airplanebooksbriefcase business cogs cross election entertainment fish house law lockmedicalpeopleselfservices socialtax

Akiuussutissamik kapitittarnissamut pilersaarut

Akiuussutissamik kapuuisarnerit akulikinnerusumik ingerlanneqartarnissaat, 2017-imi januaarip aallaqqaataanit ingerlanneqartalissasoq Naalakkersuisunit aalajangiiffigineqarpoq. Akiuussutissamik kapitittarnissamut pilersaarut Naalakkersuisunit aalajangersaavigineqartoq naapertorlugu, Kalaallit Nunaanni qimmit nalinginnaasumik nappaataannut qimmit tamarmik akiuussutissamik kapitittarnissaat inatsisitigut pisussaaffinngorpoq.
Qimminik qimuttoqarfinni qimmiaqqanut qimminullu akiuussutissamik kapitittarneq akeqanngilaq, akiuussutissamillu kapitittarnissamut pilersaarut nutaaq malinneqartassalluni. Qimminik qimuttoqarfiup avataanittaaq akiuussutissanik kapitittarnissamut pilersaarut nutaaq malinneqassaaq, tassanili qimminik piginnittut akiuussutissamut namminneq akiliuteqartassallutik.

Qimminik qimuttoqarfiup iluani 

Qimmit chip-imik nalunaaqutserneqartarnissaat maanna inatsisitigut pisussaaffinngorpoq. Tamanna Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaata, Inatsisartut inatsisaannik nr. 24, 28 november 2016-imeersukkut allanngortinneqarneratigut piumasaraat (qimminut akiuussutissanik kapuuisarneq, nalunaaqutsersuineq nalunaarsuinerlu).

Qimmit nappaataat, parvovirus-i perlerornerlu sapinngisamik pinngitsoortinniarlugit, akiuussutissamik kapitissimasut nakkutigineqarnissaat chip-inik nalunaaqutsersuinikkut qulakkeerneqassaaq.

Chip-i mikisunnguuvoq, amitsukujuuvoq, manissuullunilu. Qaqorteqqasup marloriaatipajaanik angitigivoq. Kapuummik silittumik qimmit kiasiisa akornatigut chip-ilerneqassapput. Qimmimut uloriananngilaq. Qimminik nakkutilliisup scanner-ianik, chip-i scanner-neqarsinnaavoq. Qimmit qimuttut pingasunik qaammateqalereersimasut tamarmik chip-ilersorneqassapput. Nalinginnaasumik akiuussutissamik kapisineq iluatsillugu chip-imik ikkussisoqartassaaq.

Qimmeqatigiinnik chip-ilersuineq 2018-imi decembarimi aallartinneqassaaq, qimmillu tamakkerlugit chip-ilerneqarnissaasa tungaanut qaammatini tulliuttuni ingerlanneqassalluni. Taassuma kingorna qimmiaqqat akiuussutissamik kapitinnerat iluatsillugu chip-ilerneqartassapput. Qimmit akiuussutissamik kapitinnerini, chip-ilernerinilu paarinerisigut, qimmiutillit ikiuutissapput. Chip-ilersuisitsiniarnermi qimmeqatigiinnut piginnittup aqqa (aamma arlaliullusi pigigaluarussigit) nalunaarutigissavat.

Piginnittut, qimmit, akiuussutissamik kapisinerit, chip-illu normui nuna tamakkerlugu nalunaarsuisarfimmut nalunaarutigineqassapput. Malittarisassat naapertorlugit qimmit akiuussutissamik kapineqarsimanersut nalunaarsuivikkut nakkutigineqassaaq. Qimmiutivit chip-ii, akiuussutissamillu kapitissimaneri nammineerlutit allassimasuutigisariaqarpatit.

Qimmitit allanut tunniukkukkit, tamanna pillugu qimminik nakkutilliisoq imaluunniit Teknikkimut Avatangiisinullu Immikkoortortaq ilisimatissavat.

Qimmit chip-illit toqusimasut, qimminik nakkutilliisumit toqunneqarsimanngitsut, qimminut nakkutilliisumut nalunaarutigineqartassapput. Ajornanngippat chip-iisa normui nalunaarutigineqartassapput.

Qimmiutivit akiuussutissamik kapineqarnissaat, chip-ilersinneqarnissaallu isumagissallugu pisussaaffigaat. Sisimiuni qimminik nakkutilliisoq oqarasuaammut angallattakkamut 527922-mut attavigiuk. Kangerlussuaq: 277175. Maniitsoq: 817824.

