Kuuffeqarneq – Qinnuteqarneq

Kuuffeqarneq tassaavoq ruujorit ataqatigiimmik aaqqissuussat, taakkunuunalu soorlu imikoq sialullu illoqar­finniit avammut ingerlatinneqartarlutik. Tamakku kommuninit akisussaaffigineqartumik kuuffissuarnut atanilerneqartarput, kiisalu inuit najugaanniit kuutsitanut kuuffissuarnut atanilerlugit aaqqitaasut.

Illit illunniit kuuffissuarnut attavilertinniaruit, akuersissuterpaaluit pigeqqaassavatit:

• Siullermik Attaviliinermut akuersissut pigissavat, taannaallunilu kuuffissuarmut attavilersinnaanin­nut kommunimiit uppernarsaat
• Taava tulliullugu Nunaminertamik atugassiissut pigissavat. Taannalu atorlugu nunakkoorlugu atta­vilertissinnaalissaatit
• Naggataatigullu Assaasinnaanermut akuersissut pigissavat, tassa kissaatigisat naapertorlugu atta­vissavit kisimi assanneqarneranut nakkutilliissutitut qulakkeerutissaasoq, imaanngitsoq innaallagissap oqarasuaatilluunniit attavii ilanngullugit

Akuersissutissat assigiinngitsut immersugassiat atorlugit qinnutigisinnaavatit, kommunerisavit nittartagaata quppernera aqqutigalugu, imaluunniit kommuninni teknikkimut immikkoortortamut saaffiginninnikkut.

Akiliineq
Aallaavittut attavilertinninnut nammineq akiliuteqassaatit. Imaassinnaavorli kommunerisanni tapiissuteqartarneq atugaasoq, taakkulu aqqutigalugit attaviliinerit akilerneqarsinnaalluni. Sumiiffinni teknikkimut immik­koortortaqarfimmut apeqquteqarit.

Attavilersinnermut akiliutip saniatigut aamma attaviup ikkunneranut akiliuteqassaatit. Akiliullu taanna kommunimiit kommunimut assigiinngissinnaavoq, taamaattumillu sumiiffinni Teknikkimut Immikkoortortamut paasiniaasariaqarputit.

• Kuuffeqarneq – Nalinginnaasumik paasissutissiineq
• Kuuffeqarneq – Attavilertinneq