airplanebooksbriefcase business cogs cross election entertainment fish house law lockmedicalpeopleselfservices socialtax

Qeqqata Kommuniata, Naalakkersuisut aamma Hudson Greenland A/S akornanni qinnuteqarnissamut periuseq IBA-millu isumaqatigiissut

Aatsitassarsiornermut immikkoortortaq Qeqqata Kommuniani Kalaallillu Nunaanni inuussutissarsiornikkut, suliffissaqartitsiniarnikkut kiisalu nunat tamalaat akornanni unammillersinnaanermut ineriartornissamut periarfissat annersaasa ilagaat. Taamaattumillu Qeqqata Kommunia Naalakkersuisullu aatsitassarsiorfimmik Hudson Greenland A/S suleqatigiinnissamik isumaqatigiissuteqarput.

Qeqqata Kommunip, Naalakkersuisut Hudson Greenland A/S-illu akornanni IBA-mik isumaqatigiissut pillugu 

2015-imi septembarip 24-ani Qeqqata Kommunia, Naalakkersuisut kiisalu Hudson Greenland A/S Qaqortorsuaq-mi (Naajat-ni) anorthosit-imik piiaanissamut Impact Benefit Agreement (IBA-mik) atsiorput. Isumaqatigiissut ilaatigut Hudson Greenland A/S-i Naajat immikkoortortaani anorthosit-imik atuinissamut kisermaassisuussasoq.
Illuatungeriinni pingasuusunit isumaqatigiissutikkut suleqatigiinnissamut periaasissat ingerlatseriaasissallu aalajangersarneqarput. Isumaqatigiissummi Kalaallit Nunaanni inuiaqatigiinnut pitsaasumik sunniuteqarnissaasa nukittorsarneqarnissaat siunertaavoq. Isumaqatigiissutitigut Kalaallit Nunaanni innuttaasunut iluaqutaasumik, pisortatigut nutaanik isertitaqarfissanik ilaatigut kinguneqassaaq.

IBA-mut isumaqatigiissut tamakkiisoq uani kiisalu atsioqatigiinnermit assit uani takusinnaavatit.

Najugaqavissut sulisartut 

Isumaqatigiissutikkut sulisartut avataaneersunit kalaallit sulisartut pingaarnerutinneqartarnissaat qulakkeerneqarpoq. Sanaartornerup nalaani sulisut 50 procentii kalaaliunissaat kiisalu ingerlatsinermi 80 procentiunissaat anguniagaavoq. Ingerlatsinerup nalaani ulloq naallugu sulisinnaasunik 61-it missaanik amerlassusillit ukiumut atorfinitsinneqarsinnaapput. Ilaatigut aquttutut, maskiinanik ingerlatsisutut, elektrikeritut, teknikeritut, eqqiaasutut, igaffimmiutut isumannaallisaanermut suliffissaqarniarnissami periarfissaasinnaavoq.
Kalaallit sulisartut piginnaasaannik ineriartortitsinissamut, taamaalillunilu suliffissaqartitsiniarnerup siuarsarnissaanut, illuatungeriit tamarmik ilinniartitaanermut pilersaarutinik siuarsaanissamut, tapersersuinissamut kiisalu inerisaanissamut pisussaaffilerneqarput.

Isumaginninnermut Kulturimullu konto kiisalu Ilinniartitaanermut konto 

IBA-mi isumaqatigiissummut ilaavoq Hudson Greenland A/S Kalaallit Nunaanni inuiaqatigiinnik kulturimillu siuarsaaqataassaaq. Tassunga tunngatillugu Hudson Greenland A/S aningaasaateqarfinnik marlunnik pilersitsivoq, ilinniartitaanernik pilersitsiniarnernut kiisalu tamanut iluaqutaasussatut suliniutinut tapersersuinissamik siunertaqartunik. 2016-imili suliffeqarfik aningaasaateqarfinnut aningaasanik immikkoortitsisarpoq, aningaasaateqarfinnullu innuttaasut kattuffiillu ukiut tamaasa oktobarimi qinnuteqarsinnaallutik.

Annertunerusumik ilinniartitaanermut konto uani atuaruk aammalu Naalakkersuisunut qinnuteqarlutik

Annertunerusunuk inooqataanermut kulturimullu konto uani atuarak, najoqqutassiaq uani atuaruk aammalu ugguuna qinnuteqarlutit.

Hudson Greenland A/S sunaava 

Hudson Resources Inc. canadarmiunit pigineqarluni aatsitassarsiornermut teknologiimullu suliffeqarfiuvoq, Kalaallillu Nunaani Hudson Greenland A/S-itigut immikkoortortaqarluni. 2003-mili Hudson Resources Inc. Kangerlussuarmi ingerlatsivoq, tassani atortussiassanik piiaanissamut periarfissanik misissuisimalluni. Qaqortorsuarmi, White Mountain-imik aamma taaneqartartumi, suliffeqarfik anorthositinik annertuunik nassaarpoq. Sanaartorneq naammassineqareermat, 2019-imi upernaakkut piiaaneq aallartinneqarpoq.
Anorthositimik, ilaatigut glasfiberimik qalipaatinillu nioqqusiornermi atorneqartussamik piiaanissamut annertuumik periarfissaqarpoq – taamaattumik siunissami Kalaallit Nunaata kangerluini angallatinik Kalaallit Nunaannit atortussiassaniit sanaajusunik takusalersinnaassajunnarsivugut. Anorthositimik nioqqusiorneq aammattaaq arlalitsigut avatangiisitigut iluaqutissartaqarpoq. Hudson Greenland A/S-imit nalunaarutineqarnikuuvoq, cementimik qaqortumik CO2-mik aniatitsinngitsumik nioqqusiornissamut periarfissaqartoq.

Hudson Greenland A/S pillugu annertunerusumik uani atuarit

Hudson Greenland A/S-imut atatillugu suliniutit allat 

Malinnaatitat
Qeqqata Kommunia malinnaatitanik pilersitsivoq, taannalu IBA-mut isumaqatigiissummik malitseqartitsinissamik siunertaqarluni kiisalu Hudson Greenland A/S-ip pisussaaffimminik naammassinninneranik qulakkeerisuussalluni. Malinnaatitat inuiaqatigiinnut innuttaasunullu attuumassuteqartunik piiaanermik ingerlatsinermut tunngasutigut pilersitsiniarnerit isumassarsiallu pillugit Hudsonilu suleqatigiissapput, aatsitassarsiorfimmut, aatsitassarsiorfimmi sulisunut il.il. nassiussisartut/kiffartuussisartut tassunga ilaallutik.
Malinnaatitat piffissami matumani Majoriamit, Arctic Circle Businessimit KTI-mit kiisalu Qeqqata Kommunianit sinniisunik inuttalersugaavoq.

Aatsitassarsiornermut immikkoortumut nalinginnaasumik paasissutissat pillugit, Naalakkersuisut.gl -ikkut annertunerusumik Aatsitassarsiornermut aqutsisoqarfik, Aatsitassarsiornermut inatsit il.il. pillugit atuarneqarsinnaasumut innersuussutigaarput.

Maria Blichfeldt Petersen

Atuilluartuunissaq pillugu siunnersorti

817804

mabp@qeqqata.gl