ilisimasaqarfigilerneraniit. Piffissaliussap naannginnerani ajoquserneq nalunaarutigisimangikkukku, suliassiissutit suliarisinnaanngilarput.


Nakorsartittup naammagittaalliuutaa
Peqqinnissaqarfimmi sullinneqarneq pillugu naammagittaalliutivit tunniunnerani peqatigitillugu taarsiivigineqarnissamik piumasaqaatitit tunniussinnaavatit.

Nakorsartittup naammagittaalliutaa qanoq tunniunneqarsinnaanersoq sukumiinerusumik atuarsinnaavat allaaserisami: Peqqinnissaqarfik – Nakorsartittup naammagittaalliuutaa.

Takusinnaavattaaq www.peqqik.gl
 

Allaaserisat attuumassutillit

Peqqissutsimut Naalakkersuisoqarfik
Imaneq 1A - 401
Postboks 1160
3900 Nuuk

Oqarasuaat: (+299) 34 50 00
Fax: (+299) 34 55 05
E-mail: pn@nanoq.gl
Nittartagaq: www.naalakkersuisut.gl