Politikkit

Politikkit Qeqqata Kommuniani politikerinut, kommunimi ingerlatsivinnut sakkussatut malittarisassatullu atuutissapput. Kommunip politikkit atorlugit kissaatigivaa, kommunip pingaarnertut anguniagai ersarissarneqassasut.

Oqartussaaqataaneq ataatsimoorneq ineriartornerlu 2017-2021 

Innarluutilinnut politikki 

Naleqqatigiinneq peqataatitsinerlu Qeqqata Kommuniani innarluutilinnut politikkimi pingaartillugit pingaartinneqarput.
Ilaatigut imaappoq, inuiaqatigiinni pisunut peqataanissaminut allatuulli pisinnaatitaaffeqarlutik innarluutillit innuttaaqataasutut naleqqatitut isigineqassasut.

Innarluutilinnut politikki tamakkiisumik atuaruk

Meeqqanut inuusuttunullu politikki 

Qeqqata Kommuniata meeqqanut isiginneriaasia aallaaveqarpoq, meeqqat inuusuttullu inuit inuunerat peqqilluni ajunngitsumillu inersimatutut inuulernissamut tunngaviunerat.

Meeqqap peqqinnartumik ineriartorfiusumillu meeraanissamut inuusuttuunissamullu qulakkeerunnissaa meeqqanut inuusuttunullu politikkip sunneeqataaffigissavaa, tamatumani ilikkagaqarnissamik, sunngiffimmi sammisassanik kultureqarnikkullu neqeroorutit pingaarnertut aallaaviussallutik. 

Meeqqanut inuusuttunullu politikki tamakkiisumik atuaruk

Sulisoqarnermi politikki 

Sulisoqarnermi politikki Qeqqata Kommuniani anguniakkanik ataqqinnittuuvoq, sulisunillu ataasiakkaanik innarliinaveersaartuulluni. Sulisut kommunimi nukiupput pingaaruteqarnerpaat, taamaattumillu sulisoqarnermi politikkikkut kommuni Kalaallit Nunaanni siuttut ilaattut inissisimassalluni.

Sulisoqarnermi politikki tamakkiisumik atuaruk

Sillimmasiisarnermut politikki  

Sillimmasiinermi tunngasutigut politikki immikkoortunut tamanut sulisunullu tamanut atuuppoq. Kommunip immkkoortortaani suliffeqarfiinilu tamani aamma suliffeqarfinni imminut ingerlattuni ingerlatsimi isumaqatigiissuteqarfiusuni, ataatsimut maleruaqqusaqarluni sillimmasiinermut tunngasunik suliaqartarnissaq sillimmasiinermi tunngasutigut politikkeqarnissami siunertaavoq. 

Sillimmasiisarnermut politikki tamakkiisumik atuaruk

Oqaatsinut politikki 

Oqaatsinut politikki tassaavoq inuiaqatigiinni oqaatsitigut pissutsinik siunertaqartumik aqutsineq. Kalaallit oqaasii tassaapput Kalaallit Nunaanni pisortatigoortumik oqaasiusut pisortatigullu ingerlatsinermi atugaasut im.§3. Kommunip iluani oqaatsitigut pissutsinik aqutsineq Qeqqata Kommuniani oqaatsinut politikkimik maleruagassiornikkut malittarisassiornikkullu maana ivertinneqarpoq.

Oqaatsinut politikki tamakkiisumik atuaruk