Peqqinnissaqarfik – Nakorsartittup naammagittaalliuutaa

Peqqinnissaqarfik – Nakorsartittup naammagittaalliuutaa 

Peqqinnissaqarfimmi sullinneqarneq pillugu naammagittaalliorsinnaavutit, makkuninnga imaqartoq:
  • Misissortinneq
  • Nappaatip suuneranik paasisaqarneq nappaammullu katsorsartinneq
  • Erninermi ikiorteqarneq
  • Paaqqutarinninneq
  • Napparsimasunut ataasiakkaanut tunngatillugu pinaveersaartitsineq peqqinnissamilu siuarsaaneq
  • Suliaritinnissamut paasissutissinneqarneq akuersissuteqarnerlu
  • Nappaatip nalunaarsornera
  • Peqqinnissaqarfimmi sulisut nipangiussisussaatitaanerat
  • Nakorsamit allagartaliussat

Oqaloqateqarneq
Naammagittaalliuteqannginninni isumaliutigisariaqarpat sumiiffimmi pisimasoq sulisut peqatigalugit eqqartoqqaarusunnerlugu. Pisinnaatitaaffigaat sulisunik imaluunniit najukkanni pisortaasoq nammineerlutit oqaloqatiginerisigut misigisimasatit saqqummiunnissaanut. Tamanna amerlasuutigut pisimasup sukkasuumik piaartumillu nassuiarneqarnissaanut aqqutissaasinnaavoq. Sulisut suliamut qanoq isumaqarnertik paatsooqatigiissinnaanerillu pillugit saqqummiussisinnaassagunik nuannaarutigisussaavaat.

Oqaloqatigiinneq amerlanertigut peqqinnissaqarfimmi sulisut ilinnik passussisimasut peqatigalugit pisassaaq, taamaaliortoqarneratigullu passuneqarnerpit nammineerlutit qanoq misigisimanerlugu saqqummiunnissaanut periarfissaqassaatit. Imaassinnaavoq paasisimanngisannut apeqqutissaqartutit. Aamma imaassinnaavoq sooq taamak iliorsimanerannut nassuiaanneqarnissamik pisariaqartitsisutit.

Napparsimasunut amerlasuunut oqaloqateqarneq misigisimasamik iluaatsumik unitsitsisinnaavoq.

Oqaloqateqarnissamut akuersiguit imaanngilaq naammagittaalliuteqarnissannut naaggaartutit. Oqaloqateqarnerup kingorna naammagittaalliuteqarnissat kissaatigigukku soorunami pisinnaatitaaffigaat. Kingusinnerusukkut naammagittaalliuteqassaguit naammagittaalliutip qanoq inernilerneqarnissaanut oqaloqateqarsimanerit sunniuteqarnavianngilaq.


Allat sinnerlugit naammagittaalliuteqarneq
Angajoqqaat meeqqatik 18-it inorlugit ukioqarpata meeqqat sinnerlugit naammagittaalliuteqarsinnaapput. Nakkutiginnittut inuk pineqartoq sinnerlugu naammagittaalliuteqarsinnaapput.

Alla sinnerlugu naammagittaalliuteqarniaruit pisinnaatitsissummik atsiorneqarsimasumik ilanngussissaatit. Tamannattaaq periuserineqassaaq qanigisat pineqartillugit, soorlu angajoqqaat, qitornat inersimasut, aappaasut inooqatigisalluunniit.

Qitornaasut, angajoqqaajusut, aappaasut inooqatigisalluunniit ilaqutaasoq toqukkut qimagussimasoq sinnerlugu naammagittaalliuteqarsinnaapput.


Naammagittaalliummik tunniussineq
Peqqinnissaqarfimmi sullinneqarneq pillugu naammagittaalliummik tunniussiniaruit, naammagittaalliornermi immersugassamik immersuissaatit atsiorlutillu: Peqqinnissaqarneq pillugu sullinneqarninni naammagittaalliuteqarneq.

Naammagittaalliutigisat suliarineqassappat paasissutissat makku pisariaqartinneqarput:
  • Illit aqqit, najukkat inuullu normua
  • Oqarasuaatip normua aamma/imaluunniit e-mail
  • Suut naammagittaalliutiginiarnerlugit nassuiaatit
  • Pisoq sumi qangalu pisimanersoq

Sulisut naammagittaalliutiginiakkavit aqqi atorfiilu eqqaamasinnaagukkit pisimasup qulaajarniarneranut iluaqutaassaaq.

Naammagittaalliut uunga nassiutissavat:

Nunatsinni Nakorsaaneqarfik
Postbox 120
3900 Nuuk
Oqarasuaat: 34 51 92
Telefax: 32 51 30
Mail: nun@nanoq.gl


Piffissaliussaq
Peqqinnissaqarfimmi sullinneqarneq pillugu naammagittaalliutigineqartoq pisup naammagittaalliutiginiakkavit piffiani ilisimalikkavit imaluunniit ilimasassaraluavit ilisimalerneraniit kingusinnerpaamik ukiut marluk qaangiutsinnagit tunniunneqareersimassaaq. Passussisimanerup pereerneraniit ukiut tallimat kingusinnerpaamik qaangiutsinnagit naammagittaalliuteqarsimassaatit.


Taarsiineq
Kukkusumik passunneqarsimaninnut naammagittaalliutivit tunniunnerani peqatigalugu taarsiiffigineqarnissamik qinnuteqarsinnaavutit.

Taarsiiffigineqarnissamik qanoq qinnuteqassanersutit pillugu sukumiinerusumik atuarsinnaavutit allaaserisami: Peqqinnissaqarfik – Taarsiineq

Takusinnaavattaaq www.peqqik.gl 

Allaaserisat attuumassutillit

Peqqissutsimut Naalakkersuisoqarfik
Imaneq 1A - 401
Postboks 1160
3900 Nuuk

Oqarasuaat: (+299) 34 50 00
Fax: (+299) 34 55 05
E-mail: pn@nanoq.gl
Nittartagaq: www.naalakkersuisut.gl