Pineqaatissiissutit Qimmiutillip qimmini akiuussutissamik kapitinnissaanut, chip-ilerneqarnissaanullu pinaaseruni: Siullermik qimminik nakkutilliisup pinngitsaaliissummik qimmit akiuussutissamik misilillugu kapiniassavai. Tamanna iluatsinngippat, piginnittumut taarsiisussanngorani kommunip qimmit toqutsissavai.

 

Qimminik qimuttoqarfiup avataani  

"Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaata Inatsisartut inatsisaannik nr. 24, 28. november 2016-imeersumut allanngortinneqarneranik siunnersuut (qimminut akiuussutissanik kapuuisarneq, nalunaaqutsersuineq nalunaarsuinerlu)" Namminersorlutik Oqartussanit akuersissutigineqarpoq. Inatsit 2017-imi januaarip aallaqqaataanit atuutilerpoq. Inatsit naapertorlugu Kalaallit Nunaanni qimmit tamarmik qimmit nappaataannut nalinginnaasunut, Naalakkersuisut akiuussutissalersuinermi periusissatut aalajangersarneqarsimasoq naapertorlugu akiuussutissamik kapitinneqartarnissaanut inatsisitigut pisussaaffiliivoq.

Qimminut qimuttunut akiuussutissamik kapititsineq akeqanngilaq, qimminilli qimuttoqarfiit avataani "pingaarnertut akiuussutissaq"-mik kapititsisarnissaq suli akeqassaaq. Taamaattorli akiuussutissamik kapitittarnissamut pilersaarut uani aamma malinneqassalluni.

Akiuussutissanik kapisititsiniaraanni Namminersorlutik Oqartussat piumasaqaataat malinneqassapput. Imaappoq piffissat tullinnguuttut naapertorlugit qimmit akiuussutissamik kapitinneqartassapput:

  • Sapaatit akunnerini aqqaneq-marlunnik utoqqaassuseqalernermi akiuussutissamik kapitittoqarsinnaavoq. ”Pingaarnertut akiuussutissaq” kisimi.
  • Siullermeertumik akiuussutissamik kapitereernermi qaammat ataaseq qaangiuppat akiuussutissamik kapitittoqaqqissaaq. ”Pingaarnertut akiuussutissaq” perlerunnermullu akiuussutissaq.
  • Siullermeertumik akiuussutissamik kapitereernermi ukioq ataaseq qaangiuppat akiuussutissamik kapitittoqaqqissaaq. ”Pingaarnertut akiuussutissaq” kisimi.
  • Tamatumalu kingorna ukiut pingasukkaarlugit kapitittassapput. ”Pingaarnertut akiuussutissaq” perlerunnermullu akiuussutissaq.

Uumasunut Nakorsaqarfik Inuussutissalerinermullu Oqartussaaffimmit 2017 ikaarsaarfittut isigineqarpoq, ukiup annersaani kommuni qimminik qimmit nappaataannut parvovirusimullu tulleriiaarluakkamik kapitittarnissaannik isumaginnissanani. Piareersaanermik aqutsinermillu suliassat annertoorujussuit inissinneqartussaapput, nunalu tamakkerlugu paasissutissanik sanarfiinissamut akiuussutissamik kapoorinermut atatillugu paasissutissat annertuut nakkutiginissaanut pingaaruteqarluinnarpoq.

Siunissaq ungasinnerusoq eqqarsaatigalugu qimmit qimuttut chip-imik nalunaarsorneqartalissapput, qimmillu inersimasut siuliani akiuussutissalerinermi periusissaq naapertorlugu kapitittassallutik.
Qimmiaqqat qimmillu inersimasut akiuussutissamik kapitinnissaannut, akiuussutissamik kapuuisartoq oqarasuaat 81 78 47 atorlugu attavigisinnaavat. Eqqaamassavalli kapitereernerisa kingorna qaammat ataaseq ukiorlu ataaseq qaangiuppat kiisalu ukiut pingasukkaarlugit kapiteqqissammata. Taamaanngippat akiuussutissaq iluaqutaavallaassanngilaq.

Qimmit akiuussutissamik kapitilernerini qimmimik piginnittoq ikiuunnissaminut pisussaaffeqarpoq, tassa qimmit kapitilernerini paarinerisigut.

Qimmiutilimmut qimmit kapitikkumanngikkaanni pineqaatissiissutaasinnaavoq: Aallaqqaammut qimmilerisup qimmit pinngitsaaliissummik kapiniarsareqqaassavai. Taamaaliortoqarsinnaanngippat kommunip qimmit toqunneqarnissai isumagissavaa piginnittumut taarsiiviginninnermik tunniussinertaqanngitsumik.

Qimmimik toqutsinermi kommunip aningaasartuutai piginnittumit akilertinniarneqassapput.