Inuttut piginnaanerit

Inuttut piginnaanerit 

Namminersortunngorniarlutit eqqarsaatigigukku isummerfigissassavit ilagaat, inuttut piginnaassutsit qanoq isumalluutigisinnaatiginerlugu. Suliffeqarfiup pilersinnissaanut ingerlannissaanullu piginnaassuseqarnerputit? Naammattumik ilinniarsimallutillu misilittagaqarnerputit? Namminersortutut ingerlanissanni suunukua siunertarigitit?


Inuttut piginnaassutsit
Nalinginnaasumik oqaatigineqartarpoq namminersorluni inuussutissarsiummik ingerlatsisoq:

  • Sulerusussuseqarluassasoq – tassa angujumasatit angujumallugit
  • Ajutooratarsinnaanermut piareersimassasoq – sapiiserluni soorlu sipaakkani angallatiniluunniit akigisinnaallugit
  • Imminut tatigilluartoq – illit aallartitat tutsuigalugu
  • Qasusuitsuussasoq – tunisaqarnissani ilungersuutigiuarlugu aallaqqaammut annikikkaluarpalluunniit
  • Attavissarsiullaqqissuulluni – tunitsivigisartakkatit amerliartortittuarumallugit
  • Nutaamik eqqarsarnissamut ammasuulluni – silarsuarmimi allanngulertortaqisumi allamut sangunissaq pisariaqalersinnaammat


Tunuliaqutit
Qulakkeersimassavattaaq tunuliaqutivit – assersuutigalugu aappavit, qitornavit ikinngutivillu aalajangernerit tapersersussagaat. Aallarteqqaat tamarmik misilittagaraat ullormut suleruluttarneq sulinngiffeqarpiarani. Takornartaanngilaq akunnerni 60-80-ini sapaatip akunneranut sulisarneq. Aamma pisariaqarsinnaasarpoq piffissap ilaatigut ilaqutariit atugarissaarnerat appartilaassallugu.


Aqutsinermi sakkussat
Aallartinnginninni inuttut niuernikkullu anguniakkatit aalajangersassavatit. Nalilersussavat qanoq sukkatigisumik sapaatip akunneranut nalinginnaasumik sivisussusilimmik sulisariaqarnerit pisariaqartilissanerlugu. Qulaajartariaqarpat aningaasatigut nammineq atugassannut qanoq akissaqartiginerlutit.

Aamma eqqumaffigisariaqarpat allaffissornikkut suliaq sapinnginnerlugu imaluunniit akilerlugu allamut suliaritikkumanerunerlugu. Tamanna aalajangigassaavoq imaannaanngitsoq, tassami aningaasatigut aqutsisoqannginneq ajutoornermut patsisaagajuttarmat.
Minnerpaamik makkua aquttariaqarpatit:

  • Bilag-ivit nalunaarsornissaat
  • Faktura-t nassiussornissaat, (akiligassat) akilerneqanngitsut malittarinissaat
  • Akissarsiat akilernissaat
  • Aningaasatigut missingersuutit malittarinissaat
  • Nioqqutissanik inniminniineq
  • Allakkat mail-illuunniit allannerat
  • Oqarasuaatip nakkutiginera

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl