airplanebooksbriefcase business cogs cross election entertainment fish house law lockmedicalpeopleselfservices socialtax

Sisimiuni inissisimasumut kommunip qullersaqarfianut QEQQATA KOMMUNIA KOMMUNIMI PISORTAANERMIK pissarsiorpoq.

INUIAQATIGIINNIK INERIARTORTITSEQATAARUSUPPIT?

2009-imi januaarip aallaqqaatani Sisimiut Maniitsullu kommunerisimasaasa kattunneqarneratigut Qeqqata Kommunia pilersinneqarpoq. Qeqqata Kommuniani inuit 10.000 missaaniittut najugaqarput.
Ukiut arlaqartut piareersaasoqareerluni, Qeqqata Kommunia Namminersorlutik Oqartussallu suliamut ilisimasalinnik suleqateqarlutik, Aasivissuit - Nipisat 2018-ip aasaanerani UNESCO-p Nunarsuarmioqatigiinnut kingornussassanut ilanngutitippaa, taamaalillunilu Kalaallit Nunaanni nunarsuarmioqatigiinnut kingurnussasaasut pingajuulluni. Tamatuma saniatigut Kangerlussuarmiit Sisimiut tungaanut nunaannakkut aqqusinniornissamut, kommunimut ineriartortitsinissamut suliniut pingaaruteqartoq suliarineqarpoq, immikkoortunik akuersissutinik arlalinnik tapertaqartoq, soorlu Maniitsup eqqaani qulimiguulimmik sisorariarneq, Sisimiut eqqaani akuersissuteqarluni sisorartitsisarfik, Maniitsup Sisimiullu akornanni kitaatungaani sineriak sinerlugu eqalunniarfiit, taamatullu Kangerlussuarmi tammajuitsussarsititsilluni piniartitsisarneq. Taamaalillunilu Qeqqata Kommunia aningaasaqarnikkut pitsaalluinnartumik ineriartorluni.

Qeqqata Kommunia immikkuullarissumik pinngortitami nunataqarluni, kulturikkut nalissaqannginnermigut, taseqarnermigut, assigiinngissitaartumik uumasoqarluarnermigut kiisalu illoqarfinni imaannaanngitsumik avatangiiseqarnermigut ilisarnaateqarpoq. Kommuni Kalaallit Nunaata kitaata qeqqani inissisimavoq, taamaalillunilu inuiaqatigiinni nunat assigiinngitsut akornanilu attaveqarnermut tunngatillugu qitiusumik inissisimavoq, taamaalillunilu kommuni nunasivigissallugu orniginartuulluni. Tamatuma saniatigut ilinniarnissamut arlaqartutigut periarfissaqarpoq. Tamakku tamaasa ataatsimoortinneqarneratigut kommunip siunissami ineriartornissaanut pitsaasumik aallaaviupput. Qeqqata Kommuniani nuna annertooq, tikikkuminartoq sikujuitsuusorlu isumalluutaavoq pingaaruteqartoq, isumalluutinillu qajassuussilluni atuilluarnissaq illersuinissarlu pingaaruteqarpoq. Nunaannaq Kalaallit Nunaani atuilluartumik aningaasaqarnermik pilersitseqataasuuvoq.
Qinnuteqarfissaq kingulleq:
24. september 2019
Sumiiffik/Pisortaqarfik:
Sisimiut
Sivisussuseq:
Tamakkiisoq

Kommunip aaqqissuussaanerani tamarmiusumi Kommunimi pisortaaneq nutaaq qaffasinnerpaatut aqutsisuussaaq, kommunimilu politikkikkut allaffissornerullu akornanni ataqatigiisitsisuulluni. Tamatuma saniatigut kommunimi pisortaaneq borgmesterimut kommunalbestyrelsimullu siunnersuisuullunilu siunnersiueqatigiisitsisuussalluni - matumani pingaarnertut aaqqissuussaanermut, inatsisilerinermut tunngasunik suliatigut, aningaasaqarnermut, tusagassiuteqarnermut kiisalu politikkikkut sammisanut tunngatillugu. Atorfik tullinnguuttutigut akisussaaffinnik suliassaqarfeqarpoq: 

§  Sunniutilimmik aaqqiissutissat atuilluartumillu inerneqarnissat siunertaralugit politikkikkut anguniakkani, aalajangiussani pilersaarutinilu unioqqutitsinngitsumik ingerlatsinissamut aamma naammassisaqarnissamut malitseqartitsinissamullu qulakkeerinninneq.

§  Kommunimi pisortaaneq pingaarnertut akisussaasuussaaq, aningaasaqarnermullu pisortatut sulisinnaalluni, aningaasaqarnermulli sulianik isumaginnittumit aningaasaqarnermut pisortamit tapersersorneqartassalluni. Periusissiamik, ineriartortitsinissamik pitsanngorsaanissamillu ukkataqarluni, sunniutilimmik aningaasaqarnermik aqutsinissamut nukinnik tulluartumik atuinissamut qulakkeerisuunissaq ilaavoq.

