Nunaminertamik atugassiisarneq – Nalinginnaasumik paasissutissiineq

Nunaminertamik atugassiisarneq – Nalinginnaasumik paasissutissiineq 

  • Qeqqata Kommunia

    Sisimiuni Maniitsumilu Teknikkimut Avatangiisinullu immikkoortortap illoqarfiit killeqarfiisa iluini kiisalu kommunip nunaqarfiisa killeqarfiisa iluini nunaminertanik agguaasarnerit ingerlatarai. Asimi nunaminertanik atugassanngortitsisarnerit Namminersorlutik Oqartussanit ingerlanneqarallarput - kommunili aqqutigalugu qinnuteqartoqartassaaq.

    Qeqqata Kommuniani nunaminertamik atugassinneqarnissamut NunaGIS aqqutigalugu qinnuteqarsinnaavutit.

    Qinnuteqaat qanoq immersorneqarnissaanik ilitsersuut takusinnaavat.

    Qinnuteqaatit atsiorukku aatsaat atuussinnaavoq. Taamaammat qarasaasiakkoortumik atsiortarnerup atuutilernissaata tungaanut qinnuteqaat, taassuma immersorneranut atatillugu, suli atsiortussaatitaavutit. Tamatuma kingorna qinnuteqaat najukkanni innuttaasunik sullissivimmut imaluunniit nunaqarfiup allaffianut tunniutissavat.

    Malugiuk
    NunaGIS.gl aqqutigalugu nunaminertamik atugassinneqarnissamik qinnuteqarsimaguit, akiligassap allagartaa atsiugaq najukkanni innuttaasunik sullissivimmut imaluunniit nunaqarfiup allaffianut kingusinnerpaamik sapaatit akunneri sisamat qaangiutsinnagit nassiulluguluunniit tunniutissavat, akiligassallu allagartaa Teknikkimut Avatangiisinullu immikkoortortamut ingerlateqqinneqassalluni. Akiligassap allagartaa sapaatit akunneri sisamat qaangiutsinnagit Teknikkimut Avatangiisinullu immikkoortortap tigusimanngippagu qinnuteqaatit atorunnaarsinneqassaaq.

    Akigititat
    Akigititat atuuttut kommunip akinut allattorsimaffianni takusinnaavatit.

    Akit allattorsimaffiat - 2017
Illit innuttaasutut, inuinnartut suliffeqarfittulluunniit assersuutigalugu illuliorusukkuit atuisinnaatitaavutit. Nunaminertamik atugassinneqarnissamut qinnuteqaateqarnikkut nunaminertamik atuisinnaatitaavutit.

Qinnuteqarneq
Assersuutigalugu nunaminertamik atugassinneqarnissamik qinnuteqarsinnaavutit:
  • angerlarsimaffimmik imaluunniit illumik sananiaruit
  • illumik pisisimaguit – eqqaamallugu qinnuteqarninni piginnittuunermut uppernarsaativit imaluunniit akuersissutip pigisavit assilinera tunniutissagakkui
  • illuutit allilissagukku
  • illup atorneqarnera allanngortissagukku, soorlu pisiniarfimmiit najugaqarfimmut
  • imermut kuuffeqarfimmullu aqqusersuutinik ikkussuissaguit
  • nunaannarmi parapolantenne-mik nappaassaguit
  • biilinut unittarfiliussaguit
  • asimi nunaannarmi illuaraliussaguit
  • soorlu angallammik container-imilluunniit inissiissaguit

Periutsit marluk atorlugit kommunimut nunaminertamik atugassinneqarnissamik qinnuteqarsinnaavutit:
  • Nittartagaq www.nunagis.gl aqqutigalugu qinnuteqarsinnaavutit. NunaGIS tassaavoq Kalaallit Nunaat tamakkerlugu nunap assinginik digital-iusunik toqqortaqarfik. NunaGIS aqqutigalugu qanoq iliorlutit qinnuteqarnissannut ilitsersuunneqarsinnaavutit
  • Imaluunniit najukkanni innuttaasunut sullissivik imaluunniit nunaqarfiup allaffia attaveqarfigisinnaavat, tassanngaanniillu ilitsersorneqarsinnaallutit

Suleriaaseq
Pingaarnertut qinnuteqaatit tamanut ammasumik saqqummiunneqassaaq, taamaalillunilu kikkut tamarmik akerliliissuteqarnissamut periarfissinneqassallutik. Nunaminertamik atugassinneqarnissamut qinnuteqaatit kommunimi pilersaarummut nassuiaasersorluakkamut naleqquppat, kommunip nunaminertamik atugassinneqassasutit aalajangersinnaavaa. Tamanna qinnuteqaat tamanut ammasumik saqqummiuteqqaanngikkaluarlugu pisinnaavoq, kisiannili tamanna nalinginnaasuunngilaq.

Qinnuteqaatit kommunimi pilersaarummut uniuuppat, kommunip pingaarnertut qinnuteqaatit itigartitsissutigissavaa. Pisulli ilaanni nunaminertamut qinnuteqaatigineqartumut immikkut ittumik akuerissallutit kommune aalajangersinnaavoq. Kommunip tamanut ammasumik saqqummiussereernermigut aammalu nunaminertamik atugassinneqarninni kalluarneqartussanut tusarniaareernermigut tamanna akuerisinnaavaa.

Sumiiffiup ilaanut nunaminertap qinnuteqaatigisavit inissisimaffianut kommune kommunimi pilersaarummik akuersissuteqarsimanngippat, kommune sumiiffimmut kommunimut pilersaarummut tapiliussamik akuersissuteqarsinnaavoq, imaluunniit tamanut ammasumik tusarniaasinnaalluni. Tamanut ammasumik tusarniaaneq nalinginnaasumik naqitat atorlugit saqqummiussinikkut allagarsiinikkulluunniit pisarpoq. Tusarniaanermi ullut sivikinnerpaamik 14-it periarfissaritinneqartarput. Tusarniaanermi akissuteqartoqarsimappat, taakku kommunip suliamik ingerlatitseqqinneranut ilaatinneqassapput.

Malugiuk
Nunaminertaq qinnuteqaatigineqartoq nunaminertamik atugassiinermiit kingusinnerpaamik ukiut marluk qaangiunnerini atorneqalereersimassaaq.

Nunaminertamik atugassiineq piffissamut killilerneqarsinnaavoq. Assersuutigalugu angallammik container-imilluunniit inissiigallarnermut atatillugu taanna atorneqarsinnaavoq.

Nunaminertamik atugassinneqarnissamut qinnuteqaatinnut atatillugu kommune akitsuummik akiliisitsisinnaavoq.

Illuliornissat kissaatigisimagukku sanaartorfissagissaanermut akitsuummik akiliisitsisoqarsinnaavoq. Akitsuut taanna aningaasartuutinut, kommunip sumiiffimmi illumik sananissamik kissaateqarfigisanni kuuffeqarfinnut aqqusiorneranut, aqquserniorneranut aqqusinernilu qaammaqqusersuineranut matussutigineqassaaq.

Nunaminertaq atorunnaarukku nunaminertami saliinissaq pisussaaffigaat.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Namminiilivinnermut, Pinngortitamut, Avatangiisinut Nunalerinermullu Naalakkersuisoqarfik
Imaneq 1A - 801
Postboks 1614
3900 Nuuk

Oqarasuaat: (+299) 34 50 00
Fax: (+299) 34 54 10
E-mail: pann@nanoq.gl
Nittartagaq: www.naalakkersuisut.gl