Inatsisitigut piumasat malillugit siulersuisut

Inatsisitigut piumasat malillugit siulersuisut 

Aktianik piginneqatigiiffik (aktieselskab) siulersuisoqassaaq ikinnerpaamik pingasunik inuttalimmik, piginneqatigiiffiup qanoq angitiginera apeqqutaatinnagu. Piginneqatigiiffik (anpartsselskab – suliffeqarfik akiitsoqalissappat piginnittuisa tamarmik immikkut aningaasaliissutimik nalingannik taamaallaat akisussaaffigisaat) 35-it inorlugit sulisullip nammineq aalajangissavaa siulersuisoqarumanerluni siulersuisoqarumannginnerluniluunniit. Piginneqatigiiffik 35-it sinnerlugit sulisoqartoq siulersuisoqartussaavoq. Piginneqatigiiffimmi pisortat siulersuisuni amerlanerussuteqassanngillat.

Inatsisitigut piumasat malillugit siulersuisut piginneqatigiiffiit pillugit inatsisini ilaapput. Inatsisini taakkunani malittarisassaq pingaarneq tassaavoq siulersuisunut ilaasortat aktiaatillit piginneqataassutillilluunniit ataatsimeersuarnermi peqataasuinit qinigaassasut. Ataatsimeersuarneq piginneqatigiiffimmi oqartussaanerpaajuvoq.

Siulersuisut piginneqatigiiffik pingaarnerusutigut aqussavaat, ulluinnarnili aqutsisut ulluinnarni ingerlatsineq aqussallugu.

Siulersuisut suliassaasa pingaarnersaraat ulluinnarni aqutsisut maleruagassiussallugit, suliassat annertuut immikkulluunniit ittut aalajangiiffigisarlugit, kiisalu nakkutigissallugu naatsorsuutinik ingerlatsineq aningaasaatillu ingerlanneqarnerat naammaginartumik aqunneqarnersut.

Siulersuisut suleriaaseqassapput tassani nalunaarsugaalluni siulersuisut sulinertik qanoq ingerlatissaneraat.


Siulersuisut suleriaasiat
Piginneqatigiiffiit pillugit inatsisit malillugit piginneqatigiiffiit suleriaaseqassapput minnerpaamik makkuninnga aalajangersagaqartunik:

  • siulersuisut inissitsiternerat aalajangiisinnaassusiallu aalajangiiffigalugu, kiisalu qanoq akulikitsigisumik ataasimiittassanersut
  • suliat agguaannerannut maleruagassiorneq, tamatumani ilanngullugit suleriaatsit, siulersuisut ulluinnarnilu aqutsisut oqartussaasullu allat akornanni piginnaatitsissutit ilitsersuutillu
  • aalajangersarlugu siulersuisut qanoq iliorlutik ulluinnarni aqutsisut piginneqatigiiffiup ingerlatsineranik piginneqatigiiffinnillu ataaniittunik nakkutiginnissanersut
  • atuakkanik, nalunaarsuutinik ilanngussanillu pilersitsinissamut ingerlatsinissamullu maleruagassiorneq
  • siulersuisunut isummerfigeqqullugu piginneqatigiiffiup aaqqissugaanera, soorlu naatsorsuusioriaaseq, suliffeqarfimmi namminermi nakkutilliineq, edb-kkut aaqqissugaaneq aningaasatigullu missingersuusiortarneq
  • siulersuisut peqqullugit suliassaminnik naammassinninnissaminnut tunngasunik paasissutissiisaqqullugit
  • siulersuisut peqqullugit pilersaarutit, aningaasatigut missingersuutit assigisaallu malinnaaffigeqqullugit kiisalu isummerfigeqqullugit piginneqatigiiffiup aningaasai tigoriaannaat, suliassiissutaasimasut pigisat, iliuutsit pingaarutillit, sillimmasiinermut, aningaasaliinermut, aningaasat ingerlaarnerannut immikkullu nalorninaatilinnut tunngasut
  • siulersuisut peqqullugit kukkunersiuisut oqaaseqaataasa imarisaat atsiorneqannginnerani isummerfigeqqullugu
  • siulersuisut peqqullugit piginneqatigiiffiup qaammatini aalajangersimasuni naatsorsuutai ukiup naatsorsuusiorfiup ingerlanerani misissortaqqullugit tamatumani ilanngullugu missingersuutit nikittoorutillu
  • siulersuisut peqqullugit qulakkiissagaat kukkunersiuinissamut pisariaqartumik tunngavissaqarluassasoq, tamatumani ilanngullugu isummerfigalugu suliffeqarfimmi namminermi kukkunersiuisoqartariaqarnersoq


Siulersuisunut ilaasortat
Siulersuisunut ilaasortat ataatsimeersuaqataasunit qinerneqartassapput.

Piginneqatigiiffik ukiuni kingullerni pingasuni 35-inik sinnerlugilluunniit agguaqatigiissillugu sulisoqarsimappat sulisuusut siulersuisuni sinniisoqarsinnaatitaapput. Sulisuusut ikinnerpaamik siulersuisuni ilaasortanik marlunnik toqqaasinnaapput, amerlanerpaamilli ataatsimeersuartut qinigaasa affai tikillugit.

Sulisut siulersuisuni sinniisaat ukiuni sisamani atasussatut qinigaasarput. Siulersuisunut ilaasortat allat qanoq sivisutigisumik qinigaasimanissaat malittarisassatigut aalajangerneqassaaq, qinigaaffilli sivisunerpaamik ukiunik sisamanik sivisussuseqassaaq.

Siulersuisunut ilaasortat tamarmik assigiimmik pisinnaatitaaffeqarlutillu pisussaaffeqarput. Kisianni siulittaasup taasinera amerlanertigut aalajangiisuusassaaq siulersuisuni taasinerit naligiitsillugit.

Siulersuisunut ilaasortat aallaqqaatitut akissarsiaqarsinnaatitaapput ataatsimeersuartut aalajangigaannik annertussusilikkamik malittarisassat malillugit.

Siulersuisuni ilaasortap malittarisassat unioqqutippagit, soorlu nipangiussisussaatitaaneq, akiliisitaanissamik parnaarussaanermilluunniit pillarneqarsinnaavoq. Siulersuisunut ilaasortaq nammineq pisuutitaasussaavoq. Siulersuisunut ilaasortat arlallit akisussaatitaagunik peqatigiillutik akisussaatitaassapput.


Siulersuisut ataatsimiittarneri
Suleriaasissami aalajangersakkatigut aalajangersagaavoq siulersuisut ataatsimiittarneri qanoq ingerlasassasut. Inatsimmi oqaatigineqarpoq siulersuisut ataatsimiissutaat nalunaarsorneqartassasut. Ilaasortat najuuttut nalunaarut atsiorsimassavaat.

Tamatuma saniatigut ukiumoortumik naatsorsuusiortarneq pillugu inatsimmi piumasaavoq siulersuisut ataatsimiinneri tamaasa kukkunersiuisut oqaaseqaataat saqqummiunneqartassasoq.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl