Nioqqutissap ilisarnaataata illersornera

Nioqqutissap ilisarnaataata illersornera 

Nioqqutissap ilisarnaataa inuussutissarsiummik ingerlatsisup atortarpaa nioqqutissami sullissinermiluunniit pilerisaarutigineranni. Tassaasinnaapput oqaaseq ataaseq amerlanerusulluunniit, ateq ataaseq, titartagaq, nioqqutissap isikkua imaluunniit nioqqutissap poortuutaa.

Nioqqutissap ilisarnaataa marlutsigut pisinnaatitaaffigilersinnaavat:
  • nalunaarsugaanikkut
  • imaluunniit atuliinnavinneratigut

Aaqqiineq kingulleq aarlerinartoqarneruvoq, pinngitsoorumagukkulu arlaata akerliliinissaa nioqqutissavit nalunaarsugaanissaa toqqassavat.

Nioqqutissat nalunaarsorsimasumik ilisarnaateqarpat ilisarnaat kisermaallugu atorsinnaavat. Tamatuma kingunerissavaa allat taannarpiaq assigisaaluunniit inuussutissarsiornermi nalunaarsortissinnaanngikkaat atorsinnaajunnaassagaallu.

Nioqqutissap ilisarnaataata nalunaarsortinnera makkununnga atuuttumik qinnuteqarsinnaavutit
  • Kalaallit Nunaanni Danmark-imilu
  • Nunani EU-mi ilaasortaasuni
  • Nunat Madrid-protokollimut ilaasortaasuni

Kalaallit Nunaanni Danmark-imilu nioqqutissap ilisarnaataata nalunaarsortinnera
Kalaallit Nunaanni Danmark-imilu nioqqutissavit ilisarnaataata nalunaarsortinneqarnissaa kissaatigigukku, nioqqutissap ilisarnaataata nalunaarsortinneqarnissaa Patent- og Varemærkestyrelsen-imut Danmark-imiittumi qinnuteqassaaatit. Styrelsen-ip nittartagaatigut toqqaannartumik attaveqaatitigoortumik qinnuteqarsinnaavutit – www.dkpto.dk. Tassanittaaq qinnuteqarnermi piumasaasut pillugit qanorlu akeqarnersut sukumiinerusumik atuarsinnaavatit.

Nioqqutissap ilisarnaataata nalunaarsornissaanut qinnuteqareeruit Patent- og Varemærkestyrelsen-ip misissussavaa nalunaarsugaanissamut akornutissaqarnersoq, tamatumani ilanngullugu ilisarnaatinik assinginik assigisaanilluunniit peqartoqarnersoq.


Akerliliineq taamaatitsinissamillu noqqaaneq
Patent- og Varemærkestyrelsen-ip misissoreerpagu nioqqutissavit ilisarnaataata nioqqutissanut ilisarnaatinut inatsimmi piumasaasut naammassineraat, nioqqutissat ilisarnaataasa nalunaarsuiffiannut nalunaarsortissaaq Dansk Varemærketidende-mullu saqqummiunneqarluni. Matuma kingornagut qaammatini marlunni allat nioqqutissap ilisarnaataanut akerliliinissaminnut saqqummiussinissaminnut periarfissaqarput.


EU-varemærkesystemet
EU-mi nioqqutissap ilisarnaataa nunanut EU-mi ilaasortaasuni tamani atuuppoq, Danmark ilanngullugu. EU-mi nioqqutissap ilisarnaataata nalunaarsugaanera ullormit qinnuteqarfimmiit ukiuni qulini atortussaavoq, ukiullu qulikkaarlugit nutarterneqarsinnaalluni.

Nioqqutissap ilisarnaataa nunanut EU-mi ilaasortaasunut nalunaarsortikkusukkukku qinnuteqaasiussaatit. Office for Harmonization in the Internal Market (OHIM) nittartagaani qinnuteqarnermi suut piumasaqaataanersut atuarsinnaavat – www.oami.europa.eu.

Qinnuteqaat EU-mi oqaatsit atugaasut tamaasa atorlugit allanneqarsinnaavoq, nalunaarneqassaarli OHIM-imi pisortatigut oqaatsit suut atorlugit akineqarumanerluni – tassa imaappoq tuluit, tysk-it, fransk-it, spansk-it italia-miulluunniit oqaasii atorlugit.

Qinnuteqaat OHIM-imut allakkatigut imaluunniit e-mail-ikkut nassiutissavat. Aamma qinnuteqaat Patent- og Varemærkestyrelsen-imut nassiussinnaavat, taassuma ingerlateqqissammagu.

Nalunaarsuinissamut akornutissaqanngippat ilisarnaat EU-mi oqaatsit tamaasa atorlugit tamanut EU-Varemærketidende-mi saqqummiunneqassaaq.


Madrid-protokollen
Danmark-i nunat 60-it allat peqatigalugit Madrid-protokollen-imut ilaavoq, nioqqutissat ilisarnaasersornerannut suleqatigiinnissamik isumaqatigiissuteqarfiusumut. Madrid-protokollen-imik aqutsisuuvoq World International Intellectual Property Organization (WIPO).

Nioqqutissap ilisarnaataa nunamut ataatsimut imaluunniit nunanut arlalinnut nalunaarsortikkusukkukku, Patent- og Varemærkestyrelsen-imut nioqqutissap ilisarnaataa nalunaarsorneqarsimasoq qinnutigeqqaassavat.

Matuma kingornagut qinnuteqarnermi immersuiffissaq immersussavat, ilaatigullu nunat suut nalunaarsuiffissatut kissaatiginerlugit nalunaarlugu. WIPO-p nittartagaani immersuiffissaq nassaarisinnaavat – www.wipo.int. Tassanittaaq Madrid-protokollen pillugu sukumiinerusumik atuarsinnaavutit, nioqqutissap ilisarnaataata nalunaarsortinneqarnissaa qanoq qinnutigisinnaanerit naatsorsorlugulu nalunaarsortinneranut akiliut.

Qinnuteqaatit Patent- og Varemærkestyrelsen-imut nassiutissavat. Qinnuteqaat inatsisitigut piumasaasut arlallit naammassisimappagit qinnuteqaat WIPO-mut ingerlateqqinneqassaaq, WIPO-llu qinnuteqaat nunani toqqarneqartuni pisortanut ingerlateqqissavaa. Nunat ataasiakkaat tamarmik qinnuteqaat nunaminni malittarisassat malillugit isummerfigissavaat. Amerlanertigullu qaammatit 12-it 18-illu ingerlagajuttarput ersarissinnginnerani ilisarnaat nunami kissaatigisami akuerineqarnersoq paasinissaata tungaanut.

Nunat toqqarneqartut arlaanni nalunaarsugaanissaq ajornarpat, nuna taanna puiguinnarsinnaavat nunani allani nalunaarsugaanissamut sunniuteqanngitsumik.


Malugiuk
Naammagittaalliorneq pillugu aalajangiineq allaffissornikkulluunniit atorunnaarsitsineq siunertaqarsinnaavoq ilisarnaat nioqqutissat nalunaarsorneqarfianniit peerneqassasoq, imaluunniit nalunaarsorsimaneq tamakkiisumik ilaannakortumilluunniit ataannassasoq.


Paasissutissat amerlanerusut
Patent- og Varemærkestyrelsen-ip nittartagaani nioqqutissap ilisarnaataata nalunaarsortinnera illersorneqarneratalu akigititat pillugit sukumiinerusumik atuarsinnaavatit.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl