Kommunimi pilersaarutit – Nalinginnaasumik paasissutissiineq

Kommunimi pilersaarutit – Nalinginnaasumik paasissutissiineq 

Kommunip pilersaarutaanik aamma kommunip ilassutitut pilersaarutaanik (sumiiffiit ilaannut pilersaarutit), siusinnerusukkut illoqarfimmut pilersaarutinik taaneqartartunik suliaqarnissaq kommunit tamarmik pisussaaffigaat. Kommunip pilersaarutaa tassaavoq kommunip nammineq nunap oqartussaaffigisami qanoq atornissaanut pilersaarutaa. Kommunip pilersaarutaa kommunip illoqarfii, nunaqarfii aamma sumiiffiit ilaat pillugit nunap assinginik arlaqartunik ilaqartinneqartarpoq. Sumiiffiit ilaat assersuutigalugu tassaasinnaapput:

  • Inissiaqarfiit
  • Inuussutissarsiorfeqarfiit aamma umiarsualiveqarfiit
  • Qitiusoqarfiit (Illoqarfiup qeqqa aamma illoqarfiup ilaani qitiusoqarfiit)
  • Sumiiffiit sanaartorfigeqqusaanngitsut sunngiffimmi sammisassaqartitsinermut, nunaminertanut qorsuusunut, iliveqarfinnut aamma qimmeqarfinnut immikkoortitat


Kommunip pilersaarutaani ilaatigut aamma inissisimaffiit takutinneqartut tassaapput:

  • Sumiiffiit eqqissisimatitat
  • Nunaminertat iserfigeqqusaanngitsut eqqaat, assersuutigalugu tatsit imeqarfiit
  • Aamma assersuutigalugu qaartartuusiviit eqqaanni sillimaniarnermut killigititat


Kommunip pilersaarutaani sumiiffiit ilaanni ataasiakkaani illuliornissamut sukumiisuusunik malittarisassanik kommunip ilassutitut pilersaarutaa imaqartarpoq. Kommunip ilassutitut pilersaarutaani maleruagassat suut sumiiffinnut ataasiakkaanut atuunnersut ilisimatitsissutigineqartarput, assersuutigalugu:

  • Sumiiffiup ilaa pillugu siunertaq aamma atorneqarfissaq, assersuutigalugu taanna ineqarfiunersoq imaluunniit inuussutissarsiorfiunersoq
  • Illut portussusaat
  • Sanilerisanut ungasissuseq
  • Sanaartorfiit
  • Aqquserngit, unittarfiit aamma pisuinnaat aqquserngi
  • Kuuffissuaqarneq
  • Illut silataasa isikkui, assersuutigalugu qalipaat, qaliap qanoq uingatiginera aamma qalliutit suuneri
  • Quit angissusii
  • Container-it
  • Umiatsianut ilitsiviit
  • Pujooriviit
  • Manisiviit


Maleruagassat kommunip pilersaarutaaniittut aamma kommunip ilassutitut pilersaarutaaniittut kikkunnit tamanit eqquutsinneqassapput. Kommunip pilersaarutaa aamma kommunip ilassutitut pilersaarutaa annertunerusumik paasisaqarfigiumagukku, illit kommunerisanni illoqarfigisanniluunniit, kommunip allaffianut saaffiginnissaatit.

Kommunip pilersaarutai aamma kommunip ilassutitut pilersaarutai tamakkerlutik akuerineqarnissartik sioqqullugu, tamanut tusarniaassutigineqartussaapput. Pilersaarutinut atatillugu innuttaasutut oqaaseqaateqarnissamut akerliliinissamullu periarfissaqarputit. Kommunip pilersaarutaasa tusarniaassutiginerat sivikinnerpaamik sapaatit akunnerinik arfineq-pingasunik sivisussuseqartarpoq.


Malugiuk
Innuttaasutut assersuutigalugu illuliornissat kissaatigigukku, illit kommunivit kommunimut pilersaarutaa aamma sumiiffiit ilaannut sanaffigerusutannut kommunip ilassutitut pilersaarutigisinnaasaa ilisimasaqarfigissallugu ilinnut pingaaruteqarpoq. Tassami taakku aallaavigalugit paasisinnaassavat, assersuutigalugu sumi illuliornissamik qinnuteqarsinnaanersutit sumiiffimmilu tassani kuuffissuarnik peqarnersoq.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Namminiilivinnermut, Pinngortitamut, Avatangiisinut Nunalerinermullu Naalakkersuisoqarfik
Imaneq 1A - 801
Postboks 1614
3900 Nuuk

Oqarasuaat: (+299) 34 50 00
Fax: (+299) 34 54 10
E-mail: pann@nanoq.gl
Nittartagaq: www.naalakkersuisut.gl