Maniitsoq

(Siusinnerusukkut Sukkertoppen), 1782-imi tunngavilerneqartoq, Kalaallit Nunaata Venedig-ianik siusinnerusukkut aamma taaneqartarsimavoq.
Maniitsoq illoqarfimmik sanaartorfigissallugu unammillernartumi nunami inissisimavoq. Qattunerasaartuungaatsiarnera Maniitsup ateqaatigaa. Maniitsoq 2.607-inik inoqarpoq (juulip aallaqqaataani 2016), nunatsinni illoqarfiiit inuttunerpaata arferngat. Inui ikiliartorsimagaluarput, aalisarnikkulli sanaartornikkullu ineriartorneq pissutigalugu inuisa amerlassusiat maanna aalaakkaalersimavoq.
MAN CITY

Inuussutissarsiutit pingaarnerusut 

Aalisarneq piniarnerlu inuussutissarsiutit pingaarnersaraat, sunngiffimmi piniartarneq tapertaalluni. Maniitsup imartaata ukiuni makkunani saarullineruttornera pissutigalugu aalisakkeriviit marluusut suliffissaqartitsillualersimapput. Aamma inuussutissanik tunisassiorfeqarpoq immami nunamilu miluumasut neqaannit kalaaliminernik, soorlu tikaagulliit, qipoqqaat, umimmaat tuttullu neqqaannik, nioqqutissiortumik.

Illut nutaaliat pitsaasut 

Maniitsoq ulluunerani paaqqinnittarfeqarlunilu angerlarsimaffeqarfiuvoq. Meeqqanut inuusuttunullu ornittagaqarpoq, nipilersornermik ilinniarfeqarluni, kiisalu naluttarfimmik pilersitsisoqarnissaanik sulissuteqartoqarluni.

Atuartitaaneq ilinniartitaanerlu 

Meeqqat atuarfiat Atuarfik Kilaaseeraq 423-nik atuartoqarpoq klassinut 28-nut agguataarneqartunik (2016-imi naatsorsuineq naapertorlugu). Nunatsinni efterskoliusut aappaat, Maniitsumi Efterskoli, 70-inik atuartoqarsinnaavoq. Aammattaaq suliffissanut, ilitsersuinernut pikkorissaqqinnernullu qitiusumik ingerlatsiveqarpoq (Majoriaq), ilaatigut inuussutissarsiutinik ilinniagaqalernermut akuerisamik isissutissiamik neqerooruteqartoq, kiisalu inuttut inerikkiartornissamik pisariaqartitsisunik tigusiffiusartumik atuarfeqarluni (Pilersitsivik).

Takornariaqarneq 

Takornariaqartitsinermut tunngatillugu arferit, timmissat, qaqqat kangerluillu Maniitsup tusaamasaassutigai. Upernaakkut, aasakkut ukiukkullu qipoqqaat tikaagulliillu takkusimaarnerusarput. Umiarsuit takornariartaatit amerliartortut Maniitsoq aqqusaartalernikuuaat, eqalunniartitsinerlu takornarianut neqeroorutitsialaavoq siunissaqartoq. Kangaamiut Maniitsullu eqqaanni qaqqat helikopteriaqqat atorlugit sisorartitsisarfissuatsialaapput, ukiuuneranilu nunarsuarmi tamanit tamaneersut Maniitsumut sisorariartarput.

Siunissaq 

Maniitsup siunissaanut atatillugu aatsitassarsiornissamik pilersaarutit piviusunngortinneqassanersut apeqqutaavoq. Itillip kangerluata qinnguani Qaqortorsuarmi aatsitassarsiutileqatigiiffik canadamiunit pigineqartoq 2016-imi sanaartorluni aallartippoq. Maniitsup kujataanissaaq nikkilimik kanngussammillu ujarlertoqarpoq. Suliffissaqartitsiniarneq eqqarsaatigalugu aatsitassarsiorfiit taakku ammarneqarnerisigut suliffippaaluit Maniitsumuinnaanngitsoq, aammattaarli kommunip inoqarfiinut allanut iluaqutaalertussaapput.
Maniitsup avannaata kangiani Tasersiami ippoq nunatsinni erngup nukinga atorlugu nukissiorfiliornissamut periarfissat pitsaanerpaat ilaat, aammalu Maniitsup qeqertaani erngup nukinganik nukissiuuteqartumik mingutitsiffiunngitsumik aluminiumik aatsitsiviliortoqarnissaa pilersaarutaalluni. Aluminiumik aatsitsivik pillugu pilersaarut piviusunngortinneqassappat tamanna Maniitsumi inuussutissarsiutinik ingerlatsinermut, inuinut, attaveqaqatigiinnermut aningaasarsiornermilu tunngaviusunut annertuumik allannguissaaq.

Qeqqata Kommunia

Kuuttartoq B1077

+299 70 21 00

Qeqqata@qeqqata.gl