Kommunalbestyrelsimut qinersineq – Qinersisinnaatitaaneq aamma qinersisinnaasut allattorsimaffiat

Kommunalbestyrelsimut qinersineq – Qinersisinnaatitaaneq aamma qinersisinnaasut allattorsimaffiat 

Kommunalbestyrelsimut qinersinermi taasisinnaaniaruit, qinersisinnaatitaassaatit aamma qinersisinnaasut allattorsimaffianni allaqqassallutit.


Qinersisinnaatitaaneq
Qinersisinnaatitaaneq ima isumaqarpoq, illit taasisinnaanermut pisinnaatitaasutit. Kommunalbestyrelsimut qinersinermi qinersisinnaatitaavutit, illit
  • 18-inik ukioqalersimaguit
  • qinersinissap ingerlanneqarnissaa sioqqullugu sivikinnerpaammik qaammatini arfinilinni Kalaallit Nunaanni aalajangersimasumik najugaqarsimaguit
  • aamma qallunaatut innuttaassuseqaruit imaluunniit naalagaaffiup ilaani aalajangersimasumik najugaqarsimaguit (Kalaallit Nunaat, Danmark imaluunniit Savalimmiut) sivikinnerpaamik qinersinissap ingerlanneqarnissaa sioqqullugu ukiuni pingasuni

Inuit, Kalaallit Nunaanni inatsisit malillugit oqartussaaffiiarneqarsimasut qinersisinnaatitaanngillat.


Qinersisinnaasut allattorsimaffiat
Qinersisoqarnissaa nalunaarutigineqarpat, qinersinermut siulersuisut qinersisinnaasut allattorsimaffiannik sanassapput. Qinersisinnaasut allattorsimaffiat tassaavoq kommunimi pineqartumi qinersisinnaatitaasut inuit allattorsimaffiat. Kalaallit Nunaanni taamaallaat qinersisinnaavutit, qinersisinnaasut allattorsimaffiannut ilanngunneqarsimaguit.

Qinersinissaq sioqqullugu sapaatit akunneri arfinillit sioqqullugit kommunip inuit allattorsimaffiutaa malillugu najugaqarfigisimasanni kommunimi, qinersisinnaasut allattorsimaffianni allanneqarsimassaatit:
  • Qinersinissaq kingusinnerpaamik sapaatit akunnerinik arfinilinnik sioqqullugu kommunip inuit allattorsimaffiutaanut nuunnerit nalunaarutigisimagukku, najugaqarfittaanni qinersisinnaasut allattorsimaffiannut allanneqarsimassaatit
  • Qinersinissaq sapaatit akunnerinik arfinilinnik sioqqunnagu kommunip inuit allattorsimaffiutaanut nuunnerit nalunaarutigisimagukku, manna tikillugu najugaqarfigisanni qinersisinnaasut allattorsimaffianni allanneqarsimassaatit

Ulloq qinersivissaq kingusinnerpaamik sapaatit akunnerinik pingasunik sioqqullugu, sumiiffimmi tamanit tikinneqarsinnaasumi qinersisinnaasut allattorsimaffiat, qinersinermut siulersuisunit ulluni marlunni saqqummiunneqassaaq. Allattorsimaffimmi ilaanngikkuit imaluunniit peqquteqanngitsumik allattorsimaffimmut allanneqarsimanngikkuit, qinersinermut siulersuisunut naammagittaalliorsinnaavutit:
  • Qinersisinnaasut allattorsimaffiata saqqummiunneqarnerata kingorna, ullut suliffiusut marluk qaangiutsinnagit naammagittaalliuteqartoqassaaq
  • Naammagittaalliut allaganngorlugu allagaassaaq
  • Naammagittaalliummi tunngavilersussavat, sooq qinersisinnaasut allattorsimaffiannut allanneqartariaqarnersutit

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Naalakkersuisut Siulittaasuata Naalakkersuisoqarfia
Imaneq 1A - 901
Postboks 1015
3900 Nuuk

Oqarasuaat: (+299) 34 50 00
E-mail: govsec@nanoq.gl
Nittartagaq: www.naalakkersuisut.gl