§  Kommunimi pisortaaneq taamaalilluni pingaarnertut akisussaasuussaaq, teknikkeqarnermut pisortatut sulisinnaasoq, illoqarfinnilu marluusuni Teknikkeqarnermut Avatangiisinullu immikkoortortani pisortanit tapersersorneqartassalluni - matumani illoqarfinnik, nunaqarfinnik nunaannarmillu ineriartortitsinissamik qulakkeerisuussalluni

§  Aaqqissuussaanermi ineriartortitsinermik, suleqatigiinnermik, ingerlariaatsinik suliassallu naammassineqarnisaanut aallartitsisuullunilu malitseqartitsisoq.

§  Qeqqata Kommuniata allaffeqarfiani tamani sulinermi ingerlalluartoqarnissaanik qulakkeerineq, Qeqqata Kommuniatalu sumut ingerlaneranik tamanit ilisimaneqarnissaanik isumaginninneq

 

Piukkunnaatilik marluinnik kalaallisut qallunaatullu oqaaseqartuussaaq kiisalu minnerpaamik oqaloqatigiissinnaalluni tuluttut piginnaasaqartoq. Piukkunnaatilik taamatuttaaq kanididatitut ilinniagaqarnikkut attuumassuteqartumik tunuliaqutaqassaaq. Taakkununnga ilanngullugit:

§  Ilitsoqqussaralugu paasisimasaqarluartoq eqeersimaartorlu. Qullersaalluni aqutsisoq ersarissoq

§  Periusissiat atuutilersinneqarnissaannut iliuuseqalersitsinissamut siuttuusoq

§  Nutaaliortoq takorluugaqartorlu. Anguniagaqartuulluni eqinnaatsuullunilu piumassuseqarluartoq

§  Tamanik takunnissinnaallutit suleriaatsinik angusanillu ilisimaarinnittuusoq

§  Ataqqinaateqarluartuulluni katersuisinnaasumik aqutsisoq (akuutitsisoq suliassanillu agguataarisinnaasoq)

§  Sulianik ilisimasaqarluarneq

§  Aaqqissuussaanermi politikkikkut katitigaasumi aalajaatsumik sulisinnaasoq

§  Pilersaarusiortumik eqqarsarsinnaasoq iliuuseqarsinnaasorlu

§  Pitsaasumik attaveqaateqartartoq, kommunillu ineriartornissaanut periarfissanik takunnilluarsinnaassuseqartoq

Pitsaasumik pissuseqarfiusumi suliatigut nukittuumik aaqqissuussaasumi kommunimi ingerlalluartumi suliffimmik orniginartumik Qeqqata Kommunia neqerooruteqarpoq.  

 

Tamatumani aamma siunissami pisariaqartitanik isumaqarluartumik paasinninnikkut silassorissumillu pilersitsiniarnikkut, ileqqunik nutarsaanernillu oqimaaqatigiitsilluni annertuumik akisussaaffeqarpoq. Sisimiut 5.509-nik innuttaqarluni kommunimi illoqarfinni annersaalluni, Kalaallit Nunaanni illoqarfiit annersaasa tulleraat. Illoqarfik Kalaallit Nunaani ukiuunerani sikuuneq ajortuni avannarlersavoq, illuatungaatigullu ukiuunerani upernaakkullu qimusserfiusinnaasuni qamuteralaffiusinnaasunilu Kalaallit Nunaani kujasinnerpaajulluni. Kalaallit Nunaani illoqarfinnik naatsorsuuteqarfiusinnaasunik Sisimiuni pigineqarput. Illut anginngitsut qisunnik sanaat qalipaatigissaartut, qimmit qimuttut uummaarissut innuttaasullu najugaqavissut inussiarnersut kiinneraartullu. Sisimiut ilisarnaatigaa 784 meterinik portussuseqarluni qaqqaq ”Nasaasaaq”, ukiumi upernaakkullu ujakkaarnissamut, sisorarnissamut kiisalu aasaanerani pisulluni angalaarfigineqarnissaanut periarfissaqarluartoq. Immikkoortortamittaaq immikkuullarissunik misigisaqarnissamut periarfissaqarpoq, soorlu qulimiguulimmit sisorariarneq, eqalunniartarfinni pitsaalluinnartuni qissattarneq, aqqarneq, sermersuarmi sisorarneq, sermersuarmut angalaarneq allarpassuillu.

 

Tassunga atorfimmut inuttassarsiornissaq pillugu Qeqqata Kommuniata Pointer A/S suleqatigivaat. Taamaattumik Pointer A/S-imi pisortaaneq Inger Ingvardsen +45 29 36 86 36 aqqutigalugu attaviginninnissannut tikilluaqqusaavutit. Saaffiginnissutit tamarmik allanut tusarliunneqaratik suliarineqassapput.

Qinnuteqaat piaarnerpaamik kingusinnerpaamillu 2019-imi marlunngornermi septembarip 24-ani, Kalaallit Nunaata nalunaaqutaa malillugu nal. 24 uunga nassiunneqassaaq: 

Attavissaq:

Inger Ingvardsen

+45 29 36 86 36