Tunngaviusumik kittaartagaq

Tunngaviusumik kittaartagaq 

Tunngaviusumik kittaartagaq aamma taaneqartarpoq “aallartitsisut kittaartagaat”. 12.000 kr.-inik naleqarpoq taamaallaallu atorneqarsinnaalluni suliffeqarfimmut avataaniit siunnersuinerit pisiarinerinut. Siunnersuinerit assigiinnngitsut matuma kinguliini takuneqarsinnaapput. Kittaartakkamut aningaasanik tunniussisoqarneq ajorpoq, tassa siunnersuisoq toqqaannartumik Greenland Business-imit (GB) akilerneqartarmat.


Siunertarisaq
Pingaaruteqarpoq erseqqissassallugu kittaartakkami siunertaanngimmat amerlanerit suliffeqarfimmik aallartitsinissaat. Anguniagaq taanna aamma pingaartuuvoq, immikkulli sammineqarpoq Namminersorlutik Oqartussat inuussutissarsiutinik siuarsaanermut periaasiini allani, soorlu aallartitsisunik ilinniartitsinissaq.

Akerlianik kittaartakkami siunertaavoq qulakkeerumallugu suliffeqarfiit aallartereersut amerlanerit ukiut artornartut siulliit anigussagaat. Suliffeqarfiit ilaasa immikkorluinnaq siunnersorneqarnissaq pisariaqartittarpaat, immaqali allat taamaallaat pisariaqartittarlugu aningaasanik aqutsilluarneq nakkutilliilluarnerlu.


Qinnuteqarneq
Tunngaviusumik kittaartagaq qinnuteqaatiginiarukku, allaganngorlugu qinnuteqaasiussaatit. Qinnuteqarnermut tunngaviussaaq naammaginartumik pilersaarusiorsimanissat.

Pilersaarummut immersuiffissaq uani aasinnaavat

Qinnuteqaat najukkanni Inuussutissarsiornermut Allaffeqarfimmut nassiutissavat tunniulluguluunniit.

Pilersaarusiut illit Inuussutissarsiornermut Allaffeqarfiullu akornissinni ataatsimiinnermi tunngaviussaaq. Ataatsimiinneq naapeqatigiilluni oqarasuaatikkulluunniit pisinnaavoq. Ataasiakkaatigut Inuussutissarsiornermut Allaffeqarfiup peqataatittassavai ingerlanniakkamik ilisimasalik imaluunniit sulianut tunngasunik immikkut ilisimasallit allat.

Ataatsimiinnerup siunertaraa pilersaarusiavit pitsaasuunissaanut ikiussallutit qulakkeerumallugulu suliffeqarfivit kittaartakkap siunertaata iluaniinnersoq. Ataatsimiinneq assigiinngitsunik pingasunik inerneqarsinnaavoq:

  1. Inuussutissarsiornermut Allaffeqarfik isumaqarpat ingerlatassamut tunngaviusoq naammaginartumik qulaajarneqarsimasoq, kittaartakkamik qinnuteqaat Greenland Business-imut kittaartakkanik tunioraasumut ingerlateqqissavaa
  2. Suliffeqarfiup tunngavia amigaateqarpat Inuussutissarsiornermut Allaffeqarfiup qinnuigisinnaavaatit kittaartakkap tunniunneqannginnerani amigaatit iluarseqqullugit
  3. Aallartitsinissamut tunngaviusoq amigarpallaartutut isigineqarpat qinnuteqaat itigartinneqarsinnaavoq, taarsiullugulu tunngaviunerusumik siunnersuinissamik neqeroorfigineqassallutit – tamatumani ilanngullugu inanneqarsinnaallutit aallartitsiniartutut pikkorissaqqullutit


Atuineq
Kittaartagaq tunniunneqarpat kittaartakkap ilisarnaataa normu ilinnut nalunaarutigineqassaaq. Normu ilisarnaat siunnersuisumut siunnersuisunulluunniit kissaatigalugit atorumasannut ingerlateqqissavat. Tamatuma kingorna nalinginnaasumik Inuussutissarsiornermut Allaffeqarfimmut attaveqarunnaassaatit, kittaartagaq nungutsinnagu atuuffissaaluunniit qaangiutseqqaartinnagu.

Kittaartagaq sullissinernut makkununnga atorsinnaavat, siunnersortit Kalaallit Nunaanni suliffiuteqartut salliutillugit:

  • Teknikkikkut nalinginnaasumik siunnersuineq (ingeniør, illuliassanik titartaasartoq, ilusilersuisoq, inuussutissanik immikkut ilisimasalik)
  • Eqqartuussissuserisut ikiorsiinerat
  • Kukkunersiuisut ikiorsiinerat
  • Naatsorsuutit nalunaarsornerannut siunnersuineq (naatsorsuutit nalunaarsornerannut nalinginnaasumik ikiorsiinerunngitsoq)
  • Qarasaasiamik ingerlatsisinnaanermut allagartaq (PC-kørekort) ingerlatalluunniit taamaaqatai IT-mut pikkorissarnermut tunngasut
  • Pisortatut ineriartorneq
  • Inuussutissarsiuteqarnermut tunngasunik qarasaasiamut atortunik (software) pisisinnaaneq
  • Pikkorissarnissamut ilinniarnissamullu neqeroorutit naleqquttut allat
  • Suliffeqarfiup siunnersuinermik atuineranut atatillugu akissarsialiisutut/angalanernut aningaasartuutit

